Read Batak Toba LUKAS 7 Bible Online

LUKAS 7 - Batak Toba bible

LUKAS 7

¹I. [1] Asa dung sun dihatahon Ibana sasude hatana ondeng tu pinggol ni natorop, dibongoti ma huta Kapernaum.

²Jadi hansitan ma naposo ni sada letnan, na pinarhamaol ni tuanna, pola matemate ne.

³Dung dibege ibana barita ni Jesus, disuru ma angka sintua ni halak Jahudi manopot Ibana mangelehelek, asa ro pamalum naposona i.

⁴Sahat ma nasida tu Jesus jala gomos ma Ibana diapoi, ninna ma: Patut do oloanmu ibana.

⁵Ai holong do rohana di bangsonta; tung ibana do pajongjong parguruanta.

⁶Jadi rap laho ma Jesus dohot nasida. Alai ndang apala dao be Ibana sian jabu i, nunga disuru letnan i angka donganna mandok tu Ibana: Tuhan, unang loja Ho! Ai na hurang tama do ahu, tung bongotanmu jabungku.

⁷Laos ala ni i do ndang tau huetong diringku manopot Ho. Alai dok ma hata sisandok, asa malum naposongki.

⁸Ai halak, na ginomgoman ni na marhuaso do ahu, na mangarajai soldadu; molo hudok tu na sada: Tusadui ma ho?, laho do ibana; ia tu na sada: Tu on ma ho! -- Ro do ibana; jala ia tu naposongku: On ma bahen!, jadi i do dibahen.

⁹Umbege i, longang ma Jesus, laos humusor ma Ibana mandok tu natorop na mangihuthon Ibana: Hudok ma tu hamu: Gari di halak Israel, gari ndang jumpang Ahu haporseaon na songon i!

¹⁰Jadi muli ma angka na sinuru i tu jabu, laos malum do didapot nasida anak somang i. II.

¹¹Marsogotna i laho ma Ibana tu sada huta na margoar Nain; siseanna i do donganna sauduran, songon i do natorop godang.

¹²Mandapothon bahal ni huta i nasida, tongon ma diusung tu balian sahalak naung mate, anak sasada ni inana naung mabalu; jala torop do pangisi ni huta i mangundurhon. [106†]

¹³Marnida na mabalu i Tuhan i, maras do rohana, jadi didok ma tu ibana: Unang ho tangis!

¹⁴Laos didapothon ma batang i, dijama ma, jadi sulon ma na mangusungsa, gabe didok ma: O dolidoli, hudok ma tu ho: Hehe ma ho!

¹⁵Jadi hundul ma halak naung mate i, dipungka ma mangkatai jala dilehon ma ibana tu inana i. [107†]

¹⁶Hatahutan do nasida sasude jala dipuji ma Debata, didok ma: Panurirang bolon do dipahehe di tongatonganta jala ditatap Debata do bangsona. [108†]

¹⁷Sar ma baritana i tu sandok luat Judea ro di sude luat na humaliang i. III.

¹⁸Jadi dibaritahon angka sisean ni si Johannes ma sasudena i tu ibana, gabe dijou ma dua siseanna tu jolona.

¹⁹Disuru ma nasida manopot Tuhan i mandok: Ai Ho do na naeng ro i, manang na asing dope paimaonnami?

²⁰Asa dung sahat halak i tu jolona, didok nasida ma: Disuru si Johannes pandidi i do hami manopot Ho, mandok: Ai Ho do na naeng ro i, manang na asing dope sipaimaonnami?

²¹Tongon uju i torop ma halak dipalua Ibana sian sahit dohot haporsuhon nang sian angka tondi na jahat, jala torop na mapitung marnida dibahen.

²²Laos dialusi ma nasida songon on: Laho ma hamu mamaritahon tu si Johannes na niida jala na binegemuna on: Na gabe marnida do angka na mapitung, na mardalani do angka na pangpang, na gabe ias do angka na huliton, na marbinege angka na nengel, na mulak mangolu do angka na mate; tu angka na pogos do binoan barita na uli;

²³jala martua do na so targasip di Ahu!

²⁴Alai dung laho angka suruan ni si Johannes, ditaringoti ma si Johannes tu natorop i: Aha do na naeng idaonmuna, umbahen na laho hamu ruar tu halongonan? Arung na meoleol na niullus ni alogo do?

²⁵Na marnida aha do umbahen na borhat hamu? Halak parabit na lamot do? Di jabu ni na raja do angka na marabit na sangap jala angka na gaduk.

²⁶Na marnida aha do tahe, umbahen na borhat hamu? Panurirang do? I do tutu! Hudok ma di hamu: Sumurung do ibana sian panurirang! [109†]

²⁷Ibana do na nidok ni Surat i: “Suruonku ma suruanki, patujolom, sipature dalanmu di jolomi!” [110†]

²⁸Hudok ma tu hamu: Ndang adong na tubu sian parompuan na umbalga asa si Johannes; alai halak na ummetmet, naung di bagasan harajaon ni Debata, umbalga ma i sian ibana. [111†]

²⁹Ai natorop i saluhutna na umbege hatana ro di angka sijalo beo, dipintori do Debata, ai dijalo do pandidion i sian si Johannes. [112†]

³⁰Alai anggo halak Parise dohot sipeop patik i, disundati do tahi ni Debata na taringot tu nasida, ai ndang dipadidihon dirina tu ibana. [113†]

³¹Asa tu ise ma patudosonku halak na sansundut on; tudos tu ise nasida tahe?

³²Tudos ma nasida tu angka dakdanak na hundul di onan, na masijouan mandok: Hupalui hami suling di jolomu, so haru manortor hamu; andung hupatubegehon hami, so saut hamu tangis.

³³Ai na ro do si Johannes pandidi i, ndang mangan roti, ndang minum anggur ibana, gabe didok hamu: Na sibolison do ibana!

³⁴Ro Anak ni jolma i, mangan minum do anggo Ibana, gabe didok hamu; Ndi Halak on! Sipapangan mago, sisobur tuak, aleale ni sijalo beo dohot sipardosa! [114†]

³⁵Gabe pintor Hapistaran i dipintori angka anakna saluhutna. IV.

³⁶Dung i diarahon sahalak sian angka Parise ma Ibana mangan; jadi dibongoti ma jabu ni Parise i, laos hundul disi: [115†]

³⁷Dung i ro ma boruboru pardosa sahalak, isi ni huta i, ala diboto, naung hundul Ibana di bagas ni Parise i; diboan ma sada galas alabaster, isian ni miak na hushus.

³⁸Mariluilu do ibana laho mandapothon tu pat ni Jesus; iluiluna do manonui patna i, obukna do dibahen mangapusi, diumma ma patna i jala dimiahi dohot miak na hushus i.

³⁹Marnida i halak Parise na mangarahon Ibana, marhusari ma ibana songon on: Aut na panurirang halak on, tandaonna do boruboru on na manjama Ibana jala botoonna do pangalahona, ai sipardosa do i.

⁴⁰Gabe dialusi Jesus ma ibana: Simon, adong na hudok tu ho! Ia hata ni i: Hatahon ma, Guru! ninna.

⁴¹Dua do parsingiran ni sada halak sipaanakkon hepeng. Utang ni na sada limaratus rupia, limapulu do di na sada nari.

⁴²Ala soada gararnasida, dibasabasahon ma i tu nasida duansa. Asa ise nasida tagamon na humolong roha di ibana?

⁴³Dialusi si Simon ma: Parsibasabasaan na gumodang i do, anggo di rohangku. Jadi dialusi ma ibana: Tingkos do panimbangmi!

⁴⁴Dung i didompakkon ma parompuan i, laos ninna ma mandok si Simon: Atehe diida ho do parompuan on? Ro do Ahu tu jabum on, ndang dilehon ho aek pamuri ni pathu; alai anggo ibana, iluilu ni matana do dibahen manonui pathu jala diapusi dohot obukna. [116†]

⁴⁵Ndang diumma ho Ahu; alai anggo ibana, olat ni dung bongot tuson, ndang dipasohot mangumma pathu. [117†]

⁴⁶Ndang dimiahi ho ulungku; alai anggo ibana, dimiahi do pathu dohot miak na hushus.

⁴⁷Dibahen i hudok ma tu ho: Nunga sesa dosana na godang i, umbahen godang holong ni rohana. Alai anggo otik do disesa, otik ma holong ni rohana.

⁴⁸Laos didok ma tu parompuan i: Nunga sesa angka dosami!

⁴⁹Gabe didok angka donganna sapanganan ma sama nasida: Ise do On? Ai dohot do angka dosa disesa?

⁵⁰Laos didok muse tu parompuan i: Haporseaonmi do paluahon ho. Mardame ma ho muli! [118†]