Read Batak Toba LUKAS 8 Bible Online

LUKAS 8 - Batak Toba bible

LUKAS 8

¹I. [1] Salpu i dibolus Ibana ma angka huta dohot lumban marjamita, laho mamaritahon harajaon ni Debata; na sampuludua i do donganna, [119†]

²nang deba parompuan naung pinamalumna sian angka tondi na jahat dohot sian parsahiton, i ma si Maria, na margoar Magdalena, na tinadingkon ni pitu tondi na hodar, [120†]

³dohot si Johanna, dongan saripe ni si Kusa, juara bagas ni si Herodes, dohot si Susana, ro di torop na asing, na manatap Ibana sian sinadongannasida. II.

⁴Asa dung pungu torop jolma jala marroan tu jolona sian angka huta i sude, marumpama ma Ibana:

⁵Na laho ma sahalak panabur manaburhon boni. Jadi di na manabur i ibana, adong ma deba na mamiltik tu dalan, gabe tardege ma i jala diparguti pidong na martongatonga langit.

⁶Na deba madabu tu batu; jala dung tubu, rahar ma, ala so maraek.

⁷Na deba madabu tu tongatonga ni parsihupian, jala rap tubu ma sihupi i, dipisat ma i.

⁸Ia na asing i madabu tu tano na denggan i; jala dung tubu, diparbuehon ma saratus lompit. Dung didok songon i, dijouhon ma: Hamu, angka parpinggol na marbinege, pinggol umpama i.

⁹Disungkun angka siseanna ma Ibana taringot tu umpama i.

¹⁰Gabe didok ma: Dilehon do tu hamu pamotoan di hahomion ni harajaon ni Debata; alai marhitehite umpama do tu angka na asing, asa unang diida, nang pe dibereng, jala unang diantusi, nang pe dibege. [121†]

¹¹Alai on ma umpama i: Ia boni i, hata ni Debata do. [122†]

¹²Anggo na di dalan i, i ma angka na umbegesa, dung i ro ma sibolis i, dibuat ma hata i sian rohanasida, asa unang porsea nasida, unang dapotan haluaon.

¹³Anggo na di batu i, i ma angka na las roha manjangkon hata i, dung dibege; alai ndang marurat nasida, sangombas do nasida porsea, jala di masa ni pangunjunan marbalik nasida.

¹⁴Anggo na madabu tu parsihupian i, i ma angka na umbegesa, gabe laho ma nasida, hapusohan binahen ni pangkolsohon, hamoraon dohot hahisapon ni ngolu on, jala ndang matoras parbuena.

¹⁵Alai anggo na tu tano na denggan, i ma angka na mameop hata binegena i di bagasan roha na bonar jala na denggan, gabe saut marparbue di bagasan habengeton. [123†]

¹⁶Alai ndang adong na pagalakkon palito, gabe dihungkuphon ampang tusi, manang dibahen tu toru ni parate; tu parpalitoan do dibahen, asa diida angka na ro i palito i. [124†]

¹⁷Ai ndang adong na buni, na so patar muse; jala ndang adong na simo, na so tangkas tandaon muse jala mullop. [125†]

¹⁸Dibahen i pamanat hamu ma, manang songon dia parbinegemuna; ai tu paradongan lehonon do, alai buaton ma sian na so paradongan na adong di ibana di rohana. [126†] III.

¹⁹Dung i ro ma inana dohot angka anggina manopot Ibana, gabe ndang tarbahensa tolhas tu jolona, dibahen torop ni halak.

²⁰Jala adong ma na paboahon tu Ibana: Inangmu dohot anggimu jongjong dibalian; naeng idaonnasida do Ho!

²¹Alai ninna Jesus ma mandok nasida: Angka on na umbege jala mamarangehon hata ni Debata, i do dainang, i do angka anggingku! IV.

²²Jala di na sadari bongot ma Ibana tu parau rap dohot angka siseanna, laos didok ma tu nasida: Tataripari ma tao i; dung i borhat ma nasida.

²³Di na marparau i nasida, nok ma matana. Jadi turun ma habahaba siappalautus tu tao i, gabe disangkopi galumbang i ma nasida, pola tarmara.

²⁴Jadi didapothon nasida ma Ibana, disungguli ma: Ia hatanasida: Guru! Guru! Na mago ma hami! Dung i hehe ma Ibana; hona hata ma alogo i dohot galumbang ni aek i dibahen, gabe so ma jala menak.

²⁵Alai ninna ma mandok nasida: Didia do haporseaonmuna? Alai mabiar do nasida huhut longang, jala masipandohan: Halak dia ma On ulaning? Gari angka alogo i dohot aek i dipaksa, jala dioloi do Ibana. V.

²⁶Marlayar nasida tu luat Gadara, tondongkon ni luat Galilea.

²⁷Asa dung tardarat Ibana, dapotsa ma sada halak, isi ni huta i, partondi na hodar; nunga na nia lelengna ndang olo be marabit jala ndang olo mian di jabu, di angka parbandaan do ibana.

²⁸Alai disi diida Jesus, mangangguhi ibana manungkap di jolona, jala gogo ma soarana mandok: Marhua Ho tu ahu, Jesus, Anak ni Debata Na tumimbul? Huelehelek Ho, unang ahu arsahi!

²⁹Ai didokkon Jesus do tondi na hodar i ruar sian jolma i. Nunga jotjot disoroi ibana, gabe dirantei jala dibeangkon halak ibana laho mangaramoti; alai dirapui tondi i do angka ihot i jala dihidahida ibana tu halongonan.

³⁰Disungkun Jesus ma ibana: Ai ise goarmu? Gabe didok ma: Loksa do goarhu. Ai torop do tondi na jahat sorang tu ibana.

³¹Laos dielehelek nasida Ibana, unang dipaksa nasida turun tu banua toru.

³²Alai adong ma disi, di robean i, babi sapunguan na balga na manjampali, gabe dipangido, asa diloas nasida mambongoti angka i; jadi dioloi ma.

³³Gabe ruar ma tondi na jahat i sian jolma i, dibongoti ma angka babi i, jadi marbubur ma na sapunguan babi i sian rura tu tao, laos mate mogap.

³⁴Alai dung diida angka parmahan i na masa i, maporus ma nasida, dibaritahon ma i di huta dohot di angka ladang.

³⁵Gabe ruar ma nasida marnida naung masa i; didapothon ma Jesus, jadi jumpang nasida ma halak, na jahat i, marabit jala marroha, hundul di lambung pat ni Jesus, jadi hatahutan ma nasida.

³⁶Alai angka na marnidasa, i do paboahon tu nasida pangalaho ni hamamalum ni na sinorangan ni angka tondi na hodar i.

³⁷Jadi dielehelek saluhut pangisi ni luat humaliang Gadara ma Ibana, asa sumurut sian nasida, ai biahaton situtu do nasida. Laos bongot tu parau ma Ibana laho mulak.

³⁸Dielehelek halak na tinadingkon ni tondi na jahat i do Ibana naeng dongananna Ibana nian; alai dipalaho do ibana, ninna ma:

³⁹Muli ma ho tu jabum, pajojor ma saluhut na binahen ni Debata tu ho! Jadi laho do ibana, dibaritahon ma di sandok huta i nasa na binahen ni Jesus tu ibana. VI.

⁴⁰Asa dung mulak Jesus, dijangkon natorop i do Ibana, ai nunga dipaimaima hian Ibana.

⁴¹Jadi ro ma sahalak, na margoar si Jairus, sintua ni parguruan i do ibana; dipatungkap ma dirina tu jolo ni Jesus mangelehelek Ibana, asa ro tu jabuna.

⁴²Ai matemate ne do boruna sisadasada, na marumur sampuludua taon. Jadi laho mandapothon tusi, hona sosak ma Ibana dibahen natorop i.

⁴³Dung i adong ma parompuan sahalak, naung sampuludua taon lelengna marsahithon bulan; nunga dipasuda sude artana tu angka pandaoni, so tarpamalumsa.

⁴⁴I do na ro mandapothon Jesus, sian pudi ma dijama rambu ni ulosna, jadi manigor montok ma mudar i.

⁴⁵Gabe didok Jesus ma: Ise do i na manjama Ahu? Dung sude mansoadahon, ninna si Petrus rap dohot angka donganna ma: Guru, natorop i do manosak jala mamonjoti Ho!

⁴⁶Alai ninna Jesus do: Adong do na manjama Ahu! Ai huhilala, ruar do gogo sian Ahu.

⁴⁷Diantusi parompuan i ma, na so buni hape pambahenna i, jadi angka hitir ma ro, disomba ma Ibana, dipajojor ma di jolo ni saluhut natorop i alana, umbahen na dijama, ro di hamamalumna di na santongkin i.

⁴⁸Gabe ninna ma mandok ibana: Haporseaonmi do na paluahon ho, inang; mardame ma ho muli! [127†]

⁴⁹Mangkatahon i dope Ibana, adong ma na ro sian jabu ni sintua ni parguruan i mandok: Nunga mate borumi; unang be lojai Guru i!

⁵⁰Umbege i Jesus, dialusi ma ibana: Unang ho mabiar, asal porsea ho; sai mangolu do ibana!

⁵¹Dung sahat tu jabu, ndang diloas bongot halak, dungkon ni si Petrus, si Johannes dohot si Jakobus, angkup ni ama dohot ina ni dakdanak i.

⁵²Tangis do sasude mangandungi na mate i. Alai ninna ma: Unang hamu tangis! Ai ndang na mate ibana, na modom do! [128†]

⁵³Gabe diparengkeli nasida Ibana, ala diboto naung mate.

⁵⁴Alai ditangkup Ibana ma tanganna, dijouhon ma: Hehe ma ho, butet!

⁵⁵Gabe mulak ma hosana, jadi manigor hehe ma; didokkon Jesus ma lehonon dakdanak i mangan.

⁵⁶Tarmali ma natorasna i; alai dipopai ma nasida, unang dihatahon na masa i. [129†]