Read Batak Toba LUKAS 9 Bible Online

LUKAS 9 - Batak Toba bible

LUKAS 9

¹I. [1] Dung i dipapungu ma na sampuludua i; dilehon ma tu nasida gogo dohot huaso, mangalo nasa tondi na hodar nang pamalum angka sahit.

²Disuru ma nasida mamaritahon harajaon ni Debata jala pahisarhon halak.

³Jala ninna ma mandok nasida: Unang boan hamu agia aha tu tongandalan, manang tungkot, manang singkop, manang roti, manang hepeng, manang dua baju pe.

⁴Jadi molo dung dibongoti hamu jabu, disi ma hamu mian; laos sian i ma hamu borhat muse. [130†]

⁵Anggo so dijangkon hamu, ruar ma hamu sian huta sisongon i; pirpirhon hamu ma orbuk i sian totmuna, bahen panindangion tu nasida. [131†]

⁶Jadi borhat ma nasida; diliati ma angka huta marbarita na uli huhut pamalum sahit di sasude.

⁷Dibege si Herodes, raja na opat i, ma sude na masa i, gabe bohabohaon ma ibana, ala adong na mandok: Nunga dipahehe si Johannes sian na mate.

⁸Na deba mandok: Nunga ro si Elia; na asing muse: Nunga mulak mangolu sahalak sian angka panurirang na robi.

⁹Alai didok si Herodes ma: Ianggo si Johannes, nunga hugotap uluna; alai ise ma On, naung songon i hubege baritana? Jala dipangido rohana, naeng idaonna Ibana. [132†] II.

¹⁰Asa dung mulak angka apostel i, dipajojor nasida ma tu Ibana nasa na niulanasida, gabe ditogihon ma nasida manginsurut tu sada huta na margoar Betsaida.

¹¹Umboto i natorop i, diihuthon ma Ibana, jadi dijangkon Jesus ma nasida, dibaritahon ma tu nasida harajaon ni Debata jala dipamalum angka na hurang hipas i.

¹²Alai di na mareak guling bot, ro ma na sampuludua i mandok tu Ibana: Pamuli ma natorop i, asa laho nasida sorang tu angka huta dohot tu angka parladang humaliang, anggiat dapotsa sipanganon, ai halongonan do ingananta on.

¹³Alai ninna ma mandok nasida: Lehon hamu ma nasida mangan! Gabe ninna nasida ma: Holan lima roti dohot dua dengke do di hita, anggo so hami laho manuhori sipanganon di natorop on saluhutna.

¹⁴Ai arga limaribu halak do toropnasida. Laos ninna ma mandok siseanna: Dokkon hamu ma nasida juguk marsasapunguan, marlimalimapulu.

¹⁵Dipatupa nasida ma i, dipahundul ma nasida saluhutna.

¹⁶Dibuat Ibana ma na lima roti dohot na dua dengke i, ditailihon ma tu ginjang, laho mamasumasu; diponggoli ma, dilehon ma tu siseanna, asa nasida sumagihonsa tu natorop i.

¹⁷Mangan ma nasida saluhutna jala bosur be do; laos dibuat do angka ponggolponggol ebaebanasida, gok sampuludua ampang. [133†] III.

¹⁸Jadi uju martangiang Ibana sasadasa, didapothon angka sisean i ma Ibana, gabe disungkun ma nasida: Ise do Ahu didok natorop?

¹⁹Didok nasida ma mangalusi: Si Johannes pandidi do; na deba: Si Elia; na deba: Sahalak sian angka panurirang na robi, naung mulak mangolu.

²⁰Gabe didok Ibana ma tu nasida: Anggo hamu, ise do Ahu didok hamu? Jadi ninna si Petrus ma mangalusi: Kristus ni Debata do Ho!

²¹Alai gogo ma nasida diorai, unang dipaboaboa i tu halak.

²²Laos didok ma: Ia Anak ni jolma i, ingkon godang do taononna, bolongkonon ni angka panungganei, sintua ni malim dohot sibotosurat do Ibana, dung i pusaon do, jala mulak mangolu do di ari patoluhon. [134†]

²³Tu saluhutna ma didok: Ia adong na naeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu.

²⁴Ai agoan hosa ma na naeng paluahon hosana; alai na agoan hosa ala ni Ahu, i do na pangoluhonsa. [135†]

²⁵Ai aha ma gunana di jolma, nang nasa portibi on diomo, anggo diago dirina, laos mago disi.

²⁶Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i. [136†]

²⁷Alai tutu do hatangkon tu hamu: Adong do deba na jongjong dison, na so tupa mangae hamatean, so jolo diida ro harajaon ni Debata. IV.

²⁸Arga ualu ari dung salpu hata ondeng, ditogihon ma si Petrus, si Johannes dohot si Jakobus nangkok tu dolok martangiang.

²⁹Jadi uju na martangiang Ibana, mimbar ma rupa ni bohina, jala marlinanglinang ma parabitonna.

³⁰Mangkatai ma dua halak dohot Ibana; i ma si Musa dohot si Elia.

³¹Marhasangapon do nasida idaon, angka na humatahon ujung ni langkana, sipasidungonna di Jerusalem. [137†]

³²Tarpodom do anggo si Petrus dohot angka donganna. Alai dung dungo nasida, gabe diida ma hasangaponna i, nang halak na dua i jongjong di lambungna.

³³Jala martahi sirang nasida sian Ibana, ninna si Petrus ma mandok Jesus: O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia; so adong diboto na nidokna i.

³⁴Mandok songon i dope ibana, ro ma ombun sada mangalinggomi nasida, gabe hatahutan ma nasida, laho bongot tubagasan ombun i.

³⁵Jadi mangkuling ma sada soara sian ombun i mandok: On do Anakku na tarpili i; tangihon hamu ma Ibana! [138†]

³⁶Jadi dung mangkuling soara i, sasada Jesus nama dapot nasida disi. Laos mauhom do nasida; ndang dipabotohon na niidanasida i tu agia ise anggo di angka ari i. V.

³⁷Torang ni arina i tuat ma nasida sian dolok i, jala ro ma torop halak manjumpangkon Ibana.

³⁸Jadi adong ma di tongatonga ni natorop i sahalak na manjouhon: Guru, sombangku di Ho, tatap ma anakki; sasada i do tubungku.

³⁹Disi disoro tondi i ibana, manigor mangguhangguk ma, dipapuhung do ibana, pola margumogumo pamanganna; maol sumurut sian ibana, sai digosagosa do.

⁴⁰Nunga huelehelek angka siseanmi, asa dipabali nian; alai ndang tarpatupasa i!

⁴¹Gabe dialusi Jesus ma mandok: E bangso na so porsea jala na sumalin on! Sadia leleng on angkupanku jala paanjuanjuonku hamu? Boan anakmi tuson!

⁴²Mandapothon Jesus i dope nasida, nunga disoro tondi na jahat i ibana jala dipapuhung. Alai disonggahi Jesus ma tondi na hodar i jala dipamalum ma dakdanak i; dipasahat ma ibana tu amana. [139†]

⁴³Tarhalomong do nasida saluhutna dibahen hasahalaon ni Debata. Jadi di na longang nasida mida sude pambahenanna i, ninna Ibana ma mandok siseanna:

⁴⁴Tangihon hamu ma hatangkon: Magira ma pasahaton Anak ni jolma i tu tangan ni halak! [140†]

⁴⁵Alai ndang diantusi nasida pandokna i; buni do i sian rohanasida, so diarti, jala tanggak do rohanasida, manungkun Ibana siala hata i. [141†] VI.

⁴⁶Alai tubu ma pingkirannasida sama nasida: Manang ise nasida masuk na sumurung.

⁴⁷Alai diboto Jesus do pingkiran ni rohanasida, gabe dialap ma sada dakdanak, dipajongjong ma tu lambungna.

⁴⁸Laos didok ma tu nasida: Na olo manjangkon dakdanak on ala Goarhu, Ahu do na jinangkonna disi; jala na manjangkon Ahu, manjangkon na marsuru Ahu do. Ai na ummetmet sian hamu sude, i do na balga dohonon. [142†]

⁴⁹Jadi mangkuling ma si Johannes, ninna ma: Guru, huida hami do sada halak, sipabali angka tondi na jahat mangasahon Goarmu; jala nioraan ibana, ala so didongani hami mangihuthon Ho.

⁵⁰Didok Jesus ma tu ibana: Unang orai hamu ibana! Ai na so mangalo hamu, donganmuna do i. [143†]

⁵¹Alai di na lam donok ari hababangkitna, dipatohom ma bohina mardalan tu huta Jerusalem. [144†]

⁵²Laos disuru ma angka suruanna patujolona. Jadi laho ma nasida, dibongoti ma sada huta ni halak Samaria, paturehon parbornginanna. [145†]

⁵³Gabe ndang dijangkon nasida Ibana, ala dipatohom bohina laho tu Jerusalem.

⁵⁴Marnida i siseanna si Jakobus dohot si Johannes, didok ma: Tuhan, anggo olo Ho, hudokkon hami ma turun api sian ginjang mangalengsehon nasida, (songon binahen ni si Elia). [146†]

⁵⁵Alai humusor ma Ibana, hona hata ma nasida dibahen, (ninna ma: Ndang diboto hamu hape, manang Tondi dia di hamu?

⁵⁶Ai laho paluahon, ndada mangagohon tondi ni jolma Anak ni jolma i, umbahen na ro). Jala tu huta na asing nama ditopot nasida. [147†] VII.

⁵⁷Uju di tongandalan nasida, ninna sahalak ma mandok Ibana: Sai ihuthononku do Ho, manang tudia pe Ho laho.

⁵⁸Didok Jesus ma tu ibana: Na marliang do angka antuasu, na marasar do pidong na martongatonga langit; alai anggo di Anak ni jolma i ndang adong hapeahan ni uluna.

⁵⁹Ia tu sahalak na asing didok: Ihuthon Ahu! Alai didok i ma: Loas ahu jolo laho mananom damang!

⁶⁰Alai ninna ma mandok ibana: Pasombu ma angka na mate mananom na matena; alai anggo ho, borhat ma mamaritahon harajaon ni Debata!

⁶¹Sahalak na asing muse mandok: Huihuthon pe Ho, Tuhan; alai loas ahu jolo martinading hata tu angka donganku sabagas! [148†]

⁶²Alai ninna Jesus ma mandok ibana: Na manjama ninggala, huhut mamereng tu pudi, tung na so tau ma i tu harajaon ni Debata.