Read Batak Toba 5 MUSA 24 Bible Online

5 MUSA 24 - Batak Toba bible

5 MUSA 24

¹I. [1] Tung sura sada baoa mambuat sada parompuan bahen jolmana, hape marsogo ni roha ibana muse mida nasida, ala adong jumpangsa di nasida manang aha tau tihasna, ingkon suratonna di nasida sada surat sirang jala lehononna do i tu bagasan tangannasida, laos palahoonna nasida sian jabuna. [241†]

²Ia dung ruar nasida sian jabuna i, laos laho gabe jolma ni halak na asing.

³Hape magigi muse dohot baoa na asing i mida nasida, laos disurathon di nasida sada surat sirang, jala dilehon tu tangannasida i jala dipalaho nasida sian jabuna; manang tung sura mate baoa na asing i, naung mambuat nasida bahen jolmana:

⁴Ndang tarbahen harajaanna parjolo i, naung marsuru nasida mulak, mambuat nasida muse naeng gabe jolmana, dung gabe ramun nasida, ai marbiasbias do roha ni Jahowa disi, jala ndang jadi mardosa bahenonmu tano naung nilehon ni Jahowa, Debatam tu ho bahen partalianmu.

⁵Tung sura sada baoa nambura mangalap jolmana, ndang jadi borhat ibana tu parporangan, jala ndang jadi dais tu ibana manang aha ulaon rodi, ingkon malua ibana patureture bagasna sataon lelengna, asa marlas ni roha ibana rap dohot jolmana, na binuatna i. [242†] II.

⁶Ndang jadi jaloon bahen singkoram batu pandudaan partoru manang parginjang, ai hira hosa ni halak sandiri jinalona disi bahen singkoram.

⁷Tung sura adong jumpang sada baoa na mamangus sahalak sian angka hahaanggina, sian halak Israel tahe, laos diparhatoban ibana manang digadis, ingkon marutang hosa pamangus sisongon i, asa tung siap bahenonmu hajahaton sian tongatongami. [243†]

⁸Ramoti dirim taringot tu sahit puru, mangaringkoti situtu mangulahon saluhut hombar tu na pinodahon ni angka malim dohot halak Lepi tu hamu; songon na hutonahon i tu nasida, ingkon songon i do ringkotanmuna mangulahon. [244†]

⁹Sai ingot ma na binahen ni Jahowa, Debatam tu si Miryam, di tongan dalan, uju na ruar i hamu sian Misir! [245†]

¹⁰Tung sura dipautang ho donganmu di manang aha, ndang jadi ho masuk tu bagasan jabuna laho manjalo singkoram sian ibana.

¹¹Ingkon tinggal ho jongjong di balian, jala baoa na pinautangmi ruar mandapothon ho, mamboan singkorami tu balian.

¹²Alai tung sura baoa na pogos ibana, ndang jadi ho laho modom rap dohot singkoram nilehonna i.

¹³Ingkon pasuangonmu tu ibana singkorami, disi mate mata ni ari, asa modom ibana marbulusan di bagasan ulosna sandiri, jala pasupasuonna ho, ingkon gabe hatigoranmu do i di adopan ni Jahowa, Debatam. [246†]

¹⁴Ndang jadi rupaonmu anak gajian na mardangoldangol jala na pogos, manang sian hahaanggim manang sian halak dagang na maringan di tanomi, di bagasan sada sian angka hutam. [247†]

¹⁵Ingkon jalojalo ganup ari lehononmu upana, jumolo asa mate ni ari, ala marsiak bagi ibana jala upana i do na pinarbaga ni rohana, unang pola sanga joujou ibana tu Jahowa mangalualuhon ho gabe dosa do i di ho. [248†]

¹⁶Ndang jadi marutang hosa amaama ala angka anakna, angka anak i pe ndang jadi marutang hosa ala amana, ingkon ganup ala dosana sandiri mate. [249†]

¹⁷Ndang jadi papeolonmu uhum tu halak dagang dohot tu dakdanak na sopot so marama, jala ndang jadi buatonmu ulos ni parompuan na mabalu bahen singkoram. [250†]

¹⁸Ingkon paingotingoton ni roham tahe, hatoban do ho na jolo di Misir, hape nunga ditobus Jahowa, Debatam ho sian i, ala ni do umbahen hudokkon ho mangulahon sisongon i. [251†]

¹⁹Tung sura naung sun digotil ho sigotilonmi di haumam, hape lupa ho di sada tibalan tinggal di haumam, ndang jadi ho mulak mangalapsa, ingkon halak dagang, dakdanak na sopot so marama dohot parompuan na mabalu nampunasa, asa pasupasuon ni Jahowa, Debatam ho di saluhut ulaon ni tanganmu. [252†]

²⁰Ia dung suda dijungkiti ho parbue ni hau jetunmu, ndang jadi ulahanmu mandiori angka dangkana; ingkon halak dagang, dakdanak na sopot so marama dohot parompuan na mabalu nama nampunasa.

²¹Ia dung suda ditapu ho parbue ni porlak anggurmu, ndang jadi ulahanmu manjomputi; halak dagang, dakdanak na sopot so marama dohot parompuan na mabalu nama nampunasa.

²²Ingkon paingotingoton ni roham do, hatoban do nang ho na jolo di tano Misir; ala ni do umbahen hudokkon ho mangulahon sisongon i.