Read Batak Toba 5 MUSA 29 Bible Online

5 MUSA 29 - Batak Toba bible

5 MUSA 29

¹I. [1] Dung i dipaluhut si Musa ma sandok Israel jala didok tu nasida: Nunga diida hamu sude naung binahen ni Jahowa di adopan ni matamuna di tano Misir tu si Firaun dohot tu sude naposona dohot tu sandok tanona: [305†]

²Angka pangunjunan bolon, angka naung niida ni matamu, angka tanda dohot halongangan na bolon i!

³Hape laos so dilehon Jahowa dope tu hamu roha na marateatehonsa manang mata na marnidasa, manang pinggol na umbegesa rasirasa sadarion. [306†]

⁴Jala Ahu mangiringiring hamu opatpulu taon lelengna di halongonan, ndang pola buruk ulosmuna di dagingmuna, sipatum pe ndang buruk di patmu. [307†]

⁵Ndang mangan sagusagu hamu jala ndang minum anggur hamu, manang siinumon na horas, asa tung diboto hamu, Ahu do Jahowa, Debatamuna i.

⁶Jadi dung sahat hamu tu inganan on, ruar ma si Sihon, raja di Hesbon dohot si Og, raja di Basan naeng manjumpangkon hita laho marmusu, hape talu do nasida itabahen. [308†]

⁷Laos italaum do tanonasida i, jala italehon do i tu halak Ruben, Gad dohot tu na satonga marga Manasse bahen partalianna. [309†] II.

⁸Antong ringkoti hamu ma hata ni parpadanan on, jala ulahon hamu angka i, asa marsihohot rohamuna di sude siulahononmuna.

⁹Impi do hamu luhutna jongjong sadarion di adopan ni Jahowa, Debatamuna i, angka indukmuna, angka margamuna, angka sintuamuna, angka panuturimuna ro di sandok Israel sadasada.

¹⁰Angka dakdanakmuna, angka jolmamuna, ro di halak dagang na di tongatonga ni parsaroanmu, olat ni halak sitaha sobanmu ro di halak sitahu tapianmu.

¹¹Asa masuk ho tu bagasan parpadanan binahen ni Jahowa, Debatam, dohot tu bagasan parbulanon, na binahen ni Jahowa, Debatam tu ho sadarion.

¹²Asa Ibana pahothon ho sadarion gabe bangsona, jala Ibana gabe Debatam, songon naung pinarbagana i hian tu ho, jala songon naung niuarihonna tu angka ompum, si Abraham, si Isak dohot si Jakkob.

¹³Ai ndada holan tu hamu ahu mambahen parpadanan dohot parbulanon. [310†]

¹⁴Tung tu sude do tahe angka na dison jongjong rap dohot hami di adopan ni Jahowa. Debatanta, dohot tu sude angka na so dison sadarion rap dohot hita.

¹⁵Ai tangkas do diboto hamu na maringan i hita na jolo di tano Misir, jala na itabolusi tongatonga ni bangso parbegu, angka na binolusmuna i.

¹⁶Jadi nunga diida hamu biasbias angka na niulahonnasida i, ro di ajiajiannasida sian hau dohot batu, sian perak dohot sere, angka na pineopnasida i. III.

¹⁷Dibahen i sai unang ma adong di tongatongamuna, nanggo sahalak baoa, manang parompuan, manang halak na saompu manang na samarga, tung marbalik rohana sadarion sian Jahowa, Debatanta i, asa laho mangoloi angka debata ni angka bangso on, asa unang adong di tongatongamuna urat na martumburhon na paet dohot pogu. [311†]

¹⁸Tung sura pe binegena hata ni parbulanon on, lam dipasupasu dope dirina di bagasan rohana, ninna do: Ingkon marhasonangan do ahu nang pe ahu mardalan di hatangkangon ni rohangkon, asa rap mago halak na marlobilobi na uasan.

¹⁹Ndang tagamon olo Jahowa marpangulahi rohana mida ibana, ingkon marpiarpiar situtu ma rimas ni Jahowa dohot pangiburuonna mida baoa sisongon i, jala ingkon manginona tu ibana saluhut torutoru, angka na tarsurat di bagasan buku on, jala siaphonon ni Jahowa goarna sian toru ni langit i. [312†]

²⁰Ingkon papulihon ni Jahowa huhut ibana sian saluhut marga ni Israel mambahen marhinamago, hombar tu saluhut torutoru ni parpadanan angka na tarsurat di bagasan buku patikon.

²¹Pola dohonon ni sundut na soluk, anakmuna i tahe, angka na hehe dung salpu hamu, ro di halak sileban angka na ro sian tano na dao, molo diida nasida torutoru dohot parsahiton, angka na hinonahon ni Jahowa tu tano on.

²²Naung gabe barerang dohot sira naung matutung sandok tanona, tung na so tarsabur be, jala ndang martumbur disi agia aha, jala ndang tubu disi agia aha ingkau rata, suman tahe tu harorongrong ni Sodom, Gumora, Adma dohot Zeboim, angka naung marongrong dibahen Jahowa di bagasan rimasna dohot di bagasan parpiarpiar ni murukna. [313†]

²³Dung i dohonon ni sude angka bangso parbegu ma: Boasa tung songon i ulaning bahenon ni Jahowa tu tano on? Aha do ulaning parbonsiran ni parpiarpiar ni rimas na bolon on

²⁴Jadi dohonon ni halak ma mangalusi: Ala na tinadingkonnasida parpadanan na binahen ni Jahowa, Debata ni ompunasida i, na binahenna tu nasida, uju Ibana manogihon nasida ruar sian tano Misir.

²⁵Hape laho do nasida musengani mangoloi angka debata sileban, huhut marsomba tusi; debata angka na so tinandanasida i, jala na so tinurpukkonna tu nasida.

²⁶Dibahen i marsigorgor ma rimas ni Jahowa mida tano on, gabe manginona tusi saluhut torutoru, angka na tarsurat di bagasan buku on.

²⁷Jadi disiaphon Jahowa ma nasida sian tanonasida i di bagasan murukna dohot di bagasan parpiarpiar ni rimasna na godang i, jala diambolongkon nasida tu tano na asing, songon na andar sadarion.

²⁸Angka hahomion na buni, Jahowa Debatanta do nampunasa, alai anggo pangungkapon angka na pinapatarna i, hita do nampunasa, nang angka anakkonta ro di salelenglelengna, laho mangulahon sude hata ni patikon. [314†]