Read Batak Toba JOHANNES 1 Bible Online

JOHANNES 1 - Batak Toba bible

JOHANNES 1

¹I. [1] Di mulana i nunga adong Hata i, jala saor tu Debata do Hata i, jala Debata do Hata i. [1†]

²I ma na saor tu Debata di mulana i. [2†]

³Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian I. [3†]

⁴Di bagasan Hata i do hangoluan; laos hangoluan i do Panondang ni hajolmaon. [4†]

⁵Na marsinondang do Panondang i di bagasan na holom, alai ndang dijangkon na holom i. [5†]

⁶Hehe do sada halak sinuru ni Debata, si Johannes do goarna. [6†]

⁷Sitindangi do ibana, umbahen na ro, asa dihatindangkon Panondang i, anggiat gabe porsea saluhutna marhite sian Ibana.

⁸Ndang apala ibana Panondang i; na mangkatindangkon Panondang i do tahe. [7†]

⁹Alai nunga mandok ro uju i tu portibi on Panondang na sintong i, na manondangi nasa jolma.

¹⁰Di portibi on hian do Ibana, jala marhite sian Ibana do manjadi portibi on; hape ndang ditanda portibi on Ibana. [8†]

¹¹Na ro do Ibana manopot na di Ibana hian, gabe ndang dijangkon angka na di ibana i Ibana.

¹²Alai manang piga na manjangkon Ibana, tusi do dilehon huaso, asa gabe anak ni Debata nasida, angka na porsea di Goarna. [9†]

¹³I ma angka na so tubu sian mudar, manang sian sangkap ni daging, manang sian sangkap ni baoa, tung sian Debata do. [10†]

¹⁴Gabe daging ma Hata i jala maringan di tongatonga ni hita on, jadi huida hami ma hasangaponna, i ma hasangapon ni Anak sasada na sian Ama i, gok asi ni roha dohot hasintongan. [11†]

¹⁵Dihatindangkon si Johannes do Ibana, ai ninna ma: On do Ibana na hudok i, na ro sian pudingku; jumolo do Ibana adong asa ahu, ai parjolo hian do Ibana. [12†]

¹⁶Ai sian hamoraonna do saluhut hita manjalo, i ma asi ni roha na so marnamontok. [13†]

¹⁷Ai marhite sian si Musa do dilehon anggo patik i; alai hinorhon ni Jesus Kristus do manjadi asi ni roha dohot hasintongan. [14†]

¹⁸Ndang dung adong na marnida Debata; Anak na sasada i, na di ampuan ni Ama i, Ibana do mamaritahonsa. [15†] II.

¹⁹Disuru angka Jahudi sian huta Jerusalem ma angka malim dohot halak Lepi manungkun si Johannes: Ai ise do ho?, gabe on ma dihatindangkon:

²⁰Ai diparhatopot do, ndang diporso, didok do: Ndang ahu Kristus i. [16†]

²¹Gabe disungkun nasida ma ibana: Antong ise do ho? Si Elia do ulaning? Jadi didok ma: Ndang i ahu! Panurirang i do ho? Dung i dialusi ma: Ndang! [17†]

²²Dung i ninna nasida ma mandok ibana: Antong, ise do ho?, asa haalusan hami angka na marsuru hami. Aha do dohononmu taringot tu ho?

²³Dung i ninna ma: Soara ni na manjoujou di halongonan do ahu: Patigor hamu ma dalan ni Tuhan! songon naung nidok ni panurirang Jesaya. [18†]

²⁴Sian Parise do angka na sinuru i.

²⁵Jadi didok nasida ma manungkun ibana: Boasa mandidihon ho, so manang Kristus ho, manang si Elia, manang panurirang i?

²⁶Gabe didok si Johannes ma mangalusi nasida: Ia ahu aek do hudidihon; alai nunga jongjong di tongatongamuna Ibana, na so tinandamuna i. [19†]

²⁷Ibana do i na ro sian pudingku; na hurang tama do ahu mangkarhari tali ni sipatuna. [20†]

²⁸Di Betania do i masa, di ipar ni aek Jordan, ai disi do mandidihon si Johannes.

²⁹Torang ni arina i diida si Johannes ma Jesus ro tusi, jadi didok ma: On do Birubiru ni Debata, na mamorsan dosa ni portibi on! [21†]

³⁰Ibana do na hudok i: Sian pudingku ro sada halak, naung jumolo adong asa ahu; ai parjolo hian do Ibana. [22†]

³¹Ahu pe, ndang hutanda Ibana; alai asa tandap Ibana di halak Israel, umbahen na ro ahu mandidihon aek.

³²Dung i dihatindangkon si Johannes ma, ninna ma: Huida do Tondi i tuat songon darapati sian banua ginjang i jala mian di Ibana! [23†]

³³Ahu pe, ndang hutanda Ibana jolo. Alai Ibana na marsuru ahu mandidihon aek, I do mandok tu ahu: Ia tusi diida ho tuat Tondi i jala mian di Ibana, Ibana do sididihon Tondi Parbadia. [24†]

³⁴Asa nunga huida jala huhajongjongkon: Ibana do Anak ni Debata. III.

³⁵Marsogotna i jongjong muse si Johannes disi dohot siseanna dua halak.

³⁶Jadi di na niidana i Jesus mamolus, ninna ma: On do Birubiru ni Debata! [25†]

³⁷Jadi dibege siseanna na dua i ma hatana, gabe diihuthon ma Jesus.

³⁸Dung i humusor ma Jesus, diida ma nasida na mangihuthon Ibana, jadi ninna ma mandok nasida: Aha do na niluluanmuna? Jadi didok nasida ma mandok Ibana: Rabbi (na mandok: Guru) didia do Ho sorang?

³⁹Jadi didok ma mandok nasida: Ro ma hamu, asa diida hamu! Dung i ro ma nasida, diida ma parmiananna; laos rap ma nasida dohot Ibana sadarina i. Tar di pungkul opat ma i.

⁴⁰Si Andreas, dongan saama ni si Simon Petrus, do na sada sian na dua i, na umbege hata ni si Johannes dohot mangihuthon Ibana.

⁴¹Dung i pajumpang ma ibana jumolo dohot si Simon, donganna saama, jadi didok ma mandok ibana: Nunga jumpang hami Messias i (astuanna: Kristus)! [26†]

⁴²Laos ditogihon ma ibana tu Jesus. Alai dibereng Jesus ma ibana huhut ma didok: Si Simon, anak ni si Jonas do ho; si Kepas ma ho goaron (astuanna: Batu mamak, Petrus)! [27†]

⁴³Torang ni arina i, di na naeng laho Ibana tu Galilea, jumpangsa ma si Pilippus, dung i didok Jesus ma mandok ibana: Ihuthon ma Ahu!

⁴⁴Alai sian Betsaida do si Pilippus, i ma huta ni si Andreas dohot si Petrus.

⁴⁵Dapot si Pilippus ma si Natanael, jadi didok ma mandok ibana: Nunga jumpang hami Ibana, na nidok ni si Musa di surat patik i jala na pinaboa ni angka panurirang; i ma Jesus, anak ni si Josep, na sian huta Nasaret. [28†]

⁴⁶Dung i didok si Natanael ma mandok ibana: Tung tarbahen ma ro na denggan sian huta Nasaret? Jadi didok si Pilippus ma: Ro ma ho marnida! [29†]

⁴⁷Diida Jesus ma si Natanael ro manopot Ibana, jadi didok ma taringot tu ibana: On ma sada halak Israel na tutu, na so marpangansi di bagasan!

⁴⁸Ninna si Natanael ma mandok Ibana: Sian dia ditanda Ho ahu? Dung i dialusi Jesus ma ibana: Huida do ho, uju ditoru ni hau ara i ho, andorang so dijou si Pilippus i dope ho.

⁴⁹Dung i ninna si Natanael ma mangalusi Ibana: Gurunami, Ho do Anak ni Debata! Ho do raja ni halak Israel! [30†]

⁵⁰Dung i ninna Jesus ma mangalusi ibana: Ala hudok tu ho: Huida ho di toru ni hau ara i, umbahen na porsea ho? Idaonmu dope na sumurung sian i!

⁵¹Laos ninna ma: Na tutu situtu do na hudok on tu hamu: Idaonmuna do mungkap banua ginjang jala manaek mijur angka surusuruan ni Debata tumopot Anak ni jolma i. [31†]