Read Batak Toba JOHANNES 11 Bible Online

JOHANNES 11 - Batak Toba bible

JOHANNES 11

¹I. [1] Marsahit ma halak si Lasarus na sian Betania, i ma huta na niinganan ni si Maria dohot si Marta, hahana i. [233†]

²I ma si Maria na mamiahi Tuhan i jala mangapusi patna dohot obuknasida; iboto ni i do si Lasarus na marsahit i. [234†]

³Jadi disuru angka ibotona i ma na mandok tu Ibana: O Tuhan, na marsahit do hinaholongan ni roham!

⁴Umbege i Jesus, ninna ma: Nda tung hamatean ujung ni sahit i, alai bahen hasangapon ni Debata do i, asa marsangap Anak ni Debata marhite sian i. [235†]

⁵Alai holong do roha ni Jesus di si Marta dohot di anggina i, nang di si Lasarus i.

⁶Asa dung dibege naung marsahit ibana, mangulon dope Ibana dua ari nari di ingananna i.

⁷Dung salpu i, ninna ma mandok angka siseanna: Beta ma hita mulak tu Judea!

⁸Dung i ninna angka siseanna ma mandok Ibana: Gurunami, apala nambura dope ditahi angka Jahudi mandangguri Ho, ulahanmu muse tusi? [236†]

⁹Jadi dialusi Jesus ma: Nda sampuludua jom na sadari? Ndang na olo tartuktuk na mardalan arian, ai diida do panondang ni portibi on. [237†]

¹⁰Alai na mardalan borngin i, tartuktuk ma anggo i, ai ndang di bagasan ibana panondang i. [238†]

¹¹I ma didok. Dung i ninna ma tu nasida: Nunga modom si Lasarus, alealenta i; alai na laho ma Ahu tusi manungguli ibana. [239†]

¹²Dung i didok angka siseanna ma tu Ibana: Ale Tuhan, molo na modom ibana, na laho mangolu ma.

¹³Hamamatena do nian na nidok ni Jesus disi; alai dirimpu nasida, parmodomon hian do na nidokna i.

¹⁴Disi pe asa tullom didok tu nasida: Nunga mate si Lasarus!

¹⁵Ala ni hamu do umbahen na las rohangku, so disi Ahu, asa porsea hamu; alai borhat ma hita manopot ibana!

¹⁶Dung i didok si Tomas, na margoar si Linduat, ma mandok angka donganna sisean: Antong, borhat ma hita, asa rap mate hita dohot Ibana!

¹⁷Jadi dung sahat Jesus ro disi nunga pola opat ari di bagasan tanoman ibana didapot.

¹⁸Alai anggo huta Betania, na jonok do i tu Jerusalem, tar dua batu daona.

¹⁹Torop do Jahudi naung ro manopot si Marta dohot si Maria, mangapul nasida siala ibotonasida i.

²⁰Jadi dung dibege si Marta, naung ro Jesus, laho ma ibana manomunomu; na tinggal di bagas do anggo si Maria.

²¹Dung i ninna si Marta ma mandok Jesus: Aut na dison Ho, ale Tuhan, ndang tagamon mate ibotongki!

²²Alai nuaeng pe, tong do huboto, lehonon ni Debata do tu Ho nasa sipangidoonmu tu Ibana.

²³Gabe didok Jesus ma tu ibana: Na hehe ma ibotom!

²⁴Jadi didok si Marta ma tu Jesus: Olo, huboto do, na hehe do ibana di haheheon i, na di ari parpudi. [240†]

²⁵Dung i ninna Jesus ma mandok ibana: Ahu do haheheon dohot hangoluan; na mangolu do na porsea di Ahu, nang pe mate ibana!

²⁶Jala ganup na mangolu jala na porsea di Ahu, na so tupa mate ibana salelenglelengna! Porsea do ho disi? [241†]

²⁷Dung i didok ma tu Ibana: Olo, Tuhan, na porsea do ahu: Ho do Kristus, Anak ni Debata, na naeng ro tu portibi on. [242†]

²⁸Jadi dung didok songon i, laho ma ibana manjou si Maria anggina i, dihusiphon ma, mandok: Nunga ro Guru i, dijou do ho!

²⁹Umbege i si Maria, hapogan ma ibana hehe mandapothon Ibana.

³⁰Ai ndang dope sahat ro di huta i Jesus, mangulon di inganan hajumpanganna dohot si Marta i dope Ibana. [243†]

³¹Ia angka Jahudi i, donganna di jabu i, angka naung ro mangapul nasida, dung diida hapogan si Maria hehe laho tu balian, diihuthon ma ibana; ai dirimpu, laho tu tanoman do ibana tumatangis.

³²Asa sahat ma si Maria tu pangulonan ni Jesus; jala disi diida Ibana, dipatungkap ma ibana tu jolona, huhut mandok: Aut na dison Ho, ale Tuhan, ndang tagamon mate ibotongki!

³³Jadi dung diida Jesus tumatangis si Maria ro di Jahudi na ro i, angka na tumatangis i, tarrimas ma rohana huhut bonsa. [244†]

³⁴Dung i ninna ma: Tudia do dipeakkon hamu ibana? Jadi didok nasida ma: Ro ma Ho marnida, Tuhan!

³⁵Dung i tariluilu ma mata ni Jesus. [245†]

³⁶Dung didok angka Jahudi i ma: Ndi! Holong ni rohana i di ibana!

³⁷Alai deba sian nasida mandok: Mata ni na mapitung diungkap Ibana do; ndang hasundatan Ibana huroha halak on, unang mate?

³⁸Gabe tarrimas muse ma roha ni Jesus, di na sahat Ibana tu tanoman i. Liang batu do i, laos batu do langkopna. [246†]

³⁹Dung i ninna Jesus ma: Hindati hamu ma batu i! Gabe ninna si Marta, iboto ni naung monding i, ma: Nunga sanga bau, Tuhan, ai nunga pola opat ari.

⁴⁰Dung i ninna Jesus ma mandok ibana: Nda hudok tu ho: Idaonmu do hasangapon ni Debata, molo na porsea ho? [247†]

⁴¹Jadi dihindat nasida ma batu i; dung i manaili ma Jesus dompak ginjang, didok ma: Ale Amang, mauliate ma hudok tu Ho, ala ditangihon Ho Ahu.

⁴²Huboto do nian, na tongtong do ditangihon Ho Ahu; alai ala ni natorop on, na jongjong humaliang, umbahen hudok songon i, asa porsea nasida, naung sinurumi do Ahu. [248†]

⁴³Jadi dung didok songon i, dipagogo ma soarana manjouhon: O Lasarus, ruar ma ho!

⁴⁴Dung i ruar ma tutu na mate i; lilit dope saput i tu patna dohot tu tanganna, jala alit sekka i tu bohina. Jadi didok Jesus ma: Harhari hamu i, asa mardalan ibana.

⁴⁵Jadi torop ma sian angka Jahudi, naung ro tu si Maria, gabe porsea di Ibana, dung diida nasida na pinatupana i. II.

⁴⁶Alai deba sian nasida laho manopot angka Parise, mamaritahon na binahen ni Jesus.

⁴⁷Dung i dipansang angka sintua ni malim i dohot angka Parise ma rapot godang, didok nasida ma: Aha ma bahenonta? Ai lan do tanda dibahen Halak i!

⁴⁸Molo itapasombu Ibana, porsea ma halak saluhutna di Ibana, gabe ro ma halak Rom maon mangarampas tanonta dohot bangsonta. [249†]

⁴⁹Alai hehe ma sada sian nasida, i ma si Kayapas, sintua ni malim di na sataon i, didok ma tu nasida: Na hurang roha do hamu!

⁵⁰Ndang dipingkiri rohamuna, dengganan do mate sada halak humongkop natorop i, unang laho mago sandok bangso i. [250†]

⁵¹Alai ndang sian rohana sandiri dihatahon i; ala sintua ni malim ibana di na sataon i, umbahen na disurirangkon, na naeng mate ma Jesus humongkop bangso i. [251†]

⁵²Alai tahe, ndada holan laho mangkongkop bangso i; alai naeng papunguonna angka anak ni Debata, angka na marserak dope, laho pasadahonsa. [252†]

⁵³Asa olat ni na sadari i martuptup i ma nasida laho mamusa Ibana.

⁵⁴Jadi ndang be mardalani Jesus di na patar di tongatonga ni halak Jahudi; na sumurut do Ibana sian i tu sada luat mardonokkon halongonan, tu huta na margoar Epraim. Jadi disi ma Ibana mian rap dohot angka siseanna.

⁵⁵Alai jonok nama Paska ni Jahudi, jadi torop ma halak laho sian luat i nangkok tu Jerusalem, manguras dirina, patujolo ni Paska i. [253†]

⁵⁶Jadi dilului nasida ma Jesus, angka jongjong ma nasida di bagas joro i masipandohan: Beha di rohamuna, na so ro do Ibana ulaning tu pesta i?

⁵⁷Alai nunga dipatikkon angka sintua ni malim dohot angka Parise: Manang ise na umboto inganan ni Jesus, ingkon dipabotohon, asa dapot tangkuponnasida Ibana.