Read Batak Toba JOHANNES 12 Bible Online

JOHANNES 12 - Batak Toba bible

JOHANNES 12

¹I. [1] Dung i onom ari nari asa dapot pesta Paska i, sahat ma Jesus tu huta Betania, na niinganan ni si Lasarus, na sinunggul ni Jesus sian na mate. [254†]

²Jadi dipauli nasida ma disi panganon ujuan di Ibana; si Marta do marhobasi, si Lasarus ma sada donganna mangan disi.

³Gabe dibuat si Maria ma sahat i miak Nardus na arga na so marsaor, dimiahi ma pat ni Jesus, obukna ma dibahen mangalapu. Jadi digohi uap ni miak i ma bagas i. [255†]

⁴Jadi sada sian angka siseanna, si Judas Iskariot na naeng manjehehon Ibana, mandok:

⁵Boasa so ginadis miak i arga tolu ratus hupang, bahen silehonlehon nian di angka na pogos?

⁶Alai ndada na pogos sinarihonna, umbahen na didok songon i; panangko do ibana tahe, diusung do asiasi ni halak, ai tu ibana dipasahat puro i. [256†]

⁷Dung i ninna Jesus ma: Pasombu ma ibana, ai diparade do i hira tu ari hatatanomhi.

⁸Ai tongtong do adong na pogos di tongatongamuna, alai anggo Ahu ndang tongtong di lambungmuna. [257†]

⁹Dung i diboto torop sian halak Jahudi ma, naung disi Ibana, jadi ro ma tusi, ndada ala ni Jesus sambing; naeng idaonnasida do huhut si Lasarus, naung pinahehena i sian na mate.

¹⁰Alai nunga ditahi angka sintua ni malim i, naeng bunuonnasida nang si Lasarus.

¹¹Ai ala ibana do umbahen torop Jahudi laho tusi jala porsea di Jesus. II.

¹²Dung i torang ni arina i dibege halak natorop na ro tu pesta i, na naeng ro ma Jesus tu Jerusalem.

¹³Jadi dibuat nasida ma angka maremare, laho manomunomu Ibana huhut dijoujouhon: Hosianna! Pinanasupasu ma na ro marhite Goar ni Tuhan i, Raja ni Israel! [258†]

¹⁴Dung i dapot Jesus ma halode sada, i ma dihunduli, hombar tu na tarsurat: [259†]

¹⁵“Unang ho mabiar, boru Sion; ida ma, Rajam do na ro, marsihundul di anak ni halode!”

¹⁶Alai ndang diantusi angka siseanna i hian; dung pe marsangap Jesus, asa diingot nasida, naung marhahonaan tu Ibana do hape na tarsurat i ro di pambahenannasida tu Ibana.

¹⁷Laos dihatindangkon natorop, angka na mandongani Ibana do, paboa naung jinouna i si Lasarus sian tanoman, laho manungguli ibana sian na mate.

¹⁸Jadi ala naung dibege natorop i barita ni tanda na binahenna i, umbahen na ditomu nasida Ibana.

¹⁹Jadi didok angka Parise ma sama nasida: Diida hamu do, na so marniula na binahenmu, ai liat portibi on do paihutihut Ibana. [260†] III.

²⁰Alai adong ma deba halak Junani, dongan ni angka na nangkok i, laho martangiang di ari raya i.

²¹Jadi didapothon nasida ma si Pilippus na sian Betsaida na di Galilea, mangelehelek ibana, ninna ma: Tuannami, naeng do idaonnami Jesus! [261†]

²²Dung i ro ma si Pilippus, dipaboa ma i tu si Andreas; dung i ro ma si Andreas rap dohot si Pilippus paboahonsa tu Jesus.

²³Gabe didok Jesus ma mangalusi nasida: Naung dapot ma tingkina, asa marsangap Anak ni jolma i!

²⁴Na tutu situtu do na hudok on tu hamu: Ndang na ganda eme i, molo so madabu tu tano jala mate; dung pe mate, asa godang parbuena. [262†]

²⁵Agoan hosa ma na marhamaolhon hosana; alai na mangkasogohon hosana di portibi on, i do na mangaramotisa sahat tu hangoluan salelenglelengna. [263†]

²⁶Ahu ma diihuthon ganup na olo mangoloi Ahu; jala ia disi Ahu, disi ma dohot anak somangku. Pasangapon ni Ama i do ganup na mangoloi Ahu. [264†]

²⁷Na bonsa do rohangku nuaeng; aha ma dohononku? Palua ma Ahu, Amang, sian tingki on? Alai tahe, ala ni i do umbahen na sahat tingki on tu Ahu. [265†]

²⁸Pasangap ma Goarmi, Amang! Dung i ro ma soara sian banua ginjang, mandok: Nunga hupasangap, laos pasangaponku do muse!

²⁹Jadi dung dibege, natorop i na jongjong disi, ninna nasida ma: Ronggur do i. Angka na asing mandok: Adong do surusuruan ni Debata na mangkatai dohot Ibana.

³⁰Dung i ninna Jesus ma mangalusi nasida: Ndada ala ni Ahu, umbahen na ro soara ondeng; ala ni hamu do! [266†]

³¹Nuaeng ma jumpang tingkina, asa diuhum portibi on; sipabalion ma nuaeng raja ni portibi on. [267†]

³²Anggo Ahu, dung dipatimbo Ahu sian tano on, taitonku do saluhut nasida tu Ahu! [268†]

³³Pangalaho ni parmatena do dipatuduhon marhitehite hatana ondeng.

³⁴Asa dialusi natorop i ma Ibana: Hubege hami di surat ni patik i, na mian do Kristus i ro di salelenglelengna; boasa dohononmu: Ingkon sipatimboon do Anak ni jolma i? Ise do Anak ni jolma i, na nidokmi? [269†]

³⁵Dung i didok Jesus ma tu nasida: Satongkin nari nama Panondang i di hamu. Mardalan ma hamu, binsan di hamu dope Panondang i, asa unang ditahopi na holom i hamu. Ianggo na mardalan di na holom, ndang diboto i, manang dompak dia ibana laho. [270†]

³⁶Binsan di hamu dope Panondang i, porsea ma hamu disi, asa gabe anak ni Panondang i hamu! I ma dihatahon Jesus; dung i ditadingkon ma nasida laho martabuni. [271†] IV.

³⁷Alai atik pe dipatupa Ibana angka tanda na sai godang i di jolonasida, ndang porsea nasida di Ibana.

³⁸Asa sintong jumpang hata ni panurirang Jesaya na nidokna i: “Iale Tuhan, tung ise ma na porsea di jamitanami; jala tangan ni Tuhan i, di ise ma i torang tarida?” [272†]

³⁹Dibahen i ndang tarbahen nasida porsea; ai on do didok Jesaya muse: [273†]

⁴⁰“Nunga dipapitung Ibana matanasida, jala nunga dipatangkang rohanasida, asa unang marnida simalolongnasida jala unang mangantusi rohanasida, unang mulak nasida, unang malum nasida hubahen!” [274†]

⁴¹Songon i ma didok Jesaya, ala diida hasangaponna i jala dihatahon taringot tu Ibana. [275†]

⁴²Nang sian angka partogi pe, adong do nian na nia na gabe porsea di Ibana; alai ndang diparhatopot nasida i ala ni angka Parise, asa unang bali nasida sian huria. [276†]

⁴³Ai holongan do rohanasida di hasangapon ni jolma, asa di hasangapon ni Debata. [277†]

⁴⁴Dung i joujou ma Jesus, ninna ma: Na porsea di Ahu, ndada Ahu na hinaporseaanna; na marsuru Ahu do dihaporseai disi.

⁴⁵Na marnida Ahu, marnida na marsuru Ahu do. [278†]

⁴⁶Ahu do Panondang na ro tu portibi on, asa unang mian di na holom nasa na porsea di Ahu. [279†]

⁴⁷Asa molo adong na umbege hatangku, gabe ndang diradoti, ndada Ahu manguhum ibana; ai ndada laho manguhum portibi on, na laho paluahon portibi on do, umbahen na ro Ahu. [280†]

⁴⁸Na mambolongkon Ahu jala na so manjalo hatangku, nunga adong na manguhum i; hata na huhatahon, i do manguhum ibana di ari parpudi.

⁴⁹Ai ndang sian roharohangku Ahu marjamita; diaturhon Ama i na marsuru Ahu do sidohononku dohot sihatahononku.

⁵⁰Jala huboto, hangoluan na salelenglelengna do podana i. Asa di sude hatangki, ia i pandok ni Ama i tu Ahu, i do huhatahon.