Read Batak Toba JOHANNES 13 Bible Online

JOHANNES 13 - Batak Toba bible

JOHANNES 13

¹I. [1] Mandapothon pesta Paska i, nunga diboto Jesus, naung ro tingkina manadingkon portibi on, laho mandapothon Ama i; gabe songon pangkaholongina di angka na di Ibana na di portibi on, laos songon i do dihaholongi nasida ro di ujungna.

²Di na mangan i nasida, nunga disuanhon sibolis i parjeheon tubagasan roha ni si Judas Iskariot, anak ni si Simon. [281†]

³Jala diboto Jesus do, naung dipasahat Ama i saluhutna tu tanganna jala Ibana na ro sian Debata laho mulak ma tu Debata. [282†]

⁴Gabe hehe ma Ibana sian na mangan i, ditanggal ma ulosna, dibuat ma basahan, ditapolhon tu Ibana.

⁵Diusehon ma aek tu sambong, dung i diburi ma pat ni angka siseanna, diapusi ma dohot basahan na tinapolhonna i.

⁶Dung i sahat ma Ibana tu si Simon Petrus, jadi didok i ma mandok Ibana: Tung Ho ma, ale Tuhan, mamburi pathu?

⁷Dung i ninna Jesus ma mangalusi ibana: Ndang diantusi ho pambahenankon na tu ho anggo nuaeng; muse pe botoonmu i.

⁸Dung i didok si Petrus ma tu Ibana: Matua tano on ndang burionmu pathu! Dung i ninna Jesus ma mangalusi ibana: Molo so burionku ho, ndang partohap ho di Ahu!

⁹Dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku!

¹⁰Gabe didok Jesus ma tu ibana: Halak naung maridi i, ndengkon be burion, ai nunga sude ibana ias. Naung ias do anggo hamu, alai ndang luhut hamu. [283†]

¹¹Ai ditanda do sipasahat Ibana, umbahen na didok: Ndang saluhut hamu ias! [284†]

¹²Asa dung diburi Jesus patnasida dipangke ma muse ulosna, hundul ma Ibana, didok ma tu nasida: Ai diantusi hamu do pambahenanki tu hamu?

¹³Digoar hamu do Ahu Guru jala Tuhan, jadi ture do pandokmuna disi; ai i do Ahu tutu. [285†]

¹⁴Asa molo Ahu, Tuhan jala Gurumuna, mamburi patmuna, tama ma nang hamu masiburian pat! [286†]

¹⁵Ai sitiruon do hulehon tu hamu, asa dibahen hamu songon naung hubahen i tu hamu! [287†]

¹⁶Na tutu situtu do na hudok on tu hamu: Ndang umbalga anak somang sian indukna, ndang sumurung suruan sian na marsuru ibana. [288†]

¹⁷Molo diboto hamu i, martua ma hamu mangulahonsa! [289†]

¹⁸Ndada tu saluhut hamu hatangki; na hutanda do angka na hutodo i. Alai naeng ma jumpang na nidok ni Surat i: “Donganku sapanganan, i do manjungkangkon patna dompak Ahu!” [290†]

¹⁹Hupaboa i hian tu hamu, andorang so songgop dope; asa ia dung saut, gabe porsea hamu: Ahu do na nidok ni hata i.

²⁰Na tutu situtu do na hudok on tu hamu: Na manjangkon na husuru, Ahu do jinangkonna disi; alai nasa na manjangkon Ahu, manjangkon na marsuru Ahu do! [291†] II.

²¹Asa dung didok Jesus hata ondeng, bonsa ma rohana, dung i dihatindangkon ma, ninna ma: Na tutu situtu do na hudok on tu hamu: Sahalak sian hamu na pasahathon Ahu! [292†]

²²Dung i masiberengan ma angka sisean i, jut ma rohanasida, manang ise na nidokna disi.

²³Alai adong ma sada sian angka siseanna i, na hundul jumonok tu Ibana, haholongan ni Jesus i. [293†]

²⁴I ma dihilap si Petrus jadi ninna ma mandok ibana: Sungkun ma, ise i na nidokna i!

²⁵Jadi dipadonok ma tu lambung ni Jesus mandok tu Ibana: Tuhan, ise i?

²⁶Gabe dialusi Jesus ma: Ia tusi hulehon na santapik na husornophon on, i ma ibana! Jadi disornophon ma santapik, dilehon ma tu si Judas Iskariot anak ni si Simon.

²⁷Jadi dung dibondut i, dibongoti sibolis i ma ibana. Dung i didok Jesus ma tu ibana: Humatop ma ula siulaonmi! [294†]

²⁸Alai ndang adong manang ise sian nasida na mangan i, na umboto astuan ni na nidokna i.

²⁹Ai ala di ibana puro i, gabe dirimpu na deba, didokkon Jesus ibana manuhor na hasea tu pesta i, manang marsilua tu na pogos. [295†]

³⁰Asa dung dijalo si Judas na santapik i, pintor laho do ibana tu balian; alai borngin ma uju i! III.

³¹Jadi dung laho ruar ibana, didok Jesus ma: Na marsangap ma nuaeng Anak ni jolma i, jala marsangap Debata di bagasan Ibana.

³²Molo marsangap Debata di bagasan Ibana, pasangapon ni Debata ma Ibana di bagasan dirina, jala tibu ma pasangaponna Ibana. [296†]

³³Hamu angka anaha, sangombas nari nama Ahu rap dohot hamu; luluanmuna ma Ahu; alai songon naung hudok tu angka Jahudi: Ndang tarbahen hamu ro tu sitopotonki, laos i do hudok nuaeng tu hamu. [297†]

³⁴Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan. [298†]

³⁵Apala sian on ma tandaon ni halak saluhutna, hamu siseanku: Molo masihaholongan hamu. IV.

³⁶Dung i ninna si Simon Petrus ma mandok Ibana: Tuhan, tudia ma Ho laho? Jadi ninna Jesus ma mangalusi: Ndang tarihuthon ho dope Ahu tu sitopotonki, anggo nuaeng; muse pe asa ihuthononmu Ahu! [299†]

³⁷Gabe ninna si Petrus ma mandok Ibana: Tuhan, boasa so tarihuthon ahu Ho nuaeng? Hosangku do lehononku humongkop Ho!

³⁸Dung i ninna Jesus ma mangalusi ibana: Hosam lehononmu humongkop Ahu? Na tutu situtu do na hudok on tu ho: Ndang dope martahuak manuk, nunga sanga tolu hali disoadahon ho Ahu!