Read Batak Toba JOHANNES 14 Bible Online

JOHANNES 14 - Batak Toba bible

JOHANNES 14

¹I. [1] Unang ma bonsa rohamuna! Porsea ma hamu di Debata, jala porsea ma hamu di Ahu!

²Torop do inganan di bagas ni Damang. Aut so i, dohononku ma tu hamu: Na laho do Ahu mangarade inganan di hamu?

³Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu! [300†]

⁴Jala diboto hamu do dalan tu inganan sitopotonki.

⁵Dung i ninna si Tomas ma mandok Ibana: Ndang huboto hami, manang tudia Ho laho, Tuhan: Jala sian dia ma botoonnami dalan i?

⁶Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu. [301†]

⁷Anggo ditanda hamu Ahu, tandaonmuna do nang Damang i. Olat ni on ma ditanda hamu Ibana jala diida hamu Ibana.

⁸Gabe didok si Pilippus ma tu Ibana: Patuduhon tu hami Ama i, ale Tuhan, asa sombu rohanami!

⁹Jadi didok Jesus ma: Nunga pola na sai leleng Ahu rap dohot hamu, laos so ditanda ho dope Ahu, ale Pilippus. Na marnida Ahu, marnida Ama i do; boasa ma dohononmu: Patuduhon tu hami Ama i? [302†]

¹⁰Ndang porsea ho, Ahu di bagasan Ama i jala Ama i di bagasan Ahu? Apala sian roharohangku huhatahon hata angka na hudok tu hamu. Ama i na maringanan di bagasan Ahu, i do patulus angka ulaonna i. [303†]

¹¹Porsea ma hamu di Ahu: Di bagasan Ama i do Ahu jala di bagasan Ahu do Ama i; molo so i, ala ni angka ulaon i ma hamu porsea! [304†]

¹²Na tutu situtu do na hudok on tu hamu; Patupaon ni na porsea di Ahu do songon angka ulaon na huula i; na sumurung sian i dope patupaonna tahe, ai na laho ma Ahu tu Damang. [305†]

¹³Asa manang aha pangidoanmuna marhitehite Goarhu, patupaonku do, asa marsangap Ama i di bagasan Anak i! [306†]

¹⁴Molo dipangido hamu manang aha sian Ahu marhitehite Goarhu, patupaonku ma i! [307†]

¹⁵Molo na holong rohamuna di Ahu, radotanmuna do angka patikku. [308†] II.

¹⁶Jala pangidoonku ma tu Ama i, asa dilehon tu hamu sada Pangondian na asing, asa I mandongani hamu salelengna i. [309†]

¹⁷I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana. [310†]

¹⁸Ndang tadingkononku hamu so marama; na ro ma Ahu mandapothon hamu.

¹⁹Saotik nari nama, jadi ndang be idaon ni portibi on Ahu, alai idaonmuna do Ahu; ai na mangolu do Ahu, hamu pe mangolu do! [311†]

²⁰Di na sadari i ma botoonmuna, Ahu di bagasan Damang jala hamu di bagasan Ahu jala Ahu di bagasan hamu. [312†]

²¹Manang ise na maniop angka patikki jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ahu tu ibana. [313†]

²²Jadi didok si Judas ma (ndada si Iskariot i): Dia do alana, Tuhan, umbahen na holan tu hami papataronmu dirim, ndada tu portibi on?

²³Dung i ninna Jesus ma mangalusi ibana: Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana. [314†]

²⁴Na so holong roha di Ahu, ndang radotan ni i hatangku. Ndang Ahu nampuna hata na binegemuna i, Ama i na marsuru Ahu do! [315†] III.

²⁵I ma huhatahon tu hamu, tagan rap dope Ahu dohot hamu.

²⁶Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu! [316†]

²⁷Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna! [317†]

²⁸Nunga dibege hamu hatangku: Na laho ma Ahu, jala na ro do Ahu muse manopot hamu. Aut na holong rohamuna mida Ahu, las ma rohamuna, ala laho Ahu manopot Ama i; ai umbalga do Damang asa Ahu. [318†]

²⁹Asa nunga hupaboa i hian tu hamu, andorang so jumpang dope, asa porsea hamu, dung songgop.

³⁰Ndang haru godang be hatahononku tu hamu, ai na ro ma raja ni portibi on; ndang adong dihana i nian di Ahu. [319†]

³¹Alai naeng ma botoon ni portibi on, na holong do rohangku di Ama i jala sipasaut pandok ni Ama i do Ahu. Onpe, hehe ma hamu, laho ma hita sian on! [320†]