Read Batak Toba JOHANNES 15 Bible Online

JOHANNES 15 - Batak Toba bible

JOHANNES 15

¹I. [1] Ahu do hau anggur na tutu; Damang do tukang porlak i.

²Digotap do nasa rantingku na so marparbue, jala dipaias do nasa na marparbue, asa ganda parbuena i.

³Nunga ias hamu binahen ni hata i na huhatahon tu hamu.

⁴Sai mian di bagasan Ahu ma hamu, songon Ahu di bagasan hamu! Songon ranting i, na so tarbahen marparbue anggo sian dirina, anggo so mian di hau anggur i; laos songon i hamu, anggo so mian di bagasan Ahu hamu.

⁵Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu. [321†]

⁶Nasa na so mian di bagasan Ahu, dibolongkon do i songon ranting, na gabe masak; dung i dipalungguk, didanggurhon ma i tu api, jadi gor ma.

⁷Molo mian hamu di bagasan Ahu, jala molo mian hatangki di bagasan hamu, jumpang hamu do manang dia pe dipangido rohamuna. [322†]

⁸Marsangap ma Damang, molo marparbuehon na godang hamu jala gabe angka siseanku hamu.

⁹Songon holong ni roha ni Damang di Ahu, songon i do holong ni rohangku di hamu. Mian ma hamu di bagasan holong ni rohangki! II.

¹⁰Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana. [323†]

¹¹Umbahen na huhatahon i tu hamu, asa di bagasan hamu halalas ni rohangki, jala asa gok halalas ni rohamuna. [324†]

¹²On ma patikku: Naeng ma masihaholongan hamu, songon Ahu na mangkaholongi hamu. [325†]

¹³Na sumeahon hosana humongkop angka alealena, i do parholong ni roha na so halompoan. [326†]

¹⁴Alealengku ma hamuna, molo diula hamu na hupatikkon i tu hamu. [327†]

¹⁵Ndang hugoar be hamu anak somang, ai ndang diboto anak somang na niula ni indukna; aleale do hamu hudok, ai nunga hupabotohon tu hamu saluhutna na hubege sian Damang.

¹⁶Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.

¹⁷On ma hupatikkon tu hamu. Masihaholongan ma hamu! III.

¹⁸Molo dihosomi portibi on on hamu, boto hamu ma, naung jumolo Ahu dihosomi. [328†]

¹⁹Aut na sian portibi on hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do, umbahen na dihosomi portibi on hamu. [329†]

²⁰Ingot hamu ma hata naung hudok tu hamu: Ndang na umbalga anak somang sian indukna. Molo diburui nasida Ahu, buruanna do nang hamu; molo diradoti nasida hatangku, radotanna ma nang hatamu. [330†]

²¹Alai songon i bahenonnasida tu hamu, ala ni Goarhu; ai ndang ditanda nasida na marsuru Ahu. [331†]

²²Aut so ro Ahu paboahonsa tu nasida, ndang mardosa nasida disi; alai nuaeng ndang adong be sidohononnasida mangkungkupi dosanasida.

²³Ganup na hosom roha di Ahu, hosom do roha ni i nang di Damang. [332†]

²⁴Aut unang huula angka ulaon di tongatonganasida, na so dung niula ni jolma, ndang mardosa nasida disi; alai nunga diida nasida i, gabe dihosomi nasida nang Ahu, nang Damang. [333†]

²⁵Alai naeng ma jumpang hata na tarsurat di patik ni uhumnasida: “Dihosomi nasida do Ahu, so adong alana!” [334†]

²⁶Asa ro ma Pangondian i sisuruonku sian Ama i tu hamu, i ma Tondi hasintongan i, na borhat sian Damang; I do na mangkatindangkon taringot tu Ahu. [335†]

²⁷Alai dohot ma hamu mangkatindangkon, ai donganku do hamu sian mulana i. [336†]