Read Batak Toba JOHANNES 16 Bible Online

JOHANNES 16 - Batak Toba bible

JOHANNES 16

¹I. [1] Asa unang targasip hamu, umbahen na huhatahon angka hata ondeng tu hamu. [337†]

²Pabalionnasida do hamu sian huria. Na ro ma tingkina, gabe songon na mamele Debata do na mamusa hamu, anggo di rohana. [338†]

³Songon i do bahenonnasida, ala so ditanda nasida nang Ama i, nang Ahu. [339†]

⁴Alai hupaboa i hian tu hamu, asa diingot hamu di hasosonggopna i, naung huhatahon i tu hamu. Ai ndada sian mulana hupaboa i tu hamu, ala na rap dope hita.

⁵Alai na laho ma Ahu nuaeng manopot na marsuru Ahu, jala ndang adong manang ise hamu manungkun Ahu: Na laho tudia do Ho? [340†]

⁶Lam dokdok tahe rohamuna, ala hudok songon i tu hamu.

⁷Alai na mandok na tutu do Ahu tu hamu: Ulimuna do i, ia laho Ahu. Ai aut so laho Ahu, ndang na ro Pangondian i manopot hamu. Alai anggo laho Ahu, suruonku do Ibana tu hamu. [341†] II.

⁸Anggo dung ro Ibana, ajaranna do portibi on taringot tu dosa dohot taringot tu hapintoron dohot taringot tu uhum. [342†]

⁹Anggo taringot tu dosa, i ma na so porsea nasida di Ahu. [343†]

¹⁰Anggo taringot tu hapintoron, i ma na laho Ahu manopot Damang, jadi ndang be idaonmuna Ahu. [344†]

¹¹Anggo taringot tu uhum, i ma naung hona uhum induk ni portibi on. [345†]

¹²Godang dope nian sidohononku tu hamu; alai ndang tarboan hamu dope i nuaeng. [346†]

¹³Alai dung ro Tondi hasintongan na nidok ondeng, togihonon ni I do hamu tubagasan nasa hasintongan: Ai ndang adong sihatahononna sian sandirianna; na binegena, i do hatahononna baritahononna do tu hamu, na naeng masa dope. [347†]

¹⁴Pasangaponna do Ahu, ai jaloonna do na di Ahu, laho mamaritahonsa tu hamu.

¹⁵Saluhut na di Ama i, di Ahu do i, umbahen na hudok: Jaloonna do na di Ahu, laho mamaritahonsa tu hamu. [348†] III.

¹⁶Satongkin nari nama, ndang idaonmuna be Ahu, dung i satongkin nari muse, idaonmuna ma Ahu. [349†]

¹⁷Gabe masipandohan ma angka siseanna i: Dia do astuan ni na nidokna i tu hita satongkin nari nama, ndang idaonmuna be Ahu; dung i: Satongkin nari muse idaonmuna ma Ahu?

¹⁸Jadi didok nasida ma: Dia do astuan ni hata: “Satongkin nari”? Ndang taboto lapatanna.

¹⁹Mamoto ma Jesus, na naeng ro nasida manungkun Ibana, gabe didok ma tu nasida: Na masisungkunan do hamu taringot tu na hudok: Satongkin nari nama, ndang idaonmu be Ahu, dung i: Satongkin nari muse, idaonmuna ma Ahu?

²⁰Na tutu situtu do na hudok on tu hamu: Na tumatangis ma hamu jala mangandungi, alai las ma roha ni portibi on; marsak do anggo rohamuna, alai muba ma arsak ni rohamuna gabe las ni roha.

²¹Dokdok do roha ni boruboru laho manubuhon posoposona, ai naung songgop hasasangana. Alai dung tubu posoposo i, ndang be diingot na porsuk i, dibahen halalas ni rohana, ala naung tubu jolma i tu hasiangan on. [350†]

²²Di hamu pe nuaeng dok ni roha; alai idaonku do hamu muse, gabe las ma rohamuna disi, jala ndang buaton sian hamu halalas ni rohamuna i.

²³Ndang sungkunonmuna be Ahu di na sadari i. Na tutu situtu do na hudok on tu hamu: Nasa sipangidoonmuna tu Ama i, sai na lehononna do marhitehite Goarhu. [351†]

²⁴Rasirasa nuaeng ndang dope mangido hamu marhitehite Goarhu. Pangido hamu ma, asa manjalo hamu, asa gok halalas ni rohamuna! [352†]

²⁵Na marumpama do Ahu nasailaon mangkatai dohot hamu; alai ndang marumpama be Ahu di tingki na ro i, ai disi ma patar baritahononku tu hamu taringot tu Ama i.

²⁶Di na sadari i ma hamu mangido marhitehite Goarhu, jala ndang pola Ahu mangondihon hamu tu Ama i.

²⁷Ai Ama i sandiri mangkaholongi hamu, ala naung holong rohamuna di Ahu, jala ala naung porsea hamu, Ahu borhat sian Debata. [353†]

²⁸Na borhat sian Ama i do Ahu ro tu portibi on; na manadingkon nama Ahu muse di portibi on, laho manopot Ama i.

²⁹Gabe didok angka siseanna i ma: Nuaeng pe, asa patar hatam; ndang songon umpama be na nidokmi. [354†]

³⁰Huboto hami do nuaeng, saluhutna do diboto Ho, ndengkon adong na manungkun Ho. Dibahen i ma umbahen na porsea hami, naung borhat sian Debata do Ho.

³¹Jala dialusi Jesus ma nasida: Porsea ma hamu nuaeng?

³²Na ro ma tingkina, jala nunga ro i nuaeng, jadi marserak ma hamu, ganup masitondong dalanna, tadingkononmuna ma Ahu punjung; alai ndang punjung Ahu tahe, ai Ama i do donganku. [355†]

³³Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on. [356†]