Read Batak Toba JOHANNES 18 Bible Online

JOHANNES 18 - Batak Toba bible

JOHANNES 18

¹I. [1] Jadi dung didok Jesus songon i, ruar ma Ibana rap dohot angka siseanna tu ipar ni aek Kidron. Adong ma disi sada porlak, tusi ma laho Ibana dohot angka siseanna i. [377†]

²Alai diboto si Judas siparjehe i do inganan i, ai jotjot do marpungu tusi Jesus dohot angka siseanna. [378†]

³Ia si Judas i, diarahon ma angka soldadu dohot angka naposo ni sintua ni malim, didapothon ma tusi, mantat sulusulu, palito dohot sinjata.

⁴Diboto Jesus do saluhut na naeng songgop tu Ibana, jadi ruar ma Ibana, didok ma tu nasida: Ise do na jinalahanmuna i? [379†]

⁵Gabe ninna nasida ma mangalusi Ibana: Jesus, halak Nasaret i do! Dung i ninna Jesus ma mandok nasida: Ahu do i! Alai dohot do si Judas siparjehe i jongjong di lambungnasida.

⁶Asa dung didok tu nasida: Ahu do i, sumurut ma nasida, angka martinggangan ma tu tano.

⁷Dung i diulahi ma manungkun nasida: Ise do na niluluanmuna? Jadi didok nasida ma: Jesus, halak Nasaret i do.

⁸Dung i ninna Jesus ma mangalusi: Nunga hupaboa tu hamu: Ahu do i. Asa molo Ahu dilului hamu, loas hamu ma laho angka on!

⁹Ai naeng do jumpang hata na nidokna i: Ndang adong na mago hubahen agia sada sian angka na nilehonmi tu Ahu. [380†]

¹⁰Ia si Simon Petrus marpodang do, i ma disintak jadi ditampulhon ma tu naposo ni sintua ni malim i, jadi dipisikkon ma pinggolna siamun; si Malkus do goar ni naposo i.

¹¹Dung i ninna Jesus ma mandok si Petrus: Pasarung podangmi! Nda inumonku siinumon na nilehon ni Ama i tu Ahu? [381†]

¹²Dung i ditangkup angka soldadu dohot induknasida ro di angka naposo ni Jahudi ma Jesus, jala diihoti.

¹³Jadi ditogihon ma Ibana jumolo tu si Hannas, i ma simatua ni si Kayapas, sintua ni malim di na sataon i.

¹⁴I ma si Kayapas, naung mandok tu angka Jahudi: Dengganan do mate sada halak humongkop, bangso i. [382†] II.

¹⁵Alai diihuthon si Simon Petrus dohot sisean na sada nari ma Jesus. Na masitandaan sisean na sada i dohot sintua ni malim i, jadi bongot ma ibana rap dohot Jesus tu alaman ni malim i.

¹⁶Alai jongjong do si Petrus tartungkan balian di lambung pintu i. Jadi ruar ma sisean na sada i, na masitandaan dohot sintua ni malim i, mangkatai dohot boruboru sijaga pintu, gabe ditogihon ma si Petrus tubagasan.

¹⁷Dung i ninna boruboru sijaga pintu i ma mandok si Petrus: Nda ho sada sian angka sisean ni Halak an? Jadi didok ma: Ndang i ahu!

¹⁸Alai na jongjong do disi angka naposo dohot angka opas mansusudu di pansusuduan na niopannasida dibahen ngalina i. Jadi rap dohot nasida ma jongjong si Petrus disi mansusudu.

¹⁹Alai disungkun sintua ni malim i ma Jesus taringot tu angka siseanna dohot taringot tu podana i.

²⁰Jadi dialusi Jesus ma ibana, ninna ma: Patar do hatangki di hatoropan. Na tongtong do Ahu mangajari nasailaon di bagasan parguruan nang di bagas joro pe, parpunguan ni saluhut Jahudi; ndang adong manang aha huhatahon marsibuni. [383†]

²¹Boasa Ahu disungkun ho? Nasida naung umbege hatangki, i ma sungkun! Ai diboto nasida do na huhatahon i.

²²Dung didok Jesus songon i, dipastap sada opas na jongjong disi ma Ibana, huhut ma didok: Songon i do pangalusim di sintua ni malim i?

²³Dung i ninna Jesus ma mangalusi ibana: Ia na hurang na hudok, hajongjongkon hurangna; alai anggo na hona do, boasa pastaponmu Ahu?

²⁴Asa disuru si Hannas ma Ibana naung tinali i tu sintua ni malim si Kayapas.

²⁵Laos na jongjong dope disi si Simon Petrus mansusudu, gabe didok nasida ma mandok ibana: Nda dohot do ho sada sian siseanna? Jadi mamorso ma ibana, ninna ma: Nda tung i ahu!

²⁶Dung i didok sahalak naposo ni malim, sisolhot ni nampuna pinggol na pinisikkon ni si Petrus i ma: Nda huida ho rap dohot Ibana di porlak i?

²⁷Jadi diporso si Petrus ma muse, dung i pintor martahuak ma manuk. III.

²⁸Asa ditogihon nasida ma Jesus sian jolo ni si Kayapas tu kantor. Alai sogot ma i manogot i. Ndang na bongot anggo nasida tu kantor, asa unang tarsubang nasida laho manganhon Paska i.

²⁹Gabe ruar ma si Latus mandapothon nasida, didok ma: Pangaluan dia do diboan hamu dompak Halak an?

³⁰Dung i ninna nasida ma mangalusi: Aut unang sibahen na jahat Halak on, ndang tagamon pasahatonnami Ibana tu ho.

³¹Gabe ninna si Latus ma mandok nasida: Boan hamu ma Ibana, uhumi hamu ma Ibana marguru tu adatmuna. Alai ninna angka Jahudi ma mandok ibana: Ndang jadi pusaonnami manang ise. [384†]

³²Jumpang ma disi na nidok ni Jesus, uju pinaboana i hian pangalaho ni parmatena. [385†]

³³Jadi dibongoti si Latus muse kantorna, dijou ma Jesus, didok ma tu Ibana: Atehe, Ho do raja ni Jahudi?

³⁴Ro ma alus ni Jesus: Na sian roham do na nidokmi, manang na nidok ni halak do i tu ho taringot tu Ahu?

³⁵Gabe dialusi si Latus ma: Ai halak Jahudi do ahu? Bangsomi dohot angka sintua ni malim i do pasahathon Ho tu ahu. Aha do na binahenmu?

³⁶Jadi dialusi Jesus ma: Ndang sian portibi on harajaonku. Aut sian portibi on harajaonku, ndang tarbahen so mangalo angka naposongki, asa unang sahat Ahu tu angka Jahudi, alai ndang sisongon i harajaonki.

³⁷Dung i ninna si Latus ma mandok Ibana: Asa raja do Ho? Jadi ninna Jesus ma mangalusi: Songon na nidokmi ma tutu. Raja do Ahu! Umbahen na tubu Ahu jala umbahen na ro Ahu tu portibi on, asa huhatindangkon hasintongan i. Ganup na sian hasintongan i tangihonon ni i do soarangku. [386†]

³⁸Jadi ninna si Latus ma mandok Ibana: Aha ma i, hasintongan i? Jadi dung didok sisongon i, ruar ma ibana muse manopot angka Jahudi mandok tu nasida: Ndang jumpang ahu manang dia salana.

³⁹Alai tahe, somal hupalua sada halak tu hamu jumpa Paska i. Anggo na lehet di rohamu, hupalua ma raja ni Jahudi i tu hamu?

⁴⁰Gabe dijouhon nasida ma muse: Unang Ibana; si Barabas ma! Alai partodos do anggo si Barabas.