Read Batak Toba JOHANNES 21 Bible Online

JOHANNES 21 - Batak Toba bible

JOHANNES 21

¹I. [1] Dung i dipatuduhon Jesus ma Ibana muse tu angka siseanna di topitao Tiberias. Jala songon on do pangalahona:

²Pungu ma si Simon Petrus dohot si Tomas na margoar Linduat, angkup ni i si Natanael sian Kana na di Galilea dohot angka anak ni si Sebedeus, rap dohot dua nari sian angka siseanna i. [411†]

³Gabe ro ma hata ni si Simon Petrus tu nasida: Laho ma ahu mardengke. Jadi didok nasida ma tu ibana: Dohot ma hami! Laos borhat ma nasida, bongot ma tu parau; alai ndang dapot nasida agia aha di na saborngin i.

⁴Alai di na torang ari, jongjong ma Jesus di pasir; alai ndang ditanda angka sisean i Ibana. [412†]

⁵Jadi didok Jesus ma tu nasida: Ndang adong dengkemuna, ale angka anaha, nanggo saotik? Jadi ro ma alusnasida: Ndang adong! [413†]

⁶Dung i didok ma tu nasida: Sampakkon hamu ma jalamuna tu siamun ni parau i, asa dapotan hamu! Jala disampakkon nasida ma, gabe ndang tartait nasida be jala i dibahen godang ni dengke i. [414†]

⁷Dung i didok sisean haholongan ni roha ni Jesus i ma tu si Petrus: Tuhan i do i! Jadi dung dibege si Simon Petrus, Tuhan i do i hape, dialithon ma abitna, ai ndang marabit hian ibana; dung i ditimbung ma tu tao i. [415†]

⁸Alai marparau do angka donganna sisean i sahat, huhut sumarat jala na marisi dengke i; ai ndang sadia dao nasida sian darat i, arga duaratus elak nama.

⁹Jadi dung sahat nasida ro di darat, diida ma gara disi dohot dengke peak di ginjangna, angkup ni roti.

¹⁰Dung i didok Jesus ma tu nasida: Boan hamu ma tu on deba dengke sian angka na dapot hamu nangkin!

¹¹Gabe manaek ma si Petrus tu parau, disarat ma jala i tu darat, gok dengke na balga, saratus limapulu tolu toropna; atik pe na sa i toropna, ndang na maribak jala i.

¹²Jadi didok Jesus ma tu nasida: Ro ma hamu mangan! Alai ndang adong manang ise sian angka sisean i, na hum roha manise Ibana: Ise do Ho? Ai diboto be, Tuhan i do Ibana.

¹³Asa ro ma Jesus, dibuat ma roti i, diparlehon ma tu nasida, angka dengke i pe songon i do. [416†]

¹⁴I ma patoluhalihon dipatuduhon Jesus Ibana tu angka siseanna, dung hehe Ibana sian angka na mate. II.

¹⁵Asa dung mangan nasida, didok Jesus ma tu si Simon Petrus: Ale Simon, anak ni si Jonas, humolong do roham di Ahu sian angka on? Jadi didok ma tu Ibana: Olo, Tuhan; diboto Ho do holong ni rohangku di Ho! Jadi didok Jesus ma tu ibana: Parmahan i ma anak ni birubirungku! [417†]

¹⁶Dung i ninna muse ma paduahalihon: Simon, anak ni si Jonas, holong do roham di Ahu? Jadi didok ma tu Ibana: Olo, Tuhan; diboto Ho do holong ni rohangku di Ho! Dung i didok ma tu ibana: Parmahan i ma angka birubirungku! [418†]

¹⁷Dung i didok ma patoluhalihon tu ibana: Simon, anak ni si Jonas, holong do roham di Ahu? Jadi marsak ma roha ni si Petrus, ala patoluhalihon didok tu ibana: Holong do roham di Ahu? Jadi didok ma tu Ibana: Saluhutna, ale Tuhan, diboto Ho; Ditanda Ho do holong ni rohangku di Ho! Dung i didok Jesus ma tu ibana: Parmahan i ma angka birubirungku! [419†]

¹⁸Na tutu situtu do na hudok on tu ho: Andorang umposo dope ho, ho do mangkohosi dirim, laho manopot lomo ni roham; alai dung matua ho, surdukkononmu ma tanganmu, jadi hohosan ni na leban ma ho jala togihononna ma ho tu na so hinalomohon ni roham.

¹⁹Alai marhite sian hatana ondeng dipalumba do ibana, manang songon dia parmatena laho pasangaphon Debata. Jadi dung didok songon i, ninna ma mandok ibana: Ihuthon ma Ahu! [420†]

²⁰Dung i humusor ma si Petrus jadi diida ma mangihut sisean haholongan ni roha ni Jesus, i ma na hundul jumonok tu Jesus di na marsipanganon i; laos ibana do na manungkun uju i: Ise do i, Tuhan, na manjehehon Ho? [421†]

²¹Asa dung diida si Petrus ibana, ninna ma mandok Jesus: Beha ma halak on, Tuhan?

²²Gabe didok Jesus ma tu ibana: Molo na lomo rohangku, naeng mian ibana, paima ro Ahu, ndang na ro di ho i; asal diihuthon ho Ahu!

²³Asa sar ma tu angka dongan hata on: Ndang mate sisean on! Alai ndang didok Jesus: Ndang mate ibana. On do tahe didok: Molo na lomo rohangku, naeng mian ibana, paima ro Ahu, ndang na ro di ho i!

²⁴I ma sisean i na mangkatindangkon angka on jala manurathon, jadi huboto hami, na tutu do na hinatindangkonna i. [422†]

²⁵Alai lan dope na asing na binahen ni Jesus; aut sinurathon i sadasada, ra ndang siat di portibi on di rohangku angka buku na sinuratan i. [423†]