Read Batak Toba JOHANNES 3 Bible Online

JOHANNES 3 - Batak Toba bible

JOHANNES 3

¹I. [1] Asa adong ma sahalak sian angka Parise, sintua ni Jahudi na margoar Nikodemus. [41†]

²Na ro bornginborngin manopot Ibana, jadi didok ma mandok Ibana: Gurunami, huboto hami do Ho guru na ro sian Debata, ai ndang tarpatupa agia ise tanda songon na binahenmi, ia so Debata donganna.

³Dung i ninna Jesus ma mangalusi ibana: Na tutu situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata! [42†]

⁴Dung i ninna si Nikodemus ma mandok Ibana: Songon dia ma tarbahen tubu muse halak, ia naung matua? Tung haulahansa ma mamasuhi siubeon ni inana, asa tubu?

⁵Jadi dialusi Jesus ma: Na tutu situtu do na hudok on di ho: Anggo so tubu jolma sian aek dohot sian Tondi, ndang habongotansa harajaon ni Debata! [43†]

⁶Daging do na tubu sian daging, tondi do na tubu sian Tondi. [44†]

⁷Unang ma longang roham, ala hudok tu ho: Ingkon tubu hamu sian ginjang!

⁸Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna. Laos songon i do ganup naung tubu sian Tondi.

⁹Dung i ninna si Nikodemus ma mangalusi Ibana: Songon dia ma tarpajadi i?

¹⁰Jadi ninna Jesus ma mangalusi ibana: Ho, guru ni bangso Israel, ndang diboto ho i?

¹¹Na tutu situtu do na hudok on di ho: Huhatahon hami do na huboto hami jala huhatindangkon hami do naung huida hami, gabe ndang dijangkon hamu na huhatindangkon hami. [45†]

¹²Gari angka na di tano on huhatahon tu hamu, ndang porsea hamu; tung porsea ma hamu, molo huhatahon tu hamu angka na di banua ginjang i?

¹³Ndang adong na manaek tu banua ginjang, ia so naung tuat i sian banua ginjang; i ma Anak ni jolma i, na di banua ginjang i hian. [46†]

¹⁴Jadi songon naung pinatimbo ni si Musa ulok i di halongonan, songon i naeng patimboon Anak ni jolma i, [47†]

¹⁵asa dapotan hangoluan na salelenglelengna ganup na porsea di Ibana.

¹⁶Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. [48†]

¹⁷Ai ndang na disuru Debata Anakna i tu portibi on, asa uhumanna; naeng paluaonna portibi on tahe, umbahen na disuru. [49†]

¹⁸Ndang siuhuman na porsea di Ibana; alai anggo na so porsea i, nunga hona uhum, ala so porsea ibana di Goar ni Anak sasada ni Debata. [50†]

¹⁹Alai on ma uhum i: Nunga ro na tiur i tu portibi on, jadi holongan do roha ni angka jolma di na holom i asa di na tiur i, ai na jahat do parulaonnasida. [51†]

²⁰Ai ganup na mangulahon na roa, hosom do rohana di na tiur i, jala ndang didapothon na tiur i, asa unang gabe patar angka ulaonna i. [52†]

²¹Alai na mangula hasintongan i, didapothon do na tiur i, asa patar parulaonna i; ai di bagasan Debata do diula. II.

²²Dung i ro ma Jesus dohot angka siseanna i tu luat Judea, jadi mian disi ma jolo Ibana rap dohot nasida jala mandidihon. [53†]

²³Alai dohot do si Johannes mandidihon di Enon, mardonokkon huta Salem, ai na nia aek disi. Jadi tusi ma ro halak gabe tardidi.

²⁴Ai ndang dope dihurungkon si Johannes uju i. [54†]

²⁵Marsual ma disi angka sisean ni si Johannes dohot sahalak Jahudi siala parburion i.

²⁶Jadi didapothon nasida ma si Johannes, didok ma tu ibana: Gurunami, Halak i na ro tu jolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana. [55†]

²⁷Dung i ninna si Johannes ma mangalusi: ‘Ndang tarbuat jolma manang aha, anggo so dilehon tu ibana sian banua ginjang. [56†]

²⁸Hamu sandiri do sitindangingku di na hudok: Ndada ahu Kristus i; na sinuru do ahu patujolona. [57†]

²⁹Nampuna oroan, i do pangoli i. Alai na jongjong do aleale ni pangoli i patangitangi ibana; jadi marlas ni roha situtu dibahen soara ni pangoli i. Asa halahas ni roha sisongon i ma jumpang di ahu. [58†]

³⁰Ianggo Ibana, patut lam ganda; lam moru ma anggo ahu!

³¹Na ro sian ginjang, I do mangatasi saluhutna. Na ro sian tano on, i ma sian tano on, jala angka na sian tano on do dihatahon. [59†]

³²Dihatindangkon na ro sian banua ginjang i do na niidana dohot na binegena, gabe ndang adong na manjangkon na hinatindangkonna i. [60†]

³³Halak na manjangkon na hinatindangkonna i, i do sumahaphon, paboa parsintong Debata.

³⁴Ai na sinuru ni Debata. I do mangkatahon angka hata ni Debata; ai ndang marpanuhatan Ibana mangalehon Tondi i. [61†]

³⁵Na holong do roha ni Ama i di Anak i; naung dilehon do saluhutna tu tanganna. [62†]

³⁶Naung dapotan hangoluan na salelenglelengna do na mangkaporseai Anak i; alai na so mangoloi Anak i, ndang idaon ni i hangoluan; sai na mian do tahe rimas ni Debata di ibana. [63†]