Read Batak Toba JOHANNES 5 Bible Online

JOHANNES 5 - Batak Toba bible

JOHANNES 5

¹I. [1] Salpu ni i adong ma pesta ni halak Jahudi, jadi nangkok ma Jesus tu Jerusalem.

²Jadi adong ma di Jerusalem di lambung ni harbangan birubiru paridian sada na margoar Betesda anggo di hata Heber; lima do soposopo disi.

³Marpeahan do disi torop halak na hansitan, na mapitung, na sarion, na tiarapon, angka na paimaimahon hagugunsang ni aek i.

⁴Ai surusuruan ni Debata do tuat marombasombas tubagasan paridian i manggunsang aek i. Asa na parjolo bongot di hagugunsang ni aek i, gabe malum do, manang dia pe sahit na lohot tu ibana.

⁵Alai adong ma disi sahalak naung tolupulu ualu taon lelengna marsahit.

⁶Diida Jesus ibana peak disi, jala diboto ma, naung pola leleng ibana disi, gabe ninna ma mandok ibana: Naeng malum ho?

⁷Jadi didok na marsahit i ma mangalusi Ibana: Iale tuan! Ndang adong parhuaonku, na manogu ahu tu paridian i di hagugunsang ni aek i; ai mandok ro dope ahu, nunga dijoloani na asing ahu mijur.

⁸Dung i ninna Jesus ma mandok ibana: Hehe ma ho; hindat ma lagem, mardalan ma ho! [83†]

⁹Jadi pintor hisar ma jolma i, dihindat ma lagena, laos mardalan ma. Alai ari Sabbat do toho na sadari i. [84†]

¹⁰Dung i ninna angka Jahudi i ma mandok na pinamalum i: Ari Sabbat do nuaeng; ndang jadi boanonmu lagem! [85†]

¹¹Jadi didok ma mangalusi nasida: Halak i na pamalum ahu, i do mandok tu ahu; Hindat ma lagem, mardalan ma ho!

¹²Dung i disungkun nasida ma ibana: Ai ise na mandokkon ho mangkindatsa jala mardalan?

¹³Alai ndang ditanda na hansitan i Ibana; ai nunga sumurut Jesus, ala torop halak disi.

¹⁴Ndang piga dan jumpang Jesus ma ibana di bagas joro, jadi didok ma tu ibana: Atehe, nunga hisar be ho? Unang datdati mangula dosa, asa unang songgop tu ho na umposi! [86†]

¹⁵Gabe laho ma halak ondeng paboahon tu angka Jahudi, Jesus do na pahisar ibana.

¹⁶Jadi diburui angka Jahudi ma Jesus, ala dibahen songon i di ari Sabbat. [87†] II.

¹⁷Alai dialusi Jesus ma nasida, ninna ma: Na mangula do Damang rasirasa nuaeng; Ahu pe mangula do. [88†]

¹⁸Ala ni i lam disangkapi angka Jahudi mamusa Ibana, ai disegai do ari Sabbat i, tole digoar do Debata Amana jala dipasobok do dirina dohot Debata. [89†]

¹⁹Gabe dialusi Jesus ma nasida, didok ma: Na tutu situtu do na hudok on tu hamu: Ndang tarpatupa Anak i manang aha sian roharohana, anggo so diida Ibana Ama i mangulahonsa; ai ia i dibahen Ama i, laos i do diula Anak i. [90†]

²⁰Ai holong do roha ni Ama i di Anak i, dipatuduhon do tu Ibana nasa ulaon ni Ama i; laos patuduhononna ma tu Ibana ulaon na umbalga sian on, asa longang rohamu. [91†]

²¹Ai songon panungguli ni Ama i di angka na mate, laho pangoluhon nasida, songon i do Anak i: dipangolu do angka na naeng pangoluonna.

²²Ai ndang adong diuhumi Ama i manang ise; nunga dipasahat sandok paruhumon i tu Anak i, [92†]

²³asa diparsangapi saluhut halak Anak i, songon parsangapinasida di Ama i. Ia i na so pasangaphon Anak i, i ma na so pasangaphon Ama i, na marsuru Ibana. [93†]

²⁴Na tutu situtu do na hudok on tu hamu: Manang ise na tumangihon hatangki jala porsea di na marsuru Ahu, nunga sahat tu ibana hangoluan na salelenglelengna; ndang pola be ibana tu paruhuman, nunga taripar ibana sian hamatean tu hangoluan. [94†]

²⁵Na tutu situtu do na hudok on tu hamu: Na ro ma tingkina jala nunga masa nuaeng, begeon ni angka na mate i ma disi soara ni Anak ni Debata; gabe mangolu ma angka na umbegesa. [95†]

²⁶Ai songon Ama i Parngolu hian di bagasan dirina, laos songon i do dilehon tu Anak i, asa Parngolu Ibana di bagasan dirina. [96†]

²⁷Jala dilehon do tu Ibana huaso manguhumi, ala Anak ni jolma i Ibana. [97†]

²⁸Unang longang rohamu ala ni i, ai di na ro tingkina, begeon ni saluhut halak na di angka tanoman i ma soarana.

²⁹Dung i ruar be ma: Angka sibahen na denggan hehe tu hangoluan; alai angka siula na jahat hehe tu uhum. [98†]

³⁰Ndang tarula Ahu agia aha, anggo tung sian diringku; hombar tu na hubege do panguhumhu, jadi tigor do uhumhi, ala so hulului na pinangido ni rohangku, na pinangido ni roha ni na marsuru Ahu, i do. [99†]

³¹Anggo Ahu mangkatindangkon diringku, ndang na sintong panindangionki.

³²Adong do na asing na mangkatindangkon Ahu jala huboto, na sintong do panindangionna na taringot tu Ahu. [100†]

³³Naung disuru hamu do na manopot si Johannes, gabe na sintong i dihatindangkon ibana. [101†]

³⁴Alai anggo Ahu, ndang hujalo panindangion sian jolma; ia hutaringoti pe i, ala ni hamu do, anggiat malua hamu.

³⁵Palito na galak jala na marsinondang do ibana; alai na naeng marlas ni roha do hamu sangombas di bagasan sondangna i.

³⁶Alai na sumurung do panindangion na di Ahu asa na sian si Johannes; ai angka ulaon na nilehon ni Ama i tu Ahu, sipaujungonku, i ma angka ulaon na huula, i do mangkatindangkon Ahu, paboa na disuru Ama i Ahu. [102†]

³⁷Nang Ama i na marsuru Ahu, dihatindangkon do Ahu. Ndang dung dibege hamu soarana, rupana pe ndang dung diida hamu. [103†]

³⁸Hatana pe ndang ditiop hamu mian di bagasan rohamuna, ai ndang porsea hamu di na sinuruna.

³⁹Didiori hamu do angka surat i, ai diparbaga rohamu, dapot hamu do disi hangoluan na salelenglelengna; jala Surat i do tutu mangkatindangkon Ahu. [104†]

⁴⁰Alai ndang olo hamu ro manopot Ahu, asa dapotan hangoluan hamu nian. [105†]

⁴¹Ndang adong hujalo hasangapon sian jolma. [106†]

⁴²Alai nunga hutanda hamu, na so ditiop hamu di bagasan hamu holong ni roha ni Debata.

⁴³Ro do Ahu marhitehite Goar ni Damang, gabe ndang dijangkon hamu Ahu. Alai molo ro na asing marhitehite goarna sandiri, jangkononmuna do anggo i.

⁴⁴Songon dia ma antong tarbahen hamu gabe porsea, ai na masijaloan sangap do hamu sama hamu; alai anggo sangap na sian Debata na sasada i, ndang dilului hamu. [107†]

⁴⁵Unang dirimpu rohamuna, Ahu mangaluhon hamu tu Ama i. Adong do na mangaluhon hamu; i ma si Musa, haposan ni rohamuna i. [108†]

⁴⁶Ai aut na porsea hamu di si Musa, porsea ma hamu nang di Ahu; ai taringot tu Ahu do disurathon. [109†]

⁴⁷Alai molo so porsea hamu di suratna i, tung porsea ma hamu di hatangki? [110†]