Read Batak Toba JOHANNES 6 Bible Online

JOHANNES 6 - Batak Toba bible

JOHANNES 6

¹I. [1] Asa dung salpu i, ditaripari Jesus ma tao Galilea, Tiberias.

²Alai torop ma halak mangihuthon Ibana, ala diida nasida tanda angka na binahenna tu na hansitan.

³Dung i nangkok ma Jesus tu dolok, laho hundul tusi rap dohot angka siseanna.

⁴Alai jonok nama Paska, ari raya ni Jahudi. [111†]

⁵Dung i manatap ma Jesus, diida ma torop halak ro mandapothon Ibana, jadi didok ma mandok si Pilippus: Sian dia ma tuhoronta roti, asa mangan angka on?

⁶Alai didok pe songon i, na laho mangunjuni ibana do; ai diboto hian do sibahenonna.

⁷Jadi dialusi si Pilippus ma Ibana: Ndang sae roti arga duaratus hupang, asa dijalo ganup nasida sasaotik.

⁸Dung i didok sahalak sian angka siseanna, i ma si Andreas, anggi ni si Simon Petrus, ma mandok Ibana:

⁹Adong do dison sada dakdanak na umpeop lima roti dohot dua dengke; alai sadia ma i tu na sai torop?

¹⁰Alai didok Jesus ma: Dokkon hamu ma hundul angka jolma i; alai bidang do jampalan disi. Dung i hundul ma disi torop ni baoa, arga limaribu.

¹¹Asa dibuat Jesus ma angka roti i, didok ma mauliate, diparlehon ma i tu angka na hundul i; sian dengke i pe songon i, saguru lomo ni rohanasida.

¹²Alai dung bosur nasida, ninna ma mandok angka siseanna: Papungu hamu ma angka ebaeba i, asa unang magopo!

¹³Gabe dipapungu nasida, jadi gok ma sampuludua ampang ebaeba sian na lima roti i, na so suda angka na mangan i.

¹⁴Asa dung diida halak i tanda naung binahen ni Jesus i, ninna nasida ma: On ma tutu panurirang i, na naeng ro tu portibi on. [112†]

¹⁵Mamoto ma Jesus, naeng ro nasida manoro Ibana, laho pabangkithon gabe raja, jadi maporus ma Sasadasa tu dolok. [113†] II.

¹⁶Alai dung bot ari, tuat ma angka siseanna i tu topitao.

¹⁷Dibongoti nasida ma parau i, ditaripari ma tao i dompak Kapernaum. Nunga pola mangkolom; laos so ro dope Jesus mandapothon nasida.

¹⁸Alai gaor do tao i dibahen pangullus ni habahaba na gogo.

¹⁹Asa dung marluga nasida arga dua manang tolu paal daona, diida nasida ma Jesus na mardalan diatas tao i manjonohi parau i, gabe mabiar ma nasida.

²⁰Alai didok ma mandok nasida: Ahu do on; unang hamu mabiar!

²¹Jadi naeng ma pabongotonnasida Ibana tubagasan parau i; dung i pintor sahat ma parau i tu luat sitondongonnasida. III.

²²Torang ni arina i, diboto natorop na tinggal di ipar ni tao i, na so adong disi parauna asing dungkon ni na sasada i, jala na so dohot Jesus bongot tu parau i, holan angka siseanna do na borhat.

²³Alai na ro do angka parau sian Tiberias jonok tu inganan parmanganan roti na tinangiangkon ni Tuhan i. [114†]

²⁴Asa dung diida natorop i, na so disi Jesus, nang angka siseanna pe, dibongoti ma muse angka parau jadi ro tu huta Kapernaum mangalului Jesus.

²⁵Jadi dung jumpang nasida Ibana di bariba ni tao i, ninna nasida ma mandok Ibana: Guru, sadihari do ho ro tuson?

²⁶Dung i ninna Jesus ma mangalusi nasida: Na tutu situtu do na hudok on tu hamu: Dilului hamu pe Ahu, ndada ala naung dapot rohamuna tanda i, tung ala ni na bosur i do hamu, na mangan roti i.

²⁷Unang ma sipanganon na olo salpu ula hamu; alai sipanganon na mian ro di hangoluan na salelenglelengna, na naeng lehonon ni Anak ni jolma i tu hamu. Ai Ibana do dihatindangkon Ama i, Debata. [115†]

²⁸Dung i ninna nasida ma mandok Ibana: Dia ma bahenonnami, asa huula hami angka ulaon lomo ni roha ni Debata?

²⁹Dung i ninna Jesus ama mangalusi nasida: Haporseai hamu ma Nasinuru ni Debata; i ma ulaon lomo ni rohana. [116†]

³⁰Dung i ninna nasida ma: Asa dia ma tanda bahenonmu siidaonnami, asa tung porsea hami di Ho? Aha diula Ho? [117†]

³¹Ia ompunami, mangan Manna do di parhorsihan, songon na tarsurat: “Dilehon do roti sian banua ginjang panganonnasida.” [118†]

³²Dung i ninna Jesus ma mandok nasida: Na tutu do hatangkon tu hamu: Apala si Musa mangalehon tu hamu roti na sian banua ginjang; Damang i do mangalehon di hamu roti na tutu, na sian banua ginjang. [119†]

³³Ai na tuat sian banua ginjang do silehon hangoluan tu portibi on; i do roti na sian Debata.

³⁴Gabe didok nasida ma: Sai tong ma lehon tu hami, ale Tuhan, roti sisongon i!

³⁵Dung i ninna Jesus ma mandok nasida: Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu. [120†]

³⁶Alai nunga hupaboa tu hamu: Diida matamuna do Ahu nian; alai ndang porsea hamu. [121†]

³⁷Saluhutna na nilehon ni Ama i tu Ahu, i do na ro tu Ahu; jala na so tupa pabalionku na ro tu Ahu. [122†]

³⁸Ai ndada tuat Ahu sian banua ginjang mambahen roharohangku; na pinangido ni roha ni na marsuru Ahu, i do. [123†]

³⁹Alai on do dipangido roha ni na marsuru Ahu: Unang ma mago hubahen agia sada sian saluhutna na nilehonna tu Ahu, asa hupangolu i tahe di ari parpudi. [124†]

⁴⁰Ai on do dipangido roha ni Damang: Naeng ma dapotan hangoluan salelenglelengna ganup na marnida Anak i jala porsea di Ibana; jala paheheonku do ibana di ari parpudi. [125†]

⁴¹Gabe marmungutmungut ma angka Jahudi dompak Ibana siala pandokna i: “Ahu do roti na tuat sian banua ginjang.”

⁴²Jadi didok nasida ma: Nda Ibana do Jesus, anak ni si Josep i; nda tatanda amana dohot inana? Beha ma dohononna antong: Na tuat sian banua ginjang do ahu? [126†]

⁴³Jadi dialusi Jesus ma nasida: Unang hamu marmungutmungut!

⁴⁴Ndang adong na tarbahen ro tu Ahu, ia so na tinogu ni Ama i na marsuru Ahu; jala Ahu pahehehon ibana di ari parpudi. [127†]

⁴⁵Na tarsurat do di angka panurirang: “Na pinodaan ni Debata ma nasida saluhutna.” Ganup na manangihon Ama i jala na marguru tu Ibana, i do na ro tu Ahu. [128†]

⁴⁶Ndang dung adong nian na marnida Ama i; holan Ibana na ro sian Debata, I do na marnida Ama i. [129†]

⁴⁷Na tutu situtu do na hudok on tu hamu: Na porsea, i do naung gabe nampuna hangoluan na salelenglelengna. [130†]

⁴⁸Ahu do roti hangoluan i! [131†]

⁴⁹Na mangan Manna i do angka ompumuna di parhorsihan, jadi mate do! [132†]

⁵⁰On do roti na tuat sian banua ginjang, asa unang mate na manganhonsa.

⁵¹Ahu do roti na mangolu, na tuat sian banua ginjang i. Manang ise na manganhon roti on, i do mangolu salelenglelengna. Ia roti silehononki, bahen hangoluan ni portibi on, i ma dagingku. [133†]

⁵²Dung i marsual ma angka Jahudi sama nasida, ninna ma: Beha ma bahenon ni Halak on mangalehon dagingna i panganonta?

⁵³Jadi didok Jesus ma tu nasida: Na tutu situtu do hatangkon na tu hamu: Tung na so dapot hamu hangoluan i, molo so dipangan hamu daging ni Anak ni jolma i, jala so diinum hamu mudarna!

⁵⁴Dapotan hangoluan salelenglelengna do ganup na manganhon dagingku jala manginum mudarhu; jala paheheonku do ibana di ari parpudi.

⁵⁵Ai sipanganon na tutu do dagingku, jala siinumon na tutu do mudarhu.

⁵⁶Manang ise na manganhon dagingku jala manginum mudarhu, i do na mian di bagasan Ahu jala Ahu di bagasan ibana. [134†]

⁵⁷Songon parsuru ni Ama Siparngolu i di Ahu, gabe mangolu Ahu marhitehite Ama i, songon i ma mangolu marhitehite Ahu na manganhon Ahu.

⁵⁸On do roti na tuat sian banua ginjang; alai nda tung songon na di angka ompu i, ai mangan do nasida, tong do mate. Mangolu salelenglelengna do na manganhon roti on.

⁵⁹I ma hata ni Jesus, laho mangajari di bagasan parguruan na di huta Kapernaum. IV.

⁶⁰Asa torop ma sian angka siseanna na umbegesa mandok: Hata na kasar do i; ise pabegebege i?

⁶¹Alai diboto Jesus ma di bagasan rohana, naung marmungutmungut angka siseanna siala hata i, jadi didok ma tu nasida: Tung ala ni i do hamu targasip?

⁶²Beha nama, anggo idaonmuna Anak ni jolma i manaek tu ingananna hian? [135†]

⁶³Tondi i do na pangoluhon; ndang marguna anggo daging i. Angka hata naung huhatahon tu hamu, Tondi do i dohot hangoluan. [136†]

⁶⁴Alai adong do deba sian hamuna na so porsea; ai diboto Jesus do sian mulana nasida na so olo porsea, ro di na naeng manjehehon Ibana. [137†]

⁶⁵Jadi ninna ma: Dibahen i ma umbahen na hudok tu hamu, na so tarbahen manang ise manopot Ahu, ia so Damang i mangalehonsa tu ibana. [138†]

⁶⁶Lan ma angka siseanna i manundalhon Ibana olat ni i; ndang be didongani nasida Ibana.

⁶⁷Dung i didok Jesus ma mandok na sampuludua i: Nda tung dohot hamu naeng laho?

⁶⁸Gabe dialusi si Simon Petrus ma Ibana: Tung tu ise ma hami laho, ale Tuhan? Di Ho do hata hangoluan sisalelenglelengna! [139†]

⁶⁹Jala nunga huhaporseai jala hutanda hami: Ho do na badia ni Debata! [140†]

⁷⁰Dung i dialusi Jesus ma nasida, ninna ma: Nda sampuludua do hamu naung hupillit i? Hape sada sian hamu gabe sibolis!

⁷¹Si Judas, anak ni si Simon, halak Iskariot i, do na nidokna disi, ai i do na manjehehon Ibana muse; sada sian na sampuludua i do ibana.