Read Batak Toba JOHANNES 7 Bible Online

JOHANNES 7 - Batak Toba bible

JOHANNES 7

¹I. [1] Dung salpu i, diadangi Jesus ma luat Galilea, ai ndang olo Ibana mardalani di Judea, ala naeng bunuon ni halak Jahudi Ibana. [141†]

²Alai jonok do pesta parlapelapean ni Jahudi.

³Jadi didok angka anggina i ma mandok Ibana: Borhat ma Ho sian on laho tu Judea, asa dohot siseanmi marnida angka ulaon na pinatupami! [142†]

⁴Ai ndada di na holip diula halak sibahenonna, anggo naeng tu hapataran ibana. Anggo sapala diula Ho angka na songon i, papatar antong dirim tu portibi on!

⁵Ai nang angka anggina, ndang porsea di Ibana.

⁶Dung i ninna Jesus ma mandok nasida: Ianggo tingkingki ndang dope jumpang; alai anggo tingkimuna tongtong do dapot anggo i. [143†]

⁷Didia ma hosoman ni portibi on hamu; anggo Ahu dihosomi do, ala Ahu mangkatindangkon, paboa na jahat angka pambahenanna. [144†]

⁸Hamu ma nangkok marpesta; ianggo Ahu, ndang nangkok tu pesta on, ai ndang dope jumpang tingkingki.

⁹Dung songon i hatana, tading ma Ibana di Galilea.

¹⁰Alai dung nangkok angka anggina i marpesta, nangkok muse ma nang Ibana; ndang apala patar, tar songon na buni do.

¹¹Asa dilului angka Jahudi ma Ibana di pesta i, angka ninna do: Ai didia do Ibana?

¹²Jadi sai dihatahatai natorop ma Ibana; adong do na mandok: Parroha na denggan do Ibana; alai na asing muse mandok: Nda tung, na mangaliluhon natorop do Ibana.

¹³Alai ndang adong na hum papatarhon hatana taringot tu Ibana, dibahen biarnasida mida Jahudi i. [145†] II.

¹⁴Nunga pola salpu satonga ni angka ari ni pesta i, asa laho Jesus tu bagas joro mangajari.

¹⁵Gabe longang ma angka Jahudi, didok ma: Sian dia ma diboto On hata ni Debata, so manang diguruhon? [146†]

¹⁶Jadi didok Jesus ma tu nasida: Anggo podangku, ndada sian Ahu sandiri, sian na marsuru Ahu do.

¹⁷Ganup na olo mangulahon pinangido ni roha ni I, botoonna ma, manang na sian Debata podangki, manang na huhatahon i sian diringku sambing.

¹⁸Ganup na mangkatahon sian dirina, sangapna do niluluanna; alai na mangalului sangap ni na marsuru ibana, i do parsintong, ndang adong na geduk di bagasan ibana. [147†]

¹⁹Nda dilehon si Musa patik i tu hamu? Hape ndang adong nanggo sada sian hamu na mangaradoti patik i. Boasa ditahi rohamuna mamusa Ahu? [148†]

²⁰Dung i ninna natorop i ma: Na sibolison do Ho! Tung ise ma tumahi mamusa Ho? [149†]

²¹Dung i ninna Jesus ma mangalusi nasida: Hupatupa sada ulaon, gabe longang hamu saluhutna. [150†]

²²Onpe, dilehon si Musa tu hamu ruhut parsunaton (ndang nian sian si Musa parmulaanna, na sian angka ompu i do), gabe, disunat hamu halak nang di ari Sabbat. [151†]

²³Asa tarsunat do hape jolma jumpa ari Sabbat, unang dilaosi patik ni si Musa; tung Ahu ma muruhanmuna, ala hibul jolma i hupamalum jumpa ari Sabbat?

²⁴Unang ma marguru tu na niida sambing uhummuna, tigor ma panguhummuna!

²⁵Dung i ninna deba sian isi ni Jerusalem ma: Nda Ibana i, na naeng bunuonnasida? [152†]

²⁶Ndi, tullom ni hatana i! So manang aha didok nasida tu Ibana. Atik naung torang ulaning diboto angka sintuanta, Ibana tutu Kristus?

²⁷Alai tahe, taboto do haroroan ni Halak on. Alai molo ro Kristus i, ndang dapot botoon, manang sian dia haroroanna. [153†]

²⁸Dung i dipagogo Jesus ma soarana mangajari di bagas joro i, ninna ma: Olo tutu, ditanda hamu do Ahu jala diboto hamu do haroroanki. Ndang na ro Ahu sian diringku, alai adong do Parsintong i, na marsuru Ahu, na so tinandamuna.

²⁹Alai anggo Ahu hutanda do Ibana, ai sian Ibana do Ahu; Ibana do marsuru Ahu. [154†]

³⁰Dung i dilului nasida ma dalan manangkup Ibana; alai ndang adong na mangalaluhon tanganna tu Ibana, ai ndang dope jumpang tingkina. [155†]

³¹Alai lan do sian natorop gabe porsea di Ibana, angka ninna do: Molo ro Kristus, tagamon gumodang tanda patupaonna sian na binahen ni On? [156†]

³²Dibege Parise i ma angka hata ni natorop i na taringot tu Ibana, jadi disuru angka sintua ni malim dohot Parise i ma angka opas manangkup Ibana.

³³Jadi ninna Jesus ma: Sangombasnari nama Ahu rap dohot hamu; dung i laho ma Ahu manopot na marsuru Ahu. [157†]

³⁴Luluanmuna ma Ahu; alai ndang dapot, ai ndang tarbahen hamu ro tu sitopotonki. [158†]

³⁵Jadi ninna angka Jahudi ma sama nasida: Tudia ma naeng laho Ibana, umbahen so jumpang hita Ibana? Naeng laho Ibana ulaning tu dongan na mangaranto di Junani dohot mangajari halak Junani i?

³⁶Hata dia do i na nidokna: Luluanmuna ma Ahu, alai ndang dapot; jadi: ndang tartopot hamu tu sitopotonki?

³⁷Dung i di ari pesta na parpudi na sumangap i, jongjong ma Jesus disi, dipagogo ma soarana mandok: Molo adong na mauas, tu Ahu ma ibana ro minum! [159†]

³⁸Songon na nidok ni Surat i: Angka batang aek na mangolu do mabaor sian na porsea di Ahu. [160†]

³⁹Alai taringot tu Tondi i do didok hata ondeng, i ma sijaloon ni angka na gabe porsea di Ibana; ai ndang dope ro Tondi Parbadia, ala so dipasangap dope Jesus. [161†]

⁴⁰Jadi deba sian natorop na umbege hata i mandok: On do tutu Panurirang i! [162†]

⁴¹Deba nari mandok: Kristus do Ibana! Alai adong na asing na mandok: Tung luat Galilea ma haroroan ni Kristus? [163†]

⁴²Nda didok Surat i: Sian pomparan ni si Daud, jala sian huta Betlehem, na niinganan ni si Daud nahinan, ro Kristus i? [164†]

⁴³Jadi marsalisi ma natorop ala Ibana. [165†] III.

⁴⁴Deba sian nasida naeng manangkup Ibana; alai ndang adong na mangalaluhon tangan tu Ibana. [166†]

⁴⁵Dung i mulak ma angka opas tu angka sintua dohot tu Parise i, gabe didok nasida ma: Boasa so diboan hamu Ibana?

⁴⁶Jadi mangalusi ma angka opas i: Ndang dung dope adong halak na marjamita songon Ibana. [167†]

⁴⁷Dung i dialusi angka Parise i ma nasida: Tung dohot ma hamu dipaotooto?

⁴⁸Ai adong do porsea di Ibana sada sian angka sintua manang Parise?

⁴⁹Holan natorop do, na so umboto patik i; naung hona toru do nasida.

⁵⁰Dung i ninna si Nikodemus, dongannasida sahalak, i do na ro uju i manopot Jesus, didok ma tu nasida: [168†]

⁵¹Ai diuhumi patikta i do halak, ia so jolo tinangihon hatana, gabe binoto na niulana? [169†]

⁵²Dung i ninna nasida ma mangalusi ibana: Naung dohot do ho huroha halak Galilea? Pamanat ma antong jala ida, na so adong hehe panurirang sian luat Galilea! [170†]

⁵³Laos masitopot jabuna be ma nasida.