Read Batak Toba JOHANNES 9 Bible Online

JOHANNES 9 - Batak Toba bible

JOHANNES 9

¹I. [1] Dung i di na mamolus i Ibana, diida ma sada halak na mapitung tubu.

²Gabe ninna angka siseanna ma manungkun Ibana: Ale Guru, ise do na mardosa, halak on do manang natorasna, umbahen na mapitung ibana tubu? [198†]

³Jadi dialusi Jesus ma: Ndada ala ni dosana manang ala ni dosa ni natorasna; alai naeng gabe patar angka ulaon ni Debata di ibana. [199†]

⁴Ingkon ulaonku do ulaon ni na marsuru Ahu, saleleng arian; ai dung ro borngin, ndang tarbahen mangula disi manang ise. [200†]

⁵Panondang ni portibi on do Ahu, tagan di portibi on Ahu. [201†]

⁶Jadi dung didok songon i, ditijuri ma tano i mambahen gambo marhite sian ijurna i, didalohon ma gambo i tu matana. [202†]

⁷Dung i didok ma tu ibana: Laho ma ho marsuap tu dano Siloam (na mandok: Na sinuru)! Jadi laho ma ibana marsuap, gabe marnida ma ibana mulak.

⁸Dung i didok hombar bagasna ma ro di angka na marnida ibana najolo mangidoido: Nda on do na somal hundul mangidoido?

⁹Jadi adong ma deba na mandok: Ibana do i! Alai na deba mandok: Ndangana, suman do ibana tusi. Didok ibana do: Ahu do i!

¹⁰Dung i ninna nasida ma: Beha do hamumungkap ni matami?

¹¹Jadi didok ma mangalusi: Halak i na margoar Jesus, i do pauli gambo, didalohon ma i tu matangku, jadi disuru ahu marsuap tu dano Siloam; dung i laho ahu tusi marsuap, jadi marnida ma.

¹²Dung i ninna nasida ma tu ibana: Didia do Ibana? Jadi didok ma: Ndang huboto!

¹³Gabe ditogihon nasida ma halak na mapitung hian tu angka Parise. II.

¹⁴Alai ari Sabbat do tongon, uju dipauli Jesus gambo i dohot mangungkap matana i. [203†]

¹⁵Laos disungkun angka Parise i ma tu ibana pangalahona, umbahen marnida ibana. Jadi didok ma tu nasida: Gambo do didalohon tu matangki, dung i marsuap ahu jadi marnida ma!

¹⁶Dung i didok na deba sian angka Parise i ma: Ndang na sian Debata Halak i, ai ndang dijujur Ibana ari Sabbat i. Angka na asing mandok: Tung tarpatupa halak sipardosa ma tanda sisongon i? Jadi marsalisi ma nasida sama nasida. [204†]

¹⁷Dung i didok nasida ma muse tu na mapitung hian: Ia ho, dia ma pandokmu taringot tu Ibana, ala diungkap matami? Jadi didok ma: Panurirang do Ibana!

¹⁸Jadi ndang diparhatutu angka Jahudi i, ibana do na mapitung i najolo, gabe marnida muse, pola do dijou nasida natoras ni naung marnida i.

¹⁹Jadi disungkun ma nasida: Anakmuna do on tahe, na nidokmuna na mapitung tubu i? Na boha do gabe marnida ibana nuaeng?

²⁰Dung i ninna natorasna i ma mangalusi nasida: Na huboto hami do on anaknami jala na mapitung do ibana tubu.

²¹Alai ndang huboto hami, manang beha pangalahona gabe marnida; ba, ndang hutanda hami na mangungkap matana. Ibana ma sungkun hamu; nunga tang dagingna, botoonna do mandok sidohononna.

²²Ai mabiar mida Jahudi i do natorasna, umbahen na didok songon i. Ai nunga mardos ni roha angka Jahudi, ingkon sipabalion do sian huria ganup na marhatopothon, Kristus Ibana. [205†]

²³Dibahen i do umbahen na didok natorasna i: Nunga tang dagingna; ibana ma sungkun hamu!

²⁴Dung i dijou nasida ma paduahalihon halak na mapitung hian, didok ma tu ibana: Pasangap ma Debata! Huboto hami do, pardosa Halak i. [206†]

²⁵Dung i ninna ibana ma mangalusi: Manang na pardosa Ibana, ndang huboto. Holan on do na huboto: Na mapitung do ahu najolo, alai na marnida do anggo nuaeng.

²⁶Gabe ninna nasida ma mandok ibana: Ai aha do dibahen tu ho; beha do dibahen mangungkap matami?

²⁷Jadi dialusi ma nasida: Nunga hupaboa i tu hamu; na so dibege hamu do i? Naeng begeonmuna i muse? Naeng gabe siseanna nang hamu?

²⁸Dung i disurahi nasida ma ibana, ninna ma: Ho do siseanna; anggo hami sisean ni si Musa do.

²⁹Huboto hami do, si Musa diangkupi Debata mangkatai; alai anggo Halak on, ndang binoto, manang sian dia Ibana.

³⁰Gabe dialusi ibana ma nasida: Longang do rohangku disi, na so binotomuna, manang na sian dia Ibana, hape diungkap do matangku!

³¹Taboto do, na so ditangihon Debata angka pardosa, alai halak na mangkabiari Debata jala mangulahon pinangido ni rohana, i do ditangihon. [207†]

³²Sian mula ni tano on ndang dung binege, adong na mangungkap mata ni halak na mapitung tubu.

³³Aut so sian Debata Ibana, ndang tarpatupasa agia aha. [208†]

³⁴Dung i ninna nasida ma mangalusi ibana: Hibul do ho tubu di bagasan dosa, hape naeng ajaranmu hami! Jadi dipabali nasida ma ibana. [209†] III.

³⁵Dibege Jesus ma, naung dipabali nasida ibana, jadi ninna ma mandok ibana, dung jumpangsa: Na porsea do ho di Anak ni jolma i?

³⁶Dung i ninna halak i ma mangalusi: Ai ise do i, Tuhan, asa huhaporseai Ibana?

³⁷Jadi didok Jesus ma tu ibana: Na niidam, na mangkatai dohot ho, I ma Ibana. [210†]

³⁸Gabe didok ma: Na porsea do ahu, ale Tuhan! Laos disomba ma Ibana.

³⁹Dung i didok Jesus ma: Mamboan uhum do, umbahen na ro Ahu tu portibi on, asa marnida angka na so marnida hian, jala asa gabe mapitung angka na marnida. [211†]

⁴⁰Jadi dibege na deba sian angka Parise na rap dohot Ibana ma i, jadi didok ma tu Ibana: Nda tung dohot hami mapitung?

⁴¹Jadi didok Jesus ma tu nasida: Aut na mapitung hamu, gabe so mardosa hamu. Alai didok hamu do: Na marnida do hami, gabe hot ma dosamuna. [212†]