Read Batak Toba ULAON NI APOSTEL 10 Bible Online

ULAON NI APOSTEL 10 - Batak Toba bible

ULAON NI APOSTEL 10

¹I. [1] Alai adong ma di Kaesarea sada halak na margoar Kornelius, letnan do ibana, masuk horong Italia. [203†]

²Na daulat do ibana jala mangkabiari Debata rap dohot sandok isi ni bagasna; godang do asiasina diparlehon tu bangso i jala ondop do ibana martangiang tu Debata. [204†]

³Jadi torang ma diida di bagasan tondina tar di pungkul tolu arian i, ro surusuruan ni Debata manopot ibana, didok ma tu ibana: O Kornelius!

⁴Alai marnida i ibana, biar ma rohana, huhut ma didok: Ai aha, Tuhan? Gabe ninna ma: Nunga sahat tu parningotan di jolo ni Debata angka tangiangmi ro di angka asiasimi. [205†]

⁵Onpe, suru ma halak tu Joppe, mangalap si Simon na margoar Petrus.

⁶Na sorang di si Simon sipauli hulingkuling, parjabu di topilaut. [206†]

⁷Asa disi laho surusuruan na mangkatai dohot ibana, dijou ma naposona dua halak dohot soldadu sada na daulat roha sian angka na di lambungna.

⁸Dipajojor ma saluhutna i tu nasida, laos disuru ma nasida tu Joppe. II.

⁹Alai marsogotna i, uju di tongandalan dope nasida ondeng laho mandapothon huta i, manaek ma si Petrus tu bilut parginjang martangiang di hos ni ari. [207†]

¹⁰Gabe male ma ibana, naeng ma mangan. Jadi tagan marhobasi nasida di ibana, adong ma niidana di bagasan tondina: [208†]

¹¹Diida ma mungkap langit, dung i mijur ma sian i sada inganan na songon dagangan na bidang, na martali di suhisuhina na opat i, ditantan tu toru. [209†]

¹²Di bagasan ni i adong ma ragam ni siopatpat dohot angka na manjirir di tano ro di angka pidong na martongatonga langit.

¹³Dung i tarbege ma soara, na mandok tu ibana: Hehe ma ho, Petrus; seseati ma, pangan ma!

¹⁴Alai ninna si Petrus ma: Tongka, Tuhan! Ai ndang dung hupangan na ramun manang na so ias. [210†]

¹⁵Dung i ro muse ma soara paduahalihon mandok tu ibana: Unang ramun dok naung niiasan ni Debata! [211†]

¹⁶Tolu hali ma masa songon i, dung i mamintor ma tarhindat dagangan i tu ginjang.

¹⁷Bohabohaon dope roha ni si Petrus, manang dia lapatan ni na niidana i, nunga jongjong di jolo pintu i na sinuru ni si Kornelius i, dung dipausoi nasida bagas ni si Simon i.

¹⁸Jadi joujou ma nasida manungkun, manang na sorang disi si Simon na margoar Petrus.

¹⁹Alai di na marhusari dope roha ni si Petrus taringot tu na niidana i, ninna Tondi i ma mandok ibana: Adong do na mangalului ho! [212†]

²⁰Hehe ma ho, mijur ma, dongani nasida; unang ganggu roham, ai Ahu do marsuru nasida! III.

²¹Jadi mijur ma si Petrus mandapothon halak i, ninna ma: Ahu do na niluluanmuna! Dia do alana, umbahen na ro hamu?

²²Dung i didok nasida ma: Ia si Kornelius, i ma sada letnan, halak na tigor roha na mangkabiari Debata, na uli baritana di saluhut halak Jahudi; dapot parenta do sian surusuruan na badia; suruonna, ninna, mangalap ho tu jabuna, tumangihon hata sian ho.

²³Jadi diarahon ma nasida tu bagas, ditamuei ma. Manogotna i borhat ma ibana rap dohot nasida; dohot ma deba sian angka dongan na sian Joppe mandongani ibana. [213†]

²⁴Marsogotna i muse sahat ma nasida tu Kaesarea. Alai nunga maimaima hian si Kornelius, jala nunga dipapungu angka donganna samarga dohot angka alealena na sumolhot.

²⁵Asa di na bongot i si Petrus, ditomu si Kornelius ma ibana, marsinggang ma huhut sumomba ibana.

²⁶Alai dipahehe si Petrus do ibana, ninna ma: Hehe ma ho; jolma do nang ahu! [214†]

²⁷Dung i mangkatai ma nasida laho bongot, jadi torop ma pungu disi didapot.

²⁸Dung i didok ma tu nasida: Diboto hamu do, subang bolon do i di halak Jahudi mandongani manang manopot halak na sian bangso na asing. Alai diajari Debata do ahu, na so jadi goaron jolma dia pe ramun manang so ias.

²⁹Ala ni i umbahen na so manjua ahu ro, di na taralap i ahu. Antong, na manungkun ma ahu nuaeng: Ala ni hata dia do umbahen na dialap hamu ahu?

³⁰Jadi didok si Kornelius ma: Opat ari ma nuaeng, boho songon on ari, di pungkul tolu, martangiang ahu di bagashon, jadi jongjong ma di jolongku sahalak parulos na marlinanglinang. [215†]

³¹Na mandok: Ale Kornelius, ditangihon Debata do tangiangmi, laos diingot do angka asiasimi.

³²Antong, suru ma tu huta Joppe na manjou si Simon na margoar Petrus, na sorang di jabu ni si Simon, sipauli hulingkuling na di topilaut, ninna.

³³Jadi mamintor ma ahu marsuru mangalap ho; denggan do antong dibahen ho, ala ro ho. Nuaeng pe, nunga pungu hami saluhutna dison di jolo ni Debata, tumangihon saluhutna na nidokkon ni Tuhan i tu ho.

³⁴Dung i mangkuling ma si Petrus, ninna ma: Nunga tangkas dapot rohangku, na so siida bohi Debata! [216†]

³⁵Sian ganup bangso do tahe jangkononna angka na mangkabiari Ibana jala mangulahon hatigoran. [217†]

³⁶Ditongos Ibana do hatana tu angka anak Israel, laho mamaritahon dame marhite sian Jesus Kristus; Ibana do Tuhan ni saluhutna. [218†]

³⁷Diboto hamu do hata na masa di liat tano Judea na mamungka sian luat Galilea, dung salpu pandidion na binaritahon ni si Johannes i. [219†]

³⁸I ma taringot tu Jesus na sian Nasaret, na miniahan ni Debata marhitehite Tondi Parbadia dohot hagogoon; na mardalani do Ibana mambahen na denggan jala pahisarhon sude angka na pinatunduk ni sibolis, ai didongani Debata do Ibana. [220†]

³⁹Hami do mangkatindangkon saluhut pambahenanna i di tano Jahudi dohot di Jerusalem; dipusa nasida Ibana, digantungkon do tu hau. [221†]

⁴⁰Dipahehe Debata do Ibana di ari patoluhon, dilehon do Ibana tu hapataron, [222†]

⁴¹ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate. [223†]

⁴²Jala didokkon do hami manjamitahon dohot mangkatindangkon tu natorop, paboa Ibana do i, na tinodo ni Debata hian gabe panguhum di angka na mangolu ro di angka na mate. [224†]

⁴³Saluhut panurirang i mangkatindangkon taringot tu Ibana: Jaloon ni ganup na porsea di Ibana hasesaan ni dosa marhite sian Goarna. [225†]

⁴⁴Jadi andorang dihatahon si Petrus hata ondeng, songgop ma Tondi Parbadia tu saluhut nasida na umbege hata i. [226†]

⁴⁵Jadi longang ma roha ni angka na porsea, halak Jahudi hian, dongan ni si Petrus i, ala diusehon silehonlehon ni Debata, i ma Tondi Parbadia i, nang tu halak sipelebegu. [227†]

⁴⁶Ai dibege do nasida mangkatahon di hata na asing dohot mamuji Debata. [228†]

⁴⁷Jadi didok si Petrus ma: Hum ma roha mangorai didion nasida on, angka naung manjalo Tondi Parbadia i songon hami? [229†]

⁴⁸Gabe didokkon ma didion nasida marhitehite Goar ni Tuhan Jesus Kristus. Dung i dielehelek ma ibana, asa olo ibana jolo mian di nasida. [230†]