Read Batak Toba ULAON NI APOSTEL 11 Bible Online

ULAON NI APOSTEL 11 - Batak Toba bible

ULAON NI APOSTEL 11

¹I. [1] Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.

²Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma: [231†]

³Bongot do ho hape tu angka halak na so tarsunat, jala rap mangan do ho dohot nasida! [232†]

⁴Alai jojor sian mulana ma dipatorang si Petrus na masa i, ninna ma:

⁵Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku. [233†]

⁶Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.

⁷Jadi hubege ma soara na mandok tu ahu: Hehe ma ho, Petrus; seseati ma, pangan ma!

⁸Alai ningku ma: Tongka, Tuhan! Ai ndang dung hudai na ramun manang na so ias.

⁹Alai mangalusi ma soara i paduahalihon sian ginjang: Unang ramun dok naung niiasan ni Debata!

¹⁰Ro di tolu hali do masa songon i dung i ditait ma saluhutna i muse tu ginjang.

¹¹Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu. [234†]

¹²Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i. [235†]

¹³Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus!

¹⁴Hatahonon ni i do tu ho hata na tau paluahon ho ro di sandok isi ni jabum! [236†]

¹⁵Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i. [237†]

¹⁶Disi ma huingot hata ni Tuhan i na nidokna i: “Aek do dididihon si Johannes, alai Tondi Parbadia do didihononhon tu hamu!” [238†]

¹⁷Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?

¹⁸Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu! [239†] II.

¹⁹Alai anggo angka na marserak i hinorhon ni pangaleleon siala si Stepanus, torus ma didalani luat Penisia sahat ro di pulo Siprus dohot Antiokia; alai holan tu Jahudi sambing dope dibaritahon nasida hata i. [240†]

²⁰Alai adong do tahe deba sian nasida, halak Siprus dohot Kirene, na sahat ro tu Antiokia, gabe dibaritahon Tuhan Jesus disi nang tu halak Junani.

²¹Jadi didongani tangan ni Tuhan i nasida: Jala na nia toropnasida gabe porsea, angka na mandompakkon Tuhan i. [241†]

²²Pola tarbege baritanasida tu huria na di Jerusalem i, gabe disuru nasida ma si Barnabas tu Antiokia. [242†]

²³Tolhas ma ibana tusi, jadi diida ma asi ni roha ni Debata, gabe las ma rohana; laos diapoi ma sasude, asa marsihohot rohanasida mian di Tuhan i. [243†]

²⁴Ai tung halak na denggan roha do ibana, gok Tondi Parbadia dohot haporseaon, gabe ganda ma torop halak tartogu tu Tuhan i. [244†]

²⁵Dung i borhat ma ibana laho tu huta Tarsus mangalului si Saulus; jadi dung jumpangsa, ditogihon ma tu Antiokia. [245†]

²⁶Gabe rap ma nasida mian di huria i sataon lelengna, torop ma halak diajari disi; laos di Antiokia parjolo targoar angka sisean i halak Kristen. [246†] III.

²⁷Alai tuat ma uju i angka panurirang sian Jerusalem tu huta Antiokia. [247†]

²⁸Jadi hehe ma sada sian nasida na margoar Agabus, disurirangkon ma marhitehite Tondi i masa ni haleon potir tu liat portibi on; i ma na songgop uju hinarajahon ni si Klaudius. [248†]

²⁹Dung i dituptup angka sisean i ma manongos tumpak, marguru tu na tarpatupasa be, tu angka dongan na maringanan di Judea. [249†]

³⁰Saut ma i dibahen, ditongos ma i tu angka sintua i marhitehite tangan ni si Barnabas dohot si Saulus. [250†]