Read Batak Toba ULAON NI APOSTEL 12 Bible Online

ULAON NI APOSTEL 12 - Batak Toba bible

ULAON NI APOSTEL 12

¹I. [1] Tar di tingki i ma dilaluhon raja Herodes tanganna tu deba na sahuria i paporsukporsukkon nasida. [251†]

²Podang do dibahen mambunu si Jakobus, dongan saama ni si Johannes i. [252†]

³Jadi dung diida, lomo roha ni Jahudi disi, didatdati ma, ditangkup ma dohot si Petrus, tongon di angka ari ni pesta Paska i. [253†]

⁴Jadi dung ditangkup, didabu ma ibana tu hurungan, dipasahat ma ibana tu opat hali opat soldadu panjaga; ditahi rohana, naeng togihononna ibana tujolo ni natorop, dung salpu pesta Paska i.

⁵Asa dijaga nasida do si Petrus di hurungan i; alai sai didatdati huria i do tumangiangkon ibana tu Debata. [254†] II.

⁶Dung i di na naeng togihonon ni Herodes si Petrus, modom do ibana borngin i di holangholang ni dua soldadu, tarihot dohot rante dua; di jolo pintu ni hurungan i pe adong do na manjaga.

⁷Dung i tompu ma ro surusuruan ni Tuhan i jadi marsinondang ma sada panondang di bilut i, dituktuk ma lambung ni si Petrus manungguli ibana, huhut didok: Hatop ma ho hehe! Jadi marpeutan ma angka rante i sian tanganna. [255†]

⁸Dung i didok surusuruan i ma tu ibana: Hohosi ma dagingmi, pasang ma sipatumi! Jadi dibahen ma songon i. Dung i didok ma tu ibana: Uloshon ulosmi; ihuthon ma ahu!

⁹Dung i diihuthon ma ibana laho tu balian, jadi ndang diboto, manang na tutu do songon i masa tu ibana marhite sian surusuruan i; dirimpu do, di bagasan tondina diida i.

¹⁰Alai dung dibolus nasida panjaga na parjolo dohot na paduahon i, sahat ma nasida tu harbangan bosi, dalan tu huta. Jadi mungkap boti ma i di jolonasida, gabe ruar ma nasida tu dalan di huta i, dung i pintor sirang ma surusuruan i sian ibana.

¹¹Jadi dung tarjolma si Petrus, ninna ma: I pe asa huboto situtu, naung disuru Tuhan i do surusuruanna mangaroro ahu sian tangan ni si Herodes dohot sian nasa na niarop ni bangso Jahudi. [256†]

¹²Jadi dung tangkas i di ibana, laho ma ibana tu bagas ni si Maria, ina ni si Johannes na margoar huhut Markus; torop do disi marpungu martangiang. [257†]

¹³Alai dung dituktuhi ibana pintu parduru, ro ma naposo boruboru na margoar Rode mananginangi.

¹⁴Ditanda ma soara ni si Petrus alai ndang manigor diungkap pintu i dibahen las ni rohana; tu bagasan do ibana marlojong paboahon, naung jongjong do hape si Petrus di jolo pintu i.

¹⁵Gabe didok nasida ma tu ibana: Na rintik do ho; alai sai diondolhon do hatana i, jadi didok nasida nama: Surusuruanna do i. [258†]

¹⁶Alai sai didatdati si Petrus do manuktuhi; jala di na mangungkap i nasida, diida ma ibana, gabe tarhalomong ma rohanasida.

¹⁷Alai dihiraphon ma tanganna tu nasida, asa sip; dung i dipajojor ma tu nasida pambahen ni Tuhan i, manogihon ibana ruar sian hurungan i, laos didok ma: Baritahon hamu ma i tu si Jakobus dohot tu angka dongan. Dung i laho ma ibana tumopot inganan na asing. [259†]

¹⁸Alai dung torang ari, gaor situtu ma roha ni angka soldadu i taringot tu na masa di si Petrus i. [260†]

¹⁹Alai dung so jumpang si Herodes ibana, atik pe dilului, diuhumi ma angka panjaga i, didokkon ma togihononhon nasida tu hamatean; laos bungkas ma anggo ibana sian Judea tu Kaesarea, jadi disi nama ibana na maringan.

²⁰Dung i marmusumusu ma ibana dompak isi ni Tirus dohot Sidon; alai saroha ma nasida manopot ibana, diellemellem ma si Blastus, naposo haposan ni raja i. Mangido mardame nasida, ala sian tano ni raja i bohal ni luatnasida. [261†] III.

²¹Dung i di ari na tiniti dipangke Herodes ma ulos harajaonna jadi hundul ma di habangsana manariashon hatana tu nasida.

²²Gabe dijouhon natorop i ma: Soara ni Debata do i, ndada soara ni jolma! [262†]

²³Alai pintor dipastap surusuruan ni Debata ma ibana, ala so dilehon hasangapon tu Debata; jadi dipangan gulok ma ibana, laos mate. [263†]

²⁴Alai lam rarat ma anggo hata ni Debata. [264†]

²⁵Jadi mulak ma si Barnabas dohot si Saulus sian Jerusalem i, dung dipasahat, nasida asiasi i! Diboan ma si Johannes na margoar si Markus. [265†]