Read Batak Toba ULAON NI APOSTEL 19 Bible Online

ULAON NI APOSTEL 19 - Batak Toba bible

ULAON NI APOSTEL 19

¹I. [1] Alai uju di huta Korint si Apollos, didalani si Paulus ma angka luat na tungkan dolok sahat ro di huta Epesus, jadi jumpangsa ma disi deba sisean. [406†]

²Dung i ninna ma mandok nasida: Naung dijalo hamu do Tondi Parbadia, di na gabe porsea hamu? Alai ninna nasida ma mandok ibana: So hea hubege hami, adong Tondi Parbadia! [407†]

³Dung i ninna ma: Ai pandidion dia do dijalo hamu? Jadi didok nasida ma: Pandidion ni si Johannes do. [408†]

⁴Dung i didok si Paulus ma: Ia pandidion ni si Johannes, na mandokkon paubahon roha do; ai diapoi do natorop i mangkaporseai na naeng ro sian pudina, i ma Jesus. [409†]

⁵Umbege i nasida, dipadidihon be ma dirina tubagasan Goar ni Tuhan Jesus. [410†]

⁶Jadi di na mangampehon tanganna si Paulus tu nasida, songgop ma Tondi Parbadia tu nasida, jadi mangkatahon di hata na asing ma nasida dohot manurirangi. [411†]

⁷Alai intap sampuludua halak do nasida pungu.

⁸Dung i laho ma ibana tubagasan parguruan, hiras ma rohana marjamita disi leleng ni tolu bulan; dipatorang jala dipasingothon pangalaho ni harajaon ni Debata.

⁹Alai dipajogal na deba do rohana jala ndang mangoloi huhut dope manginsahi agama i di jolo ni natorop i, jala ditadingkon ibana ma nasida; dipapulik ma angka sisean i, jadi di sikola ni si Tiranus ma ibana marjamita ganup ari. [412†]

¹⁰Leleng ni dua taon ma sai songon i gabe sange ma dibege saluhut pangisi ni luat Asia hata ni Tuhan i, nang Jahudi nang Junani pe. [413†]

¹¹Jala angka hagogoon na sumurung do diula Debata marhite sian tangan ni si Paulus. [414†]

¹²Pola do dipamboan halak angka sekka dohot sampesampe na sian dagingna tu angka na hansitan i, gabe munsat do angka sahit sian nasida, ruar do nang angka tondi na hodar. [415†]

¹³Jadi adong ma deba Jahudi na maotaot, angka sipabali begu, na manguji mangkatahon Goar ni Tuhan Jesus tu angka partondi na hodar i, angka ninna ma: Mangasahon Jesus, na binaritahon ni si Paulus i, hupabali ma hamu! [416†]

¹⁴Angka anak ni si Sikewa, sada malim ni Jahudi, pitu halak do na mambahensa.

¹⁵Alai ninna tondi na hodar i ma mangalusi nasida: Na hutanda do anggo Jesus i, si Paulus pe huboto do; alai anggo hamu, ise do hamu?

¹⁶Laos ditahopi jolma partondi na hodar i ma nasida, dipatunduk ma nasida duansa, digosagosa, pola marsaemara jala mabugang nasida maporus sian jabu i.

¹⁷Jadi diboto saluhut halak Jahudi ma i ro di halak Junani na maringanan di huta Epesus, gabe songgop ma biar tu rohanasida saluhut, jadi tongam ma Goar ni Tuhan Jesus. [417†]

¹⁸Jadi torop sian angka naung gabe porsea ro manopoti jala paboahon bahenbahenannasida. [418†]

¹⁹Jala lan do sian angka mangulahon hadatuon najolo palunggukkon angka pustaha i, disoksohi ma i di jolo ni saluhutna; dung i diasam ma argana, jadi dapot ma limapulu ribu rupia.

²⁰Songon i ma lam rarat jala lam hot hata i hombar tu hagogoon ni Tuhan i. [419†]

²¹Salpu i, ditahi roha ni si Paulus ma, naeng mardalan tu huta Jerusalem, mamolus sian luat Makedonia dohot Akaya; ai ninna ma: Ia dung sian i ahu, ingkon dohot ma huta Rom idaonku. [420†]

²²Jadi disuru ma dua halak parhobasna, i ma si Timoteus dohot si Erastus, tu luat Makedonia; alai anggo ibana mangulon dope jolo di Asia. [421†] II.

²³Alai tubu ma uju i guntur bolon siala agama i. [422†]

²⁴Ai adong ma sahalak tungkang perak na margoar Demetrius, sipauli angka bagas joro perak ni debata Artemis; na nia do pangomoan dipatongon tu angka pande i. [423†]

²⁵Dipapungu ibana ma angka pande i ro di angka pangulanasida, didok ma: Diboto hamu do, ale, sian ulaon on do sinadonganta.

²⁶Diida jala dibege hamu do, ndada holan di Epesus on, tung hira di sandok luat Asia dihatahatai jala dipabalik si Paulus on do torop halak, didok do: Ndang na tutu Debata, ia angka na pinauli ni tangan.

²⁷Jala ndada holan pandaramanta on tarmara laho mago; dohot do tahe debata Artemis na balga i, na sinomba ni liat Asia i dohot isi ni portibi on, gabe lea jorona jala ambolong hamuliaonna.

²⁸Alai umbege hata i, gok rimas ma rohanasida, jala gogo ma dijoujouhon: Na balga do Artemis ni halak Epesus!

²⁹Jadi guntur situtu ma nasida na sahuta i: Ria ma nasida manahopi bagas painonduran, laos disarat ma tusi si Gayus dohot si Aristarkus, halak Makedonia, dongan ni si Paulus i. [424†]

³⁰Jadi naeng ma laho si Paulus tu tongatonga ni halak i; alai ndang diloas angka sisean i.

³¹Pola dohot do deba sian angka pangituai sian luat Asia, alealena i, marsuru mangelehelek ibana, unang laho tu painonduran i.

³²Alai asingasing be do dipanjoujouhon nasida; ai tung na gaor do na pungu i, jala godangan do na so umboto, manang ala ni aha umbahen na marpungu. [425†]

³³Alai sian tongatonga ni natorop i dipajolo angka Jahudi ma si Aleksander, dung jolo diajari. Jadi dihiraphon ma tanganna, laho manariashon hatana tu natorop i.

³⁴Alai dung diboto nasida, halak Jahudi ibana, sada nama soara ni saluhutna, hira dua jom do lelengna dipanjoujouhon: Balga do Artemis ni halak Epesus!

³⁵Alai dipasonang juaratulis i ma natorop i, ninna ma: Hamu halak Epesus! Halak dia ma na so umboto, huta Epesus do parhalado di Artemis na balga i, nang di gombaranna na madabu sian ginjang!

³⁶Ndang na targaga i antong; dibahen i tama sonang hamu, unang pola tarsomong mambahen manang aha.

³⁷Ditogihon hamu do angka halak on tuson, so manang sisoro ugasan ni bagas joro manang panginsahi di debatanta i nasida.

³⁸Alai molo tung adong alualu ni si Demetrius dohot angka donganna pande dompak manang ise, adong do angka panguhuman dohot angka panggomgomi; disi ma nasida masialusan.

³⁹Alai molo na asing dilului hamu, di parluhutan i ma pinaputus i!

⁴⁰Atik beha dialuhon hita maon, ala ni guntur sisadari on; so haru adong paralaan na mambahen lias hita taringot tu na guntur on.

⁴¹Songon i ma hatana, pamulihon na pungu i.