Read Batak Toba ULAON NI APOSTEL 2 Bible Online

ULAON NI APOSTEL 2 - Batak Toba bible

ULAON NI APOSTEL 2

¹I. [1] Jadi dung jumpang ari palimapuluhon i (Pentakoste), pungu ma nasida saluhutna di sada inganan. [20†]

²Jadi masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i.

³Jadi tarida ma di nasida suman tu dila ni api na marjillamjillam, disonggopi ma ganup nasida. [21†]

⁴Gabe gok Tondi Parbadia ma nasida saluhutna, jadi mamungka marpangkuling na asing ma nasida, marguru tu pangalehon ni Tondi i tu nasida mangkatahonsa. [22†]

⁵Alai adong ma angka Jahudi na maringan di Jerusalem, halak na daulat sian saluhutna bangso na ditoru ni langit.

⁶Alai di na masa soara i, marpungu ma natorop i; jadi tarhalomong ma nasida, ai ganup umbege nasida mangkatahon di hatana be.

⁷Jadi tarmali ma nasida saluhutna jala longang, angka ninna ma: Nda halak Galilea saluhut nasida na mangkatai i? [23†]

⁸Boasa ganup hita umbege di hata hasomalanta be?

⁹Halak Partia dohot Media dohot Elamit dohot angka na maringanan di Mesopotamia, di Judea dohot di Kappadosia, di Pontus dohot di Asia. [24†]

¹⁰Di Prigia dohot di Pampilia, di tano Misir dohot di angka luat Libia na tungkan Kirene dohot halak Rom na maringanan dison, angka halak Jahudi ro di angka parguru,

¹¹angka halak Kreta dohot halak Arab; di hatanta be do itabege dihatahon nasida angka ulaon habalgaon ni Debata!

¹²Jadi tarhalomong ma nasida saluhutna, jut be ma rohana, angka ninna ma sama nasida: Na marhua do i ulaning?

¹³Alai manginsahi do na deba, angka ninna ma: Gok anggur na tonggi do nasida. II.

¹⁴Jadi hehe ma si Petrus rap dohot na sampulusada i, dipagogo ma soarana, dipanghulingi ma nasida: Hamu halak Jahudi jala sude hamu na maringanan di Jerusalem, boto hamu ma on, jala pasiat hamu ma hatangkon tu pinggolmuna!

¹⁵Ai apala na mabuk hami on, songon na tinuhashonmuna, ai pungkul sia dope nuaeng.

¹⁶Na hinatahon ni panurirang Joel do tahe na masa on; ai ninna do: [25†]

¹⁷“Di angka ari parpudi, ninna Debata, usehononku ma sian Tondingku, tu nasa na mardaging, gabe manurirangi ma angka anak dohot borumuna, maralatan ma angka dolidolimuna, jala marnipi ma angka natuatuamuna.”

¹⁸“Tu angka naposongku baoa dohot boruboru pe usehononku ma sian Tondingku di angka ari i, asa manurirangi nasida.”

¹⁹“Dung i patupaonku ma angka halongangan di ginjang di langit, angka tanda di toru, di tano i, i ma mudar dohot api dohot timus na marhalimontang.”

²⁰“Muba ma mata ni ari gabe mangkolom, dohot bulan i gabe songon mudar, patujolo ni haroro ni ari ni Tuhan i, na balga i.” [26†]

²¹“Jadi disi ma malua ganup na manjou Goar ni Tuhan i.” [27†]

²²Hamu angka halak Israel, tangihon hamu ma hata on: Dipatandaphon Debata do tu hamu Jesus na sian Nasaret i, hinorhon ni hagogoon, halongangan dohot tanda, angka na pinatupa ni Debata di tongatongamuna, songon naung binotomuna i.

²³Marhite sian tangan ni na so marpatik i digantungkon jala dipusa hamu Ibana, dung dipasahat Debata sian tahina na hot i dohot sian pamotoanna hian. [28†]

²⁴Ibana do dipahehe Debata, dung diharhari bernit ni hamatean, ai ndada na hatiopan hamatean i Ibana. [29†]

²⁵Ai marhahonaan tu Ibana do pandok ni si Daud: “Tongtong do huida Tuhanki di jolongku, ai di siamunhu do Ibana, asa unang humordit ahu.” [30†]

²⁶“Ala ni i las do rohangku jala marolopolop soarangku; dagingku pe maradian do huhut mangkirim.”

²⁷“Ai ndang pasombuonmu diringku di banua toru jala ndang loasonmu na badiami marnida habusukon.” [31†]

²⁸“Nunga dipabotohon Ho tu ahu angka dalan hangoluan, gohanmu do ahu halalas ni roha di adopanmi!”

²⁹Hamu angka dongan, na jadi ma ahu marhiras ni roha mandok tu hamu: Ia ompunta si Daud, na mate do ibana jala tartanom; di hita on do tanomanna rasirasa sadari on. [32†]

³⁰Antong, panurirang do ibana jala diboto do, naung diuarihon Debata tu ibana, pabangkitonna do pomparanna tu atas habangsana i. [33†]

³¹Asa sian pamotoanna hian dilumbahon ibana disi haheheon ni Kristus i, paboa na so pasombuon Ibana di banua toru jala na so idaon ni dagingna i habusukon.

³²I ma Jesus, naung pinahehe ni Debata; saluhut do hami mangkatindangkonsa. [34†]

³³Asa dung dipatimbul Debata Ibana tu siamunna, dijalo ma sian Ama i Tondi Parbadia na pinarbagabaga i, gabe diusehon ma i, songon naung niida jala binegemuna i. [35†]

³⁴Ai ndada si Daud i nangkok tu banua ginjang, alai didok ibana: “Ninna Tuhan i do mandok Tuhanku: Hundul ma Ho tu siamunhon,” [36†]

³⁵“paima hupatunduk angka musum, bahen sidegedegean ni patmu!”

³⁶Antong, tangkas situtu ma diboto sandok bangso Israel: Jesus na pinarsilangkonmuna, i ma bangkit Tuhan jala Kristus dibahen Debata! [37†] III.

³⁷Jadi umbege i, ditorushon ma rohanasida, dung i didok nasida ma tu si Petrus dohot tu angka donganna apostel: Aha nama sibahenonnami, ale angka dongan? [38†]

³⁸Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tubagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i. [39†]

³⁹Ai di hamu do bagabaga i dohot di angka anakkonmuna ro di saluhut angka na dao, manang piga na naeng jouon ni Tuhan Debatanta dope. [40†]

⁴⁰Lan dope hata na asing dihatindangkon ibana, laho mangapoi nasida, ninna do: Sai olo ma hamu malua sian bangso na geduk on! [41†]

⁴¹Asa tardidi ma angka na manjangkon hatana i, gabe arga toluribu ma torop ni halak na manamba di na sadari i. [42†]

⁴²Alai marsihohot do nasida di poda ni angka apostel marparsaoran, marulaon na badia jala martangiang. [43†]

⁴³Alai songgop ma biar tu roha ni saluhutna; masa ma lan halongangan dohot tanda di Jerusalem, dipatupa angka apostel i.

⁴⁴Alai sai domu do saluhut angka na porsea i, jala songon hatopan dirajumi nasida saluhut artanasida. [44†]

⁴⁵Tupa digadisi nasida arta dohot ugasannasida, disagihon ma tu saluhutna marguru tu haseana di ganup.

⁴⁶Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon. [45†]

⁴⁷Huhut mamuji Debata jala lomo do roha ni nasa natorop mida nasida. Alai ganup ari do ditambai Debata tu na sahuria i angka na dapotan haluaon. [46†]