Read Batak Toba ULAON NI APOSTEL 21 Bible Online

ULAON NI APOSTEL 21 - Batak Toba bible

ULAON NI APOSTEL 21

¹I. [1] Asa dung sirang hami sian nasida, marlayar ma hami manumpol tu pulo Kos, jala torang ni arina i tu Rodos, sian i tu Patara.

²Jadi jumpang hami ma sada parau, naeng taripar tu Penisia, i ma hubongoti hami laos marlayar.

³Dung hutatap hami pulo Siprus, hulaosi hami ma i tungkan sihambirang laho manuju dompak Siria, jadi tardarat ma hami di Tirus, ai tusi do hasahatan ni muatan ni parau i.

⁴Hutopot hami ma angka sisean i jala mangulon disi pitu ari lelengna. Hinorhon ni Tondi i dipalumba nasida do si Paulus, unang nangkok tu Jerusalem. [451†]

⁵Alai dung salpu ariarinami disi, hehe ma hami laho borhat muse, jadi dipataru nasida saluhutna padohot angka ina ro di angka dakdanak ma hami tu balian ni huta i, jadi marsinggang ma hami martangiang di topilaut. [452†]

⁶Dung masijalangan bongot ma hami tu parau; mulak do anggo nasida tu ingananna be.

⁷Marujung ma parparauonnami, ai sian Tirus sahat ma hami tu Ptolemais; jadi hujalang hami ma angka dongan, laos mangulon do di nasida sadari.

⁸Alai marsogotna i borhat ma hami, gabe sahat ma tu Kaesarea, jadi laho ma hami tu bagas ni si Pilippus parjamita i, sada sian na pitu i, jadi sorang di ibana ma hami. [453†]

⁹Alai adong ma opat boruna na marbaju, angka na manurirangi. [454†] II.

¹⁰Jadi andorang lumeleng mangulon hami disi, tuat ma sian Judea sada panurirang na margoar Agabus. [455†]

¹¹Didapothon ma hami, dibuat ma hohos ni si Paulus, dirahuthon ma tu tanganna dohot tu patna, huhut ma didok: On do hata ni Tondi Parbadia: Songon on ma ihoton ni angka Jahudi di Jerusalem nampuna hohos on, pasahatonnasida do ibana tu tangan ni sipelebegu. [456†]

¹²Umbege hata i, huelehelek hami rap dohot ma maringanan disi ma ibana, unang nangkok tu Jerusalem. [457†]

¹³Alai ninna si Paulus ma mangalusi: Dia do na binahenmuna, na tumatangis i dohot na mangalalai rohangku? Hobas do ahu, ihoton nang bunuon pe di Jerusalem ala ni Goar ni Tuhan Jesus! [458†]

¹⁴Dung so olo ibana apoan, hohom sambing hami, gabe hudok hami ma: Sai saut ma lomo ni roha ni Tuhan i! [459†] III.

¹⁵Asa dung salpu angka ari i, marhobas ma hami, laho nangkok tu Jerusalem.

¹⁶Alai dohot sisean deba na sian Kaesarea mandongani hami, ditogihon ma hami sorang tu si Manason sian Siprus, naung leleng sisean.

¹⁷Di na sahat hami tu Jerusalem, las do roha ni angka dongan i manjangkon hami.

¹⁸Jala torang ni arina i laho ma si Paulus rap dohot hami manopot si Jakobus, gabe ro ma tusi angka sintua saluhutna. [460†]

¹⁹Jadi dung dijalang ibana nasida, jojor ma dihatahon tu nasida na binahen ni Debata tu halak sipelebegu marhitehite ulaonna i. [461†]

²⁰Umbege hatana i, dipuji nasida ma Debata; dung i didok nasida ma tu ibana: Diida ho do, anggia, marriburibu do halak Jahudi angka naung gabe porsea, jala saluhut do nasida mangkapadothon patik i. [462†]

²¹Dibege nasida, dipodai ho do halak Jahudi saluhutna, na di tongatonga ni halak sipelebegu, asa sirang sian si Musa, jala didok ho do, na so jadi sunatonnasida angka anakkonna, jala ndang pola radotannasida adat i, ninna. [463†]

²²Antong, beha nama? Ai begeonnasida do, naung ro ho.

²³Onpe, bahen ma na hudok hami on di ho! Adong do di hami opat halak, na marutang bagabaga.

²⁴Togihon ma nasida, urasi ma dirim rap dohot nasida, harugihon ma tu nasida, asa dipagustingkon obukna, gabe botoon ni saluhutna, na so tutu do hape barita i, na taringot tu ho, naung dohot do ho tahe pangaradoti di patik. [464†]

²⁵Alai taringot tu angka sipelebegu, naung gabe porsea, nunga pinatikkon hian tu nasida, ingkon dijaga dirina be maralohon pelean na tu begu, dohot mudar, songon i na mate so sineat, ro di parmainanon. [465†]

²⁶Jadi marsogotna i diarahon si Paulus ma angka baoa i, diurasi ma dirina rap dohot nasida, laho tu bagas joro, paboahon na naeng gohanna angka ari pangurasan i, paima sahat pelean sian ganup nasida. [466†] IV.

²⁷Alai di na mandok marujung na pitu ari i, diida angka Jahudi na sian Asia ma ibana di bagas joro, gabe digunturi ma saluhut natorop i, ditangkup ma ibana. [467†]

²⁸Huhut ma dijouhon: O hamu halak Israel, urupi hami! On do jolma i, na sai mangajari saluhut halak maralohon bangsonta dohot patik i ro di inganan on. Dohot do halak Junani hape ditogihon tu bagas joro on; diramuni do inganan na badia on! [468†]

²⁹Ai naung diida nasida do si Tropimus na sian huta Epesus rap dohot ibana di huta i, gabe dirimpu, naung ditogihon si Paulus ibana tu bagas joro i. [469†]

³⁰Jadi guntur ma sandok huta i, marpungu ma sude natorop, disoro ma si Paulus, disarat ma tu balian ni joro i; dung i pintor ditutup ma angka pintu.

³¹Alai di na naeng pusaonnasida ibana, sahat ma tu kapiten barita i, naung guntur do sandok Jerusalem.

³²Jadi pintor ditogihon ibana ma angka soldadu ro di angka letnan manahopi nasida; asa disi diida nasida kapiten i dohot angka soldaduna, dipasohot ma na mambalbali si Paulus. [470†]

³³Gabe ro ma kapiten i, ditangkup ma si Paulus, didokkon ma ihoton ibana dohot dua rante, dung i dipatangkas ma, manang halak dia ibana ro di na binahenna. [471†]

³⁴Alai sai masipansorohon hatana do natorop i; asa dung so jumpangsa hata na sintong dibahen na guntur i, didokkon ma togihononhon ibana tu tangsi. [472†]

³⁵Alai di na sahat i ibana tu tangga, diusung angka soldadu nama ibana dibahen panahopi ni natorop i.

³⁶Ai na mangihut do natorop i huhut manjoujou: Pinusa ma ibana! [473†]

³⁷Jadi di na naeng togihononnasida si Paulus tubagasan tangsi i, didok ma tu kapiten i: Jadi do dohononku hata tu ho? Gabe didok ma: Diboto ho do hape hata Junani?

³⁸Asa ndada ho halak Misir i, na manggunturi naengan on dohot manogihon na opatribu panamun tu parhorsihan? [474†]

³⁹Dung i didok si Paulus ma: Jahudi do ahu, raja huta do ahu di Tarsus, huta na tarbarita di luat Kilikia. Raja ho, loas ahu jolo mangkatai tu natorop i! [475†]

⁴⁰Jadi dung diloas, jongjong ma si Paulus di tangga i, dihiraphon ma tanganna tu natorop i. Jadi dung hohom be, marhata Heber ma ibana, ninna ma: [476†]