Read Batak Toba ULAON NI APOSTEL 22 Bible Online

ULAON NI APOSTEL 22 - Batak Toba bible

ULAON NI APOSTEL 22

¹Hamu angka hahaanggi dohot ama, tangihon hamu ma pangalusionkon na tu hamu! [477†]

²Asa dung dibege nasida, marhata Heber ibana tu nasida, lam hohom be ma, gabe ninna ma: [478†]

³Halak Jahudi do ahu, na tubu di Tarsus na di luat Kilikia, alai magodang do di huta on; di parsikolaan ni si Gamaliel do ahu diajari mangihuthon patik ni angka amanta i timpas, gabe hupapusuhon mangoloi Debata, songon sude hamu sadari on. [479†]

⁴Hupaburuburu do parugama on maradu mate nasida, ai huihoti do angka baoa dohot boruboru laho pasahathon tu hurungan. [480†]

⁵Sintua ni malim i ro di angka sintua do panindangi di ahu, ai sian nasida do hujalo surat tu angka dongan i, di na laho i ahu tu huta Damaskus, manogihon dohot tarihot nang angka na disini tu Jerusalem, asa hona uhum nasida.

⁶Alai masa ma, di na di tongandalan i ahu mardonokkon huta Damaskus, tar di hos ni ari, tompu ma sumillam sian ginjang humaliang ahu sondang na tiur situtu.

⁷Pola tinggang do ahu tu tano, dung i hubege ma sada soara na mandok tu ahu: Saulus!, Saulus! Boasa leleanmu Ahu?

⁸Jadi ningku ma mangalusi: Ise do Ho, Tuhan? Jadi ninna ma mandok ahu: Jesus do Ahu, na sian Nasaret, na nileleanmi!

⁹Diida angka donganku do nian sondang i, alai ndang dibege nasida soara ni na mangkatai dohot ahu.

¹⁰Gabe ningku ma: Dia ma sibahenonku, Tuhan? Jadi didok Tuhan i ma tu ahu: Hehe ma ho, laho ma tu Damaskus: Disi do paboaon tu ho saluhut na patut ulaonmu.

¹¹Alai ndang marnida be ahu dibahen sillam ni sondang i, gabe ditogu angka donganki nama tanganku sahat tu Damaskus.

¹²Dung i adong ma disi sahalak na margoar Ananias, halak na daulat roha marningot patik i; na denggan do baritana di saluhut Jahudi na maringan disi.

¹³I do na ro manopot ahu, ninna ma: Ale Saulus, anggia; marnida ma ho! Jadi manigor saut ma huida ibana.

¹⁴Dung i ninna ma: Nunga dipillit Debata ni angka amanta hian do ho, asa tandaonmu lomo ni rohana, jala idaonmu Partigor i jala begeonmu soarana sandiri,

¹⁵asa gabe sitindangina ho tu sude jolma taringot tu na niida dohot na binegem i.

¹⁶Onpe, boasa sulonsulonon roham? Hehe ma ho, padidihon ma ho jala paburihon ma dosam, dung dijou ho Goarna i! [481†]

¹⁷Alai jumpang ma di ahu, dung mulak ahu tu Jerusalem, marhatiuron ma tondingku, di na martangiang i ahu di bagas joro. [482†]

¹⁸Ai huida do Ibana; didok do tu ahu: Humatop ma ho laho sian Jerusalem on, ai ndang jaloonnasida pangkatindangkonmi na taringot tu Ahu.

¹⁹Dung i ningku ma: Diboto nasida do, ale Tuhan, ahu do na mangkurungkon dohot mangalinsingi di angka parguruan angka na porsea di Ho. [483†]

²⁰Jala di na durus mudar ni si Stepanus sitindangimi, disi do ahu jala hinalomohon do i, jala ahu do mangaramoti ulos ni angka na mamusa ibana. [484†]

²¹Jadi didok ma mandok ahu: Laho ma ne ho; ai tu halak sipelebegu, tu na dao naeng suruonku ho! [485†]

²²Jadi sintap ni hata ondeng nama dipatangitangi nasida ibana, gabe dipangiar be ma soarana, mandok: Padao ma halak on sian tano on, ai ndang tama mangolu ibana! [486†]

²³Alai sai tole do nasida manjoujou, ditimpalhon do ulosnasida, jala disangkophon orbuk i dompak ginjang.

²⁴Jadi didokkon kapiten i ma togihononhon ibana tubagasan tangsi; disuru ma na mangalinsingi ibana laho manangkasi, asa binoto alana, umbahen na songon i panjouonnasida dompak ibana. [487†]

²⁵Alai di na naeng tambatonnasida ibana dohot tali pasa, ninna si Paulus ma mandok letnan na jongjong disi: Na jadi do linsinganmuna halak Rom, nang so jolo niuhuman? [488†]

²⁶Umbege hata ondeng letnan i, ditopot ma kapiten paboahonsa, ninna ma: Aha naeng bahenonmu? Halak Rom do halak i!

²⁷Jadi ditopot kapiten ma ibana, ninna ma: Paboa tu ahu, halak Rom do ho? Jadi didok ma: I do!

²⁸Dung i mangalusi ma kapiten i: Ia ahu, godang do huharugihon manuhor uhum Rom. Jadi didok si Paulus ma: Alai anggo ahu, na sian partubungku do songon i.

²⁹Jadi pintor sumurut ma angka na naeng manangkasi ibana; ai mabiar do kapiten i, dung diboto halak Rom do hape si Paulus, naung didokkon talion. [489†]

³⁰Torang ni arina i naeng ma tangkas botoonna alana, umbahen na dialuhon angka Jahudi i ibana, jala dipalua ma ibana, didokkon ma marpungu angka sintua ni malim dohot rapot godang i, ditogu ma si Paulus tu tongatonganasida. [490†]