Read Batak Toba ULAON NI APOSTEL 23 Bible Online

ULAON NI APOSTEL 23 - Batak Toba bible

ULAON NI APOSTEL 23

¹I. [1] Alai dibereng si Paulus ma rapot i, ninna ma: Hamu, angka hahaanggi, na marparange do ahu sian nasa burju ni rohangku mangoloi Debata ro di sadari on. [491†]

²Alai didokkon sintua ni malim Ananias ma angka na jongjong disi mamastap ibana. [492†]

³Dung i didok si Paulus ma mandok ibana: Pastapon ni Debata ma ho, dorpi na hinapur! Na hundul do ho manguhumi ahu marguru tu patik, hape didokkon ho pastapon ahu maralohon patik i! [493†]

⁴Dung i didok na jongjong disi: Ai insahanmu sintua ni malim ni Debata?

⁵Gabe didok si Paulus ma: Ndang na huboto, ale dongan, ibana sintua ni malim i; ai tarsurat do: “Ndang jadi insahanmu sintua ni bangsom!” [494†]

⁶Alai diboto si Paulus ma, deba sian nasida Saduse, na deba halak Parise, gabe dijouhon ma di rapot i: Hamu angka hahaanggi! Halak Parise do ahu jala anak ni Parise. Ala ni pangkirimon ni roha dohot ala ni haheheon sian na mate, umbahen na tu paruhuman on ahu. [495†]

⁷Alai dung didok songon i, marsalisi ma angka Parise dohot Saduse, gabe mardua roha ma na pungu i.

⁸Ai disoadahon angka Saduse do haheheon nang surusuruan nang tondi; alai anggo Parise, diparhatutu do duansa. [496†]

⁹Jala mansai guntur ma; alai hehe ma deba sibotosurat sian horong ni angka Parise mangalo, ninna ma: Ndang adong na jahat jumpang hami di halak on. Atik naung tutu dipanghulingi Tondi manang surusuruan ni Debata ibana. [497†]

¹⁰Alai lam balga ma bada i, jala mabiar ma kapiten i, aik boha diparsisiga nasida si Paulus, gabe didokkon ma tuat soldadu i mangaroro ibana sian tongatonganasida, manogihon tu tangsi. [498†]

¹¹Alai bornginna i jongjong ma Tuhan i di lambungna, didok ma: Pos ma roham! Songon naung hinatindangkonmi Ahu di Jerusalem on, ingkon songon i do ho mangkatindangkon nang di huta Rom! [499†] II.

¹²Alai dung torang ari, marbulan ma deba sian angka Jahudi, dipambuburahon ma dirina, mandok na so tupa mangan manang minum nasida, saleleng so dipusa si Paulus.

¹³Lobi opatpulu do torop ni na marbulan songon i.

¹⁴Jadi ro ma nasida, manopot angka sintua ni malim ro di angka pangituai, didok ma: Nunga hupambuburahon hami dirinami, na so jadi daionnami agia aha, saleleng so hupusa hami si Paulus.

¹⁵Antong, rap ma hamu dohot rapot i mangidohon tu kapiten i, asa ditogihon ibana tu jolomuna, songon na laho patangkashon tumorang hata i; alai hobas do hami mamusa ibana, tagan di tongandalan dope.

¹⁶Alai tarbege do tahi i tu ibebere ni si Paulus, jadi laho ma ibana tu tangsi i paboahonsa tu si Paulus.

¹⁷Jadi dijou si Paulus ma sada letnan tu lambungna, didok ma: Togihon dolidoli on tu kapiten i, ai adong do sipaboaonna tu ibana.

¹⁸Jadi diarahon ma ibana, ditogihon ma tu kapiten, ninna ma: Na dijou si Paulus na tarhurung i do ahu; dipangido tu ahu, togihononhon dolidoli on tu jolom, ala adong sidohononna tu ho.

¹⁹Ditiop kapiten ma tanganna manogihon ibana tu na soding, disise ma: Ai aha do sipaboaonmu tu ahu?

²⁰Jadi didok ma: Na martuptup do angka Jahudi mangidohon sian ho, naeng togihononmu marsogot si Paulus tujolo ni rapot, songon na naeng dope patangkasonnasida hata i.

²¹Onpe, unang oloi nasida, ai lobi opatpulu halak sian nasida mangonggopi ibana, angka naung mambuburahon dirina, na so tupa mangan manang minum, saleleng so dipusa ibana; nunga hobas nasida nuaeng, holan hata sian ho nama dipaima. III.

²²Dung i dipamuli kapiten ma dolidoli i, dipopai ma, na so jadi paboaonna naung pinatolhasna i tu ibana.

²³Gabe dijou ma dua letnan tu jolona, didok ma: Padiri hamu ma duaratus soldadu laho tu Kaesarea, rap dohot pitupulu halak parsihundul, angkup ni i dua ratus pandongani, pungkul sia borngin.

²⁴Pinadiri huhut hoda hundulan ni si Paulus, mangaluahon ibana tu panggomgomi Feliks.

²⁵Laos dibahen ma surat songon on:

²⁶Na manongos tabi do si Klaudius Lisias tu na pinarsangapan Panggomgomi Feliks. [500†]

²⁷Na ditangkup angka Jahudi do halak on; jadi di na naeng pusaonnasida ibana, ro do ahu dohot angka soldadu mangarampas ibana, dung huboto, halak Rom do ibana. [501†]

²⁸Alai di na naeng botoonku alana, umbahen na disalahon nasida ibana, hutogihon ma ibana tujolo ni rapotnasida. [502†]

²⁹Gabe dapot ahu ma: Siala parsalisian taringot tu patiknasida do dialuhon nasida ibana; ndang adong hata dompak ibana, umbahen na patut marutang hosa manang tu hurungan ibana. [503†]

³⁰Alai adong ma na paboahon tu ahu tahinasida dompak halak on, jadi manigor ma husuru ibana tu ho, jadi hudok tu angka pangalu, asa tu ho diandehon sidohononna i. [504†]

³¹Asa diboan angka soldadu i ma si Paulus mangihuthon parenta i, ditogihon ma di na saborngin i tu Antipatris.

³²Alai marsogotna i disuru nasida ma angka parsihundul i mamboan ibana; na mulak tu tangsi i do anggo nasida.

³³Jadi tolhas ma nasida tu Kaesarea, dipasahat ma surat i tu panggomgomi, ditogihon ma si Paulus tu jolona.

³⁴Jadi dung dijaha surat i, disungkun ma, manang sian luat dia ibana. Jadi dung diboto, na sian Kilikia ibana, ninna ma: [505†]

³⁵Hutangkasi pe hatami, dung ro angka na mangaluhon ho. Dung i didokkon ma na mangkurungkon ibana tu bagas paruhuman na di raja Herodes. [506†]