Read Batak Toba ULAON NI APOSTEL 24 Bible Online

ULAON NI APOSTEL 24 - Batak Toba bible

ULAON NI APOSTEL 24

¹Asa dung salpu lima ari, tuat ma si Ananias, sintua ni malim i, rap dohot deba sintua dohot sada halak parhata, si Tertullus, mangadap tujolo ni panggomgomi, mangaluhon si Paulus. [507†]

²Alai dung taralap ibana, dibungka si Tertullus ma pangaluanna i, ninna ma:

³Na taruli dame godang do hami binahenmi, jala marhite sian panarihon ni roham ganda do pangabahan ni bangso on; sandok mardongan hamauliateon ni roha godang huhalashon hami saluhutna i, ale Feliks na pinarsangapan!

⁴Alai asa unang malelengku hutogang ho, hupangido ma tu ho: Tangihon hami jolo satongkin hombar tu basam!

⁵Dapot hami do halak on pangago jala panggunturi di saluhut halak Jahudi di liat portibi on, partogi ni halak Nasarani. [508†]

⁶Diuji do pasamakkon bagas joro i, gabe hutangkup hami ma ibana. [509†]

⁷Saluhutna i, umbahen na hualuhon hami ibana, dapot botoonmu sian ibana, molo ditangkasi ho.

⁸Jadi dohot ma angka Jahudi manolopi, mandok: Tutu do songon i!

⁹Alai dihilap panggomgomi i ma si Paulus mandokkon mangkuling, jadi ninna ma mangalusi:

¹⁰Dibahen na huboto, naung leleng ho panguhum di bangso on, hiras do rohangku manariashon hatangkon.

¹¹Ai hatangkasan ho do: Sampuludua ari dope salpu, dung nangkok ahu tu Jerusalem martangiang. [510†]

¹²Ndang jumpang nasida ahu mangkatai di bagasan joro i dohot halak, manang mambahen guntur natorop, nang di parguruan manang di huta pe. [511†]

¹³Jala ndang na tarhajongjongkon nasida nanggo sada na pinartuhashonnasida nuaeng dompak ahu.

¹⁴Na mangoloi Debata ni angka daompung do ahu, mangihuthon agama na songon haliluon di rohanasida, laho mangkaporseai saluhut na tarsurat di buku patik dohot di angka panurirang; i do sitopotanku tu ho! [512†]

¹⁵Na mangkirim do rohangku tu Debata, mulak mangolu sogot angka na tigor dohot angka na geduk, songon na hinirim ni rohanasida pe. [513†]

¹⁶Ala ni i do umbahen na huhaburjuhon, asa marroha na ias ahu tongtong maradophon Debata nang maradophon jolma. [514†]

¹⁷Alai dung salpu manang piga taon, ro ma ahu mamboan asiasi tu bangsongku dohot pelean. [515†]

¹⁸Disi jumpang nasida ahu mangurasi diringku di bagas joro, alai ndada mardongan natorop manang di bagasan na guntur. [516†]

¹⁹Alai naeng ma dison nian di jolomon, Jahudi deba na sian Asia mangalualu, molo tung adong diboto manang dia hasalaanku.

²⁰Nang nasida on pe dihatahon ma, manang dia gedukku dapot nasida, di na jongjong i ahu di adopan ni rapot i.

²¹Holan hata on na hujouhon i huhut jongjong di tongatonganasida: Ala ni haheheon ni angka na mate on, umbahen na diuhumi hamu ahu sadari on! [517†]

²²Alai dipalalaplalap si Feliks ma nasida, ala mansai tangkas diboto agama i, ninna ma: Dung pe tuat kapiten Lisias, patangkasonku ma angka hata na sian hamu i. [518†]

²³Didokkon ma letnan i mangaramoti si Paulus, alai lumumbang; na so jadi ambaton manang ise donganna, na giot marhobasi di ibana. [519†]

²⁴Alai dung salpu deba ari, ro ma si Feliks dohot dongan saripena, si Drusila, boru Jahudi, disuru ma na mangalap si Paulus, naeng begeonna hatana taringot tu haporseaon di Kristus Jesus.

²⁵Alai di na hinatahonna taringot tu hatigoran dohot hatomanon dohot uhum sogot tarsonggot ma si Feliks, ninna ma mangalusi: Antong, songon i ma jolo! Molo sadihari ahu suruonku do na manjou ho.

²⁶Alai huhut do dihirim rohana, lehonon ni si Paulus hepeng tu ibana; dibahen i jotjot do disurui mangalap si Paulus, mangkatahatai dohot ibana.

²⁷Alai dung gok dua taon, ro ma si Perkius Festus mangganti si Feliks; jadi naeng do si Feliks pajongjongkon basana tu halak Jahudi, ditadingkon ma si Paulus tarhurung. [520†]