Read Batak Toba ULAON NI APOSTEL 28 Bible Online

ULAON NI APOSTEL 28 - Batak Toba bible

ULAON NI APOSTEL 28

¹I. [1] Dung tardarat hami, binege ma goar ni pulo i Malta. [564†]

²Alai na basar situtu do pangisi ni pulo i maradophon hami, dipagalak do api, ditogihon ma hami saluhutna tusi, ala ni por ni udan dohot ngali ni ari. [565†]

³Jadi di na pagugunhon rambaramba si Paulus, laho mambahen tu api, ruar ma sian i ulok dari dibahen mohopna, dipargut ma tanganna.

⁴Jadi dung diida jolma i ulok i gaunggaung di tanganna, masipandohan ma nasida: Sandok pamunu do halak on; ndang diloas uhum i ibana mangolu, atik pe malua sian laut. [566†]

⁵Alai dipirpirhon ma ulok i tubagasan api, ndang pola mahua ibana. [567†]

⁶Alai ditagam nasida, naeng magurbak ma, manang runggang mate satongkin ibana; alai dung leleng dipaimaima nasida, so manang mahua ibana diida, martungkar ma rohanasida; didok ma, debata ibana. [568†]

⁷Alai adong ma mardonokkon tusi ladang ni sada halak na sumangap di pulo i, na margoar Publius; dijangkon do hami, denggan do hami ditamuei tolu ari lelengna.

⁸Alai peak ma uju i ama ni si Publius i panepaneon huhut barobunion, gabe masuk ma si Paulus manopot ibana; jadi dung martangiang, diampehon ma tanganna tu ibana, gabe malum ma. [569†]

⁹Dung songon i, ro ma angka na asing na marsahit di pulo i, jadi malum be ma. [570†]

¹⁰Gabe sangap situtu do hami dibahen nasida; jala di na borhat i hami marlayar, dipadiri nasida do na hasea di hami. II.

¹¹Alai dung salpu tolu bulan, borhat ma hami marlayar di sada parau Aleksanderia, na marpartanda linduat, naung pasalpuhon taon ngali di pulo i.

¹²Jadi dung tardarat hami di Sirakus, mangulon ma hami disi tolu ari.

¹³Sian i ma hami mangaliat, jala sahat ma hami tu Regium; jadi marsogotna i ro ma alogo sian dangsina, jadi sahat ma hami tu Potioli di ari paduahon i.

¹⁴Disi pajumpang hami dohot angka dongan na mangapoi hami, mangulon di nasida pitu ari, dung i borhat ma hami tu huta Rom. [571†]

¹⁵Sian i ma ro angka dongan, dung dibege baritanami, ditomutomu ma hami sahat ro di Appiporum dohot Tres Taberne. Marnida nasida, mandok mauliate ma si Paulus tu Debata; lam pos ma antong rohana. [572†]

¹⁶Alai dung tolhas hami tu huta Rom, diloas do anggo si Paulus maringan di lomo ni rohana rap dohot soldadu sada na manjagai ibana. [573†] III.

¹⁷Jadi dung salpu tolu ari, dijou si Paulus ma angka panungganei ni halak Jahudi. Dung pungu nasida, ninna ma mandok nasida: Hamu angka dongan! Ia ahu, ndang adong hubahen manang aha dompak bangsonta manang dompak adat na sian angka ompu, gabe diihoti ahu di Jerusalem jala dipasahat ahu tu tangan ni halak Rom. [574†]

¹⁸Jadi naeng paluaonna do ahu, dung ditangkasi ahu, ala so dapot salangku na tama mambahen ahu marutang hosa.

¹⁹Alai dibahen sai mangalo angka Jahudi i, ndang tarjua ahu so hugoar raja Kesar pangondianku; ndang adong sialuhononku sala ni bangsongku. [575†]

²⁰I do antong alana, umbahen na hujou hamu, asa huida jala hupangkulingi hamu, ai ala ni pangkirimon ni halak Israel do umbahen na dirantei ahu. [576†]

²¹Dung i ninna nasida ma mandok ibana: Ndang adong hujalo hami surat sian Judea taringot tu ho, jala ndang adong manang ise sian angka dongan i, naung ro tuson paboahon barita na jahat taringot tu ho.

²²Alai tama do di rohanami begeon sian ho parrohaonmi; ai taringot tu agama on huboto hami do, na nialo ni halak do i di liat portibi on. [577†]

²³Asa dung digondit nasida ari di ibana, ro ma nasida torop manopot ibana tu parmiananna, jadi marjamita ma ibana mangkatindangkon harajaon ni Debata: Dipajojor ma tu nasida barita ni Jesus sian patik ni si Musa dohot sian angka panurirang i, olat ni manogotna ro di bot ni ari. [578†]

²⁴Jadi deba ma marhatutuhon na hinatahonna i; alai deba ndang porsea. [579†]

²⁵Gabe marsalisi ma nasida sama nasida jadi laho be ma, dung jolo didok si Paulus hata on tu nasida: Sintong ma na nidok ni Tondi Parbadia marhitehite panurirang Jesaya tu angka amamuna najolo. [580†]

²⁶Ai ninna do: “Laho ma ho paboahon tu bangso on: Marhite sian parbinegeanmuna do begeonmuna i, gabe ndang dapot rohamuna; jala di na marnida i hamu, idaonmuna i, gabe ndang mananda. [581†]

²⁷Ai nunga pir roha ni bangso on, nunga maol marbinege pinggolnasida; nunga ditutup matanasida, asa unang marnida matanasida, unang marbinege pinggolnasida, unang marbinoto rohanasida, unang muba rohanasida, unang tarpamalum Ahu nasida!”

²⁸Antong, boto hamu ma, nunga ditongos Debata haluaon on tu halak sipelebegu; tangihononnasida do i. [582†]

²⁹Asa dung dihatahon ibana i, laho ma angka Jahudi sian i; godang do parsualonnasida sama nasida.

³⁰Alai dua taon ma si Paulus maringan di bagas na sineoana i; dijangkon do nasa na ro manopot ibana.

³¹Marhiras ni roha situtu do ibana mamaritahon harajaon ni Debata jala mangajarhon barita ni Tuhan Jesus; ndang adong na mangambat. [583†]