Read Batak Toba ULAON NI APOSTEL 3 Bible Online

ULAON NI APOSTEL 3 - Batak Toba bible

ULAON NI APOSTEL 3

¹I. [1] Dung i rap nangkok ma si Petrus dohot si Johannes tu bagas joro, di pungkul tolu di tingki partangiangan. [47†]

²Jadi diusung na mangusung ma sahalak na pangpang sian hatutubuna; ganup ari do ditaruhon nasida ibana tu lambung pintu ni bagas joro na margoar na uli, asa dipangido asiasi sian angka na bongot tu bagas joro i. [48†]

³Jadi di na niidana si Petrus dohot si Johannes, naeng bongot tu bagas joro i, dipangido ma asiasi.

⁴Alai dipanotnoti si Petrus dohot si Johannes ma ibana, ninna ma: Bereng dompak hami!

⁵Dung i dibereng ma nasida, dihirim rohana jaloonna manang aha sian nasida.

⁶Alai ninna si Petrus ma: Anggo perak dohot sere ndang adong di ahu; alai na adong di ahu, hulehon ma tu ho: Marhitehite Goar ni Jesus Kristus na sian Nasaret i, mardalani ma ho!

⁷Laos ditangkup ma tanganna siamun pahehe ibana, jadi pintor hot ma haehaena dohot totna.

⁸Dung i manigor hehe ma ibana, jongjong ma huhut mardalan, dung i bongot ma ibana rap dohot nasida tu bagas joro i mardalan jala mirjahirjak huhut mamuji Debata. [49†]

⁹Jadi diida natorop saluhutna do ibana mardalani dohot mamuji Debata.

¹⁰Alai diboto nasida, ibana do i, na hundul nasailaon mangidoido di lambung pintu na uli na di bagas joro i; jadi mansai longang ma rohanasida jala tarhalomong mida na masa tu ibana i. [50†] II.

¹¹Alai dung sai udur ibana dohot si Petrus dohot si Johannes, marrongoman ma saluhut halak tu nasida, tu inganan na margoar emper ni si Salomo, dibahen songgot ni rohanasida. [51†]

¹²Alai marnida i si Petrus, ninna ma mandok natorop i: Hamu, halak Israel, boasa longang rohamu mida on, boasa hami diberengi hamu, songon na hira gogonami sandiri manang hadaulatonnami mambahen mardalan halak on?

¹³Na dipasangap Debata ni si Abraham, si Isak dohot si Jakkob, Debata ni angka amanta i do Jesus naposona i, na pinasahat jala na sinoadahonmuna di jolo ni si Latus na mandok uhumna, paluaon Ibana nian. [52†]

¹⁴Alai disoadahon hamu do na badia jala partigor i; dipangido hamu do, lehonon tu hamu pamunu i. [53†]

¹⁵Alai dipusa hamu do partogi tu hangoluan. I ma dipahehe Debata sian na mate; hami do angka sitindangi ni i! [54†]

¹⁶Asa ala ni haporseaon di Goarna do dipargogoi Goarna halak on na niida jala na tinandamuna, gabe dilehon haporseaon na sian Tuhan i do hahisaron tu ibana di jolomuna saluhutna. [55†]

¹⁷Onpe, hamu ale angka dongan, huhilala, na hurang boto do hamu, umbahen na diulahon hamu i, songon i do nang angka sintuamuna. [56†]

¹⁸Alai dipasaut Debata do disi na pinaboana hian marhitehite hata ni saluhutna panurirang, mandok: Sitaon na bernit do anggo Kristusna. [57†]

¹⁹Antong, pauba jala paulak hamu ma rohamuna, asa tarsesa dosamuna, [58†]

²⁰asa anggiat ro angka ari hahilasan sian adopan ni Tuhan i jala asa disuru tu hamu Jesus Kristus, songon naung tinahina i hian.

²¹Dijangkon banua ginjang do Ibana jolo, paima ro tingki hasosonggop ni nasa na hinatahon ni Debata di na robi marhite sian hata ni angka panurirangna na badia i.

²²Ai didok si Musa do: “Paheheon ni Tuhan Debatanta do panurirang sada sian angka hahaanggimuna i songon ahu on; Ibana do sitangihononmuna di saluhut sidohononna tu hamu. [59†]

²³Alai sirotongkononhon ma disi sian bangso i nasa na so tumangihon panurirang i!”

²⁴Alai nasa panurirang angka na manurirangi, mamungka sian si Samuel ro di angka na sian pudina i, angka ari on do dibaritahon nasida. [60†]

²⁵Hamu do anak ni angka panurirang i jala partohap di padan na binahen ni Debata tu angka amanta i, uju na nidokna i tu si Abraham: “Dapotan pasupasu ma saluhut bangso ni tano on marhite sian Pomparanmi!” [61†]

²⁶Jumolo do di hamu dipahehe Debata Naposona i, disuru do Ibana mamasumasu hamu, angka na mulak sian hajahatonmuna be. [62†]