Read Batak Toba ULAON NI APOSTEL 4 Bible Online

ULAON NI APOSTEL 4 - Batak Toba bible

ULAON NI APOSTEL 4

¹I. [1] Alai di na manjamitai natorop i nasida, ditahopi angka malim i dohot sintua ni bagas joro i rap dohot angka Saduse ma nasida. [63†]

²Muruk ma i, ala diajari nasida natorop i jala dibaritahon haheheon sian na mate marhite sian Jesus. [64†]

³Jadi ditangkup ma nasida, didabu ma nasida saborngin i tu hurungan, ai nunga bot ari.

⁴Alai gabe porsea do torop sian angka naung umbege jamita i, pola gok limaribu torop ni angka baoa. [65†] II.

⁵Alai di torang ni arina i marpungu ma di Jerusalem angka pangituai nang angka sintua ro di angka sibotosurat,

⁶rap dohot si Hannas, sintua ni malim i, dohot si Kayapas, si Johannes dohot si Aleksander ro di sude sisolhot ni sintua ni malim i. [66†]

⁷Jadi dipajongjong ma nasida tu tongatonga, dipamanat ma: Gogo ni ise manang goar ni ise dipangasahon hamu patupahon i? [67†]

⁸Dung i gok Tondi Parbadia ma si Petrus, didok ma tu nasida: Hamu angka na sangap ni bangso on jala pangituai! [68†]

⁹Molo pola tangkasan hami sadari on ala ni denggan basa i na tu sada halak na hansitan, manang marhite sian ise ibana malum,

¹⁰boto hamu ma saluhutna ro di sude bangso Israel: Jongjong pe halak on hisar di jolomuna, sandok marhitehite Goar ni Jesus Kristus na sian Nasaret i do, na pinarsilangkonmuna, na pinangolu ni Debata sian na mate! [69†]

¹¹Ibana do “batu na binolongkon ni hamu angka pande bagas i, naung gabe batu parsuhisuhi.” [70†]

¹²Asa ndang adong haluaon di bagasan manang ise na asing; ai ndang adong goar na asing ditoru ni langit dilehon tu jolma, parhiteanta tu haluaon. [71†]

¹³Ia nasida, longang do marnida hiras ni roha ni si Petrus dohot si Johannes i, ai torang do diboto, na so sijama surat jala na so marsiajar nasida; ditanda do, nasida dongan ni Jesus najolo.

¹⁴Alai diida do jongjong disi rap dohot nasida halak naung malum i, jadi ndang dapotsa be manang aha sidohononna. [72†]

¹⁵Gabe disuru nama nasida tu balian ni parrapotan i, dung i masitungkaran pingkiran ma nasida, angka ninna ma:

¹⁶Dia ma bahenonta tu angka halak on? Ai tandap do tanda na pinamasanasida on; saluhut pangisi ni huta Jerusalem do umbotosa jala ndang tarsoadahon hita. [73†]

¹⁷Alai asa unang lam rarat tu natorop i, gogo ma nasida taasupi, asa sandok unang be marjamita nasida tu halak mangasahon Goar i. [74†]

¹⁸Dung i dijou ma nasida, dirarang ma, sandok na so tupa be nasida marjamita manang mangajari mangasahon Goar ni Jesus.

¹⁹Alai ninna si Petrus dohot si Johannes ma mangalusi: Hamu ma manimbang, manang na tigor i di roha ni Debata, molo tangian hami di hamu asa di Debata. [75†]

²⁰Ai ndang tarbahen hami so mangkatahon naung huida jala hubege hami. [76†]

²¹Alai lam diasupi ma nasida, dung i dipalua ma, ala so jumpang nasida dalan manguhumi nasida dibahen natorop i, ai saluhut do mamuji Debata marningot na masa i.

²²Ai lobi opatpulu taon do umur ni jolma na pinamalum i. III.

²³Alai dung malua nasida, didapothon ma angka dongannasida, jadi dibaritahon ma sude na nidok ni angka sintua ni malim dohot angka pangituai tu nasida.

²⁴Jadi dung dibege nasida i, sasoara ma nasida mandok tu Debata: O ale Tuhan, Ho do manjadihon langit dohot tano dohot laut ro di nasa isina i! [77†]

²⁵Hinorhon ni Tondi Parbadia dihatahon Ho do marhite sian soara ni amanami, si Daud naposomu, songon on: “Boasa ogaoga halak parbegu jala na so marniula dipingkiri angka bangso?” [78†]

²⁶“Na hehe do angka raja ni tano on jala marpungu do angka panggomgomi laho mangalo Tuhan Kristusna i.”

²⁷Ai tutu ma naung marpungu di huta on si Herodes dohot Pontius Latus rap dohot halak parbegu dohot bangso Israel maralohon Jesus, naposom na badia i, na miniahanmi, [79†]

²⁸laho pasauthon hasosonggop ni na tiningki ni tanganmu dohot roham hian. [80†]

²⁹Onpe, ale Tuhan, bereng ma asupasupnasida, jala lehon tu angka naposomon hiras ni roha situtu, laho mangkatahon hatam! [81†]

³⁰Huhut surdukkon ma tanganmu, laho patupahon hahisaron ro di angka tanda dohot halongangan marhitehite Goar ni Jesus, naposom na badia i!

³¹Jadi dung martangiang nasida, humuntal ma inganan parpunguannasida jala gok Tondi Parbadia ma nasida saluhutna, gabe marhiras ni roha ma nasida mangkatahon hata ni Debata. [82†] IV.

³²Alai saroha saoloan do angka na porsea na sapunguan i; jala ndang adong nanggo sada sian angka paradongan na mandok: Hapunjunganna artana i, hatopan do i saluhutna dietong. [83†]

³³Jadi marhagogoon situtu ma angka apostel i, mangkatindangkon haheheon ni Tuhan Jesus i, jala tung lomo situtu do roha ni halak mida sude nasida. [84†]

³⁴Ai ndang adong manang ise nasida hurangan; ai ia adong pe sian nasida parhauma manang parjabu, digadisi do i, dung i diboan ma tuhor ni na ginadisna i. [85†]

³⁵Dipeakkon ma i tujolo ni angka apostel, dung i disagihon nasida ma i tu angka na hurangan.

³⁶Jadi adong ma sahalak Lepi sian pulo Siprus, i ma si Josep, na ginoar ni angka apostel si Barnabas (mandok: Anak ni pangapulon). [86†]

³⁷Digadis ma hauma golatna, diboan ma hepeng i, laos dipeakkon ma tujolo ni angka apostel i.