Read Batak Toba ULAON NI APOSTEL 5 Bible Online

ULAON NI APOSTEL 5 - Batak Toba bible

ULAON NI APOSTEL 5

¹I. [1] Adong ma uju i sahalak na margoar si Ananias rap dohot dongan saripena si Sapira, na manggadis tanona.

²Mardos ni roha ibana dohot dongan saripena, manamondingkon tuhorna i deba; diboan ma na deba nari, dipeakkon ma tujolo ni angka apostel. [87†]

³Alai ninna si Petrus ma: Oe Ananias, naung digohi sibolis i do hape roham, laho manggabusi Tondi Parbadia i dohot mamorso deba tuhor ni tano i. [88†]

⁴Ia ditiop ho i, nda gong di ho; digadis ho pe i, nda laos tong guru di ho? Dia do umbahen na tubu roham, mambahen songon i! Ndada jolma na ginabusanmi disi, Debata do! [89†]

⁵Alai disi dibege si Ananias hata ondeng, runggang ma ibana, laos tos hosana. Jadi biahaton situtu ma sude na umbegesa.

⁶Jadi hehe ma angka na umposo, disaputi ma bangkena, diusung ma tu balian laho mananom. [90†]

⁷Alai salpu arga tolu jom ro ma dongan saripena i, ndang dope diboto na masa i.

⁸Jala dipanghulingi si Petrus ma ibana: Paboa ma tu ahu: Na sa on do digadis hamu tano i? Olo, na sa i do, ninna.

⁹Alai ninna si Petrus ma mandok ibana: Boasa tung saroha hamu mangunjuni Tondi ni Tuhan i? Tagam ma, na mandok masuk ma angka naung mananom dongan saripem; usungonnasida ma nang ho tu balian!

¹⁰Dung i pintor runggang ma ibana tu jolona, laos tos hosana. Jadi di na bongot i angka na umposo i, nunga mate ibana didapot jala diusung ma bangkena tu balian, ditanom ma tulambung ni dongan saripena i.

¹¹Jadi hatahutan situtu ma sude na sahuria i ro di nasa na umbegesa. II.

¹²Alai masa do godang angka tanda dohot halongangan marhite sian tangan ni angka apostel i tu natorop; saroha do nasida saluhutna, marpungu do nasida tu emper ni si Salomo. [91†]

¹³Alai sian na leban i ndang adong na hum rohana pasaorhon dirina tu nasida; diparsangapi natorop i do nasida tahe.

¹⁴Alai lam tamba ma angka na porsea di Tuhan i, torop baoa nang boruboru. [92†]

¹⁵Pola dipamboan halak do angka na hansitan tu alaman, dipeakkon ma tu podoman dohot tu amak, asa anggiat hona halinu ni si Petrus i deba sian nasida, jumpa ro ibana. [93†]

¹⁶Alai dohot do torop halak sian angka huta humaliang ro tu Jerusalem, mamboan angka na marsahit dohot angka na niarsahan ni tondi na hodar, gabe malum ma nasida saluhutna. [94†] III.

¹⁷Alai hehe ma sintua ni malim i dohot saluhut angka donganna, i ma horong ni halak Saduse, gok rimas rohanasida. [95†]

¹⁸Jadi dilaluhon ma tangannasida tu angka apostel i, didabu ma nasida tu hurungan hatopan.

¹⁹Alai bornginna i diungkap surusuruan ni Tuhan i ma angka pintu ni hurungan i, ditogihon ma nasida tu balian, didok ma: [96†]

²⁰Laho ma hamu; di bagas joro ma hamu jongjong, mangkatahon tu natorop i saluhut hata hangoluan i!

²¹Jadi dung dibege nasida i, sogot ma nasida laho tu bagas joro laho mangajari. Alai ro ma sintua ni malim i dohot angka donganna, dipapungu ma rapot godang dohot saluhut sintua ni angka anak Israel; dung i disuru ma tu hurungan mangalap nasida.

²²Alai dung sahat ro disi angka naposo i, ndang jumpangsa nasida di hurungan i, jadi mulak ma nasida paboahonsa, ninna ma:

²³Momos do nian hurungan i hudapot hami, angka parjaga pe jongjong di jolo ni angka pintu i; alai dung huungkap hami, ndang jumpang hami manang ise di bagasan.

²⁴Asa dung dibege sintua ni bagas joro i dohot angka sintua ni malim boaboa i, jut ma rohanasida mamingkiri, manang dia astuan ni i.

²⁵Alai ro ma na mamaritahon tu nasida: Dibagas joro do hape jongjong nasida na hinurungkonmuna i, mamodai natorop i.

²⁶Dung i laho ma sintua i rap dohot angka naposo mangalap nasida; alai ndada gogo dibahen, ai mabiar do nasida mida natorop, aik boha didangguri nasida maon. [97†]

²⁷Asa dung diboan, dipajongjong ma nasida tujolo ni rapot godang, dung i dipamanat sintua ni malim i ma nasida, ninna ma:

²⁸Gomos situtu do nian hatanami mangorai hamu, na so jadi be hamu mangajari mangasahon Goar i, hape lam digohi hamu do huta Jerusalem podamuna i; na naeng parsapatahononmuna mudar ni Halak i tu hami? [98†]

²⁹Dung i ninna si Petrus dohot angka apostel i ma mangalusi: Ingkon oloan do iba di Debata asa di jolma! [99†]

³⁰Dipahehe Debata ni angka amanta do Jesus, na pinusamuna, uju digantung hamu Ibana tu hau. [100†]

³¹Tu siamunna do dipabangkit Debata Ibana gabe Partogi jala Sipalua, laho mangalehon tu halak Israel hamubaon ni roha dohot hasesaan ni dosa. [101†]

³²Hami do panindangi di hata on dohot Tondi Parbadia, na nilehon ni Debata tu angka na mangoloi Ibana. [102†]

³³Alai umbege i nasida, digotapi ma rohanasida jadi diputushon ma, sipusaon do nasida. [103†] IV.

³⁴Alai hehe ma di rapot i sahalak Parise, na margoar Gamaliel, sibotopatik, na sangap do ibana di roha ni natorop i, didokkon ma paruaron nasida satongkin. [104†]

³⁵Dung i didok ma tu nasida: Hamu halak Israel, manat ma hamu di sibahenonmuna tu angka jolma on!

³⁶Hehe do najolo si Teudas, dipabalga dirina, pola arga opatratus halak mangihuthon ibana, gabe tarbunu do ibana, marserak do saluhutna na mangihuthon ibana, gabe soada be. [105†]

³⁷Di pudina hehe muse si Judas, halak Galilea i, di na tarsurat i saluhut halak, jadi torop do dibolabola ditogihon; alai dohot do ibana lengse, gabe marserak sudena na mangihuthon ibana.

³⁸Asa on ma hatangku: Unang hahua hamu be angka halak i, pasombu hamu ma nasida; ai molo sian jolma tahi dohot ulaon on, na laho sega ma i. [106†]

³⁹Alai molo sian Debata, ndang taragohon hamu nasida; so tung gabe tardapot hamu maon angka sialo Debata! [107†]

⁴⁰Dioloi nasida ma ibana, dijou ma angka apostel i, dilinsingi ma nasida jadi diorai ma mangkatahon mangasahon Goar ni Jesus, dung i dipalua ma. [108†]

⁴¹Alai las do rohanasida, laho ruar sian jolo ni rapot i, ala tau nasida dirajumi Debata manaon lealea humongkop Goar i. [109†]

⁴²Jadi ndang mansohot nasida ariari di bagas joro nang jojor jabu pe, mangajarhon dohot mamaritahon Kristus Jesus i. [110†]