Read Batak Toba ULAON NI APOSTEL 6 Bible Online

ULAON NI APOSTEL 6 - Batak Toba bible

ULAON NI APOSTEL 6

¹I. [1] Alai di angka ari i lam manamba ma torop ni sisean i, jadi marmungutmungut ma halak Junani dompak halak Heber, ala tartading angka parompuan na mabalu sian nasida di pangurupion ariari. [111†]

²Jadi diparia na sampuludua i ma sandok huria i, didok ma: Ndang denggan hupapudi hami hata ni Debata, laho paturehon angka asiasi.

³Onpe, ale angka dongan, diori hamu ma sian tongatongamuna pitu halak na denggan baritana, angka na gok Tondi jala na pantas marroha, sipabangkitonta tu ulaon i. [112†]

⁴Alai anggo hami, tangiang dohot ulaon jamita i ma tong huhapadothon hami.

⁵Jadi lomo ma roha ni na sahuria i di hata i; dipillit ma si Stepanus, sada halak na gok haporseaon dohot Tondi Parbadia, dung i si Pilippus, si Prokorus, si Nikanor, si Timon dohot si Parmenas, angkup ni i si Nikolaus, sada parguru sian Antiokia. [113†]

⁶Angka i ma dipajongjong tujolo ni angka apostel i, jala martangiang ma huhut mangampehon tangan tu nasida. [114†]

⁷Jadi lam rarat ma hata ni Debata, ganda situtu ma torop ni angka sisean di Jerusalem; angka malim pe, torop do mangoloi porsea. [115†] II.

⁸Alai na gok asi ni roha dohot hagogoon si Stepanus, dipatupa do halongangan dohot tanda angka na balga di adopan ni natorop i.

⁹Gabe hehe ma deba angka na sian parguruan na margoar Libertini dohot sian Kirene dohot sian Aleksanderia dohot angka na sian Kilikia dohot sian Asia marsual dohot si Stepanus.

¹⁰Alai ndang taralo nasida hapistaranna dohot Tondi i na mangajari ibana. [116†]

¹¹Gabe dipajuju nasida ma deba halak na mandok: Hubege hami do ibana mandok hata barangsi mangapasi si Musa dohot Debata. [117†]

¹²Jadi digintali nasida ma natorop i ro di angka sintua dohot angka sibotosurat, laos hehe ma nasida, ditangkup ma ibana, diboan ma tujolo ni rapot godang.

¹³Dung i dipajongjong nasida ma angka sitindangi gapgap na mandok: Ndang na mansadi halak on mangkata inganan na badia i nang patik i. [118†]

¹⁴Ai hubege hami do ibana mandok: Lohaan ni Jesus sian Nasaret i ma joro i, paubaonna ma adat na tajalo sian si Musa.

¹⁵Jadi dipanotnoti saluhut parrapot i ma ibana, jala songon bohi ni surusuruan ni Debata do bohina diida nasida.