Read Batak Toba ULAON NI APOSTEL 8 Bible Online

ULAON NI APOSTEL 8 - Batak Toba bible

ULAON NI APOSTEL 8

¹I. [1] Alai dihalomohon si Saulus do pamununasida di si Stepanus. Jala masa ma olat ni na sadari i pangaleleon bolon dompak huria na di huta Jerusalem, gabe marserak ma nasida saluhutna, so padohot angka apostel, tu luat Judea dohot Samaria. [162†]

²Alai ditanom angka halak na daulat roha ma si Stepanus, jala na nia lelengna ditatangisi nasida ibana. [163†]

³Alai dipaporsukporsuk si Saulus do nasida na sahuria i: Dibongoti angka jabu, disarat sian i baoa nang boruboru, laho pasahathon tu hurungan. [164†] II.

⁴Madangadang do angka na marserak i huhut mamaritahon hata i. [165†]

⁵Laos tuat ma anggo si Pilippus tu huta Samaria, dijamitahon ma tu nasida Kristus i. [166†]

⁶Jadi dung dibege natorop i jamita ni si Pilippus jala diida angka tanda na pinatupana, saroha ma nasida marateatehonsa.

⁷Ai ruar do angka tondi na hodar, marsoara na balga sian torop halak na sinonggopanna i; godang do nang na sarion dohot na lumpuon dipamalum. [167†]

⁸Jadi mansai las ma roha ni nasida na sahuta i. [168†] III.

⁹Alai adong do di huta i hian sada halak na margoar si Simon, parsibalik mata na mangaliluhon roha ni halak Samaria i, ai na sumurung do ibana didok. [169†]

¹⁰Jadi saluhut halak, angka na metmet dohot na magodang, mangihuthon ibana, angka didok ma: On ma hagogoon ni Debata apala na balga!

¹¹Alai umbahen na dipaihutihut nasida ibana na sai leleng, ala lilu nasida dibahen hapandeanna i.

¹²Alai gabe tardidi ma angka baoa nang boruboru, dung porsea nasida di na binaritahon ni si Pilippus na taringot tu harajaon ni Debata dohot Goar ni Jesus Kristus. [170†]

¹³Dung i gabe porsea ma nang si Simon ondeng jala tardidi ma, laos dipaihutihut ma si Pilippus; jadi mansai longang ma rohana marnida tanda dohot hagogoon na balga, angka na masa i.

¹⁴Alai dung dibege angka apostel na di Jerusalem, naung dijalo halak Samaria i hata ni Debata, disuru nasida ma si Petrus dohot si Johannes manopot nasida.

¹⁵Tuat ma nasida, ditangiangkon ma angka dongan i, asa dijalo Tondi Parbadia.

¹⁶Ai ndang dope songgop Tondi i manang tu ise nasida, asal tardidi do nasida tubagasan Goar ni Tuhan Jesus.

¹⁷Jadi mangampehon tangan ma apostel i tu nasida, gabe dijalo ma Tondi Parbadia.

¹⁸Alai dung diida si Simon angka apostel i mangalehon Tondi Parbadia marhite sian na mangampehon tangan, ro ma ibana mamboan hepeng tu nasida.

¹⁹Didok ma: Lehon hamu ma huaso sisongon i nang tu ahu, asa manjalo Tondi Parbadia halak, ia huampehon tanganku tu ibana.

²⁰Alai didok si Petrus ma mandok ibana: Mago ma ho rap dohot perakmi; ai dirimpu ho, tartuhor silehonlehon ni Debata marhitehite hepeng! [171†]

²¹Ndang parjambar manang partohap ho di hata on, ai ndang na bonar roham maradophon Debata. [172†]

²²Ipe pauba ma roham sian hajahatonmi; dung i pangido ma tu Tuhan i, anggiat tarsesa tahitahi ni roham!

²³Ai huida do roham di bagasan pogu na paet, niihotan ni hageduhon. [173†]

²⁴Alai ninna si Simon i ma mangalusi: Tangiangkon hamu ma ahu tu Tuhan i, asa unang songgop tu ahu na nidokmuna i. [174†]

²⁵Asa dung dihatindangkon jala dihatahon hata ni Tuhan i, mulak ma anggo nasida tu Jerusalem; laos dibaritahon dope barita na uli i di torop huta na di luat Samaria. IV.

²⁶Alai dipanghulingi surusuruan ni Tuhan i ma si Pilippus: Hehe ma ho, laho ma dompak dangsina tu dalan na langlang i, na tuat sian Jerusalem tu huta Gasa!

²⁷Jadi hehe ma ibana laho tusi. Jala adong ma disi sada halak Etiopia, parpangkat na balga, siramoti saluhutna arta ni si Kandake, raja ni halak Etiopia; i ma naung ro sian Jerusalem, dung martangiang disi.

²⁸Jadi hundul ma ibana di huretana laho mulak, huhut manjahai surat ni panurirang Jesaya.

²⁹Alai ninna Tondi i ma mandok si Pilippus: Laho ma ho tusi, hombari ma hureta i!

³⁰Jadi marlojong ma si Pilippus tusi, gabe dibege ma ibana manjaha surat ni panurirang Jesaya; dung i ninna ma: Atehe, diantusi ho do na jinahami?

³¹Alai ninna ma: Songon dia ma haantusan ahu i, anggo so adong na mamodai ahu? Laos disosoi ma si Pilippus manaek, asa hundul tu lambungna.

³²Alai anggo hata ni surat na jinahana i on do: “Ditogu do Ibana songon birubiru tu pamotongan jala songon birubiru na hohom di jolo ni panggustingi; songon i do nang Ibana, ndang tarbege soarana.” [175†]

³³“Di hametmetonna i marujung uhum na tu Ibana. Ise ma manjujur sundutna i, ai tarhinsat do hosana sian tano on?”

³⁴Dung i ninna parpangkat i ma mangkuling i si Pilippus: Raja ho, ise do na nidok ni panurirang disi? Ibana sandiri do manang halak na leban?

³⁵Dung i mangkuling ma si Pilippus, dibaritahon ma Jesus tu Ibana, marbingkas sian hata ni surat ondeng.

³⁶Alai laho manulus dalan i, jumpang nasida ma aek, jadi ro ma parpangkat i: Ndi on ma aek! Adong dope ambatna, unang ahu tardidi? [176†]

³⁷Dung i didok si Pilippus ma: Anggo na porsea ho dohot nasa roham, jadi do i! Gabe ninna ma mangalusi: Ahu porsea. Anak ni Debata do Jesus Kristus! [177†]

³⁸Laos didokkon ma maradian hureta i; dung i mijur ma nasida, si Pilippus dohot parpangkat i tu aek i, dipandidihon ma ibana.

³⁹Alai di na nangkok i nasida sian aek i, diluahon Tondi ni Tuhan i ma si Pilippus, jadi ndang be diida parpangkat i ibana; marlas ni roha ma didatdati sidalananna i. [178†]

⁴⁰Alai anggo si Pilippus, di Asdod do ibana jumpang; dibolus ma angka huta i sude sahat ro di Kaesarea, huhut mamaritahon barita na uli i. [179†]