Read Batak Toba ULAON NI APOSTEL 9 Bible Online

ULAON NI APOSTEL 9 - Batak Toba bible

ULAON NI APOSTEL 9

¹I. [1] Alai sai tong dope diondamhon si Saulus asupasup dohot pamunuon dompak sisean ni Tuhan i. [180†]

²Ditopot ma sintua ni malim i mangido surat mandapothon angka parguruan na di huta Damaskus, asa ihotanna jala boanonna tu Jerusalem baoa nang boruboru pe, nasa na jumpangsa angka na mangihuthon agama i.

³Alai uju di tongandalan ibana, mardonokkon huta Damaskus, tompu ma sumillam sondang sian ginjang humaliang ibana. [181†]

⁴Jadi tinggang ma ibana tu tano, dung i dibege ma soara na mandok tu ibana: Saulus, Saulus! Boasa leleanmu Ahu? [182†]

⁵Alai didok ma: Ise do Ho, Tuhan? Jadi didok Ibana: Jesus do Ahu, na nileleanmi! (Susa ma ho manandahi turatura!) [183†]

⁶Angka hitir jala tarhalomong ibana mandok: Dia ma bahenonku, Tuhan, dipangido roham? Hata ni Tuhan i tu ibana: Hehe ma ho, bongoti ma huta i; disi ma paboaon tu ho sibahenonmu.

⁷Alai tarhatotong do anggo angka donganna sauduran i, ai dibege nasida do soara i, alai ndang diida manang ise.

⁸Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama tanganna, manogu ibana tu huta Damaskus.

⁹Asa tolu ari lelengna ndang marnida matana jala ndang mangan manang minum ibana.

¹⁰Jadi adong ma di huta Damaskus i sada sisean na margoar Ananias; dipataridahon Tuhan i ma dirina tu ibana, didok ma: Ale Ananias! Dung i dialusi ma: Dison do ahu, Tuhan!

¹¹Jadi didok Tuhan i ma mandok ibana: Hehe ma ho, laho ma tu alaman na margoar sitigor; tu bagas ni si Juda i ma pausoi halak Tarsus na margoar Saulus, ai na martangiang do ibana. [184†]

¹²Gabe diida ibana, bongot sada halak na margoar Ananias mangampehon tangan tu ibana, asa sumuang marnida.

¹³Alai ninna si Ananias ma mangalusi: Ale Tuhan, nunga sian lan halak hubege taringot tu godang ni na jahat na binahen ni halak i di huta Jerusalem tu angka na badiami.

¹⁴Dison pe marhuaso do ibana sian angka sintua ni malim i, mangihoti saluhutna na manjou Goarmu. [185†]

¹⁵Alai didok Tuhan i ma tu ibana: Laho ma ho, ai hupillit do ibana ulaulangku, asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel. [186†]

¹⁶Ai patuduhononku pe tu ibana godang ni sitaononna ala ni Goarhu. [187†]

¹⁷Jadi hehe ma si Ananias, dibongoti ma bagas i, diampehon ma tanganna tu ibana, huhut didok: O Saulus, anggia, disuru Tuhan i do ahu, i ma Jesus na niidami di pardalananmu ro tuson, asa sumuang marnida huhut gok Tondi Parbadia ho. [188†]

¹⁸Dung i pintor peut ma hapitungon i sian matana gabe sumuang marnida: Dung i hehe ma ibana gabe tardidi.

¹⁹Laos di jolo ma sipanganon jadi suang ma gogona. Dung i na nia do lelengna diangkupi ibana angka sisean na di huta Damaskus i.

²⁰Manigor marjamita ma ibana di bagasan angka parguruan i, dihatindangkon ma Jesus, paboa Anak ni Debata Ibana.

²¹Gabe muningan ma roha ni saluhutna na umbegesa, angka ninna ma: Nda ibana i, na mangalele di Jerusalem saluhutna angka na manjou Goar i; nang langkana tuson, nda laho mangihoti jala manogu nasida nian tujolo ni angka sintua ni malim? [189†]

²²Alai lam marsigomos ma si Saulus, pola jut do roha ni angka Jahudi na maringanan di huta Damaskus i dibahen, ai dipatorang do, Jesus i do Kristus. [190†]

²³Asa dung na nia lelengna, martahi ma angka Jahudi mamusa ibana. [191†]

²⁴Alai tarbortik ma tuptupnasida tu pinggol ni si Saulus. Pola do angka harbangan diingani nasida arian nang borngin, asa dapot ibana bunuonnasida.

²⁵Alai diboan angka sisean i ma ibana borngin i; sian parik ma ditantan nasida ibana di bagasan hirang. [192†]

²⁶Asa dung sahat ibana tu Jerusalem, naeng ma pasaoronna dirina tu angka sisean i; alai saluhut nasida mabiar mida ibana, ai ndang porsea nasida, naung gabe sisean ibana. [193†]

²⁷Si Barnabas do manjangkon ibana, ditogihon ma tu angka apostel i, laos dipajojor ma tu nasida, naung diida si Saulus Tuhan i di pardalananna dohot pangkataionnasida ro di pangkatindangkonna di Goar ni Jesus, uju na di huta Damaskus. [194†]

²⁸Dung i sai rap ma ibana dohot nasida mardalani di Jerusalem; marhiras ni roha do ibana mangkatahon Goar ni Tuhan i.

²⁹Pola dipanghulingi jala disuali angka Hellenist; alai dipatahitahi nasida do mambunu ibana.

³⁰Alai diboto angka dongan ma i, dipataru ma ibana tuat tu Kaesarea, laos disuru ma ibana tu huta Tarsus. [195†]

³¹Asa mardamedame ma huria i di liat luat Judea dohot Galilea ro di Samaria, jala lam tu toguna ma huhut mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia. [196†] II.

³²Alai diebati si Petrus ma nasida saluhutna, jala tuat ma ibana manopot angka na badia na maringanan di Lidda. [197†]

³³Jadi jumpangsa ma disi sada halak na margoar Eneas, na sarion, naung peak di podomanna, leleng ni ualu taon.

³⁴Jadi didok si Petrus ma mandok ibana: Eneas, dipamalum Jesus Kristus do ho; hehe ma ho, duduk ma podomanmi! Jadi manigor hehe ma ibana. [198†]

³⁵Jadi diida sude pangisi ni huta Lidda dohot Saron ibana, gabe didompakkon ma Tuhan i. III.

³⁶Dung i adong ma di Joppe parompuan sada na porsea, na margoar Tabita, astuanna hije (Dorkas), na sumurung mangulahon na denggan dohot mambahen asi ni roha. [199†]

³⁷Tongon ma di angka ari i marsahit ibana laos mate, jadi diburi ma ibana, dipeakkon ma tu bilut parginjang.

³⁸Alai jonok do huta Lidda tu huta Joppe; jadi tarbege ma tu angka dongan, si Petrus disi, gabe disuru ma dua halak manopot ibana mangapoi, asa humatop ibana ro tumopot nasida.

³⁹Jadi hehe ma si Petrus mandongani nasida. Asa dung sahat, ditogihon ma ibana tu bilut parginjang; jadi ro ma mandapothon ibana saluhut boruboru na mabalu angka na tumatangis, dipatuduhon tu ibana ulos dohot abit angka na pinauli ni si Tabita, andorang rap dope dohot nasida.

⁴⁰Alai dipalaho si Petrus ma nasida saluhutna, dung i marsinggang ma ibana martangiang, didompakkon ma bangke i, didok ma: O Tabita, hehe ma ho! Jadi dipabidok ma matana; dung i di na niidana si Petrus i, hundul ma ibana. [200†]

⁴¹Jadi disurdukkon ma tanganna, pahehehon ibana; dung i dijou ma angka na badia i ro di angka boruboru na mabalu, dipajongjong ma ibana mangolu di jolonasida. [201†]

⁴²Dung i sar ma i diboto saluhut pangisi ni huta Joppe, jadi torop do gabe porsea di Tuhan i.

⁴³Alai na nia do lelengna ibana mian di huta Joppe, sorang di sada halak na margoar Simon, sipauli hulingkuling. [202†]