Read Batak Toba ROM 1 Bible Online

ROM 1 - Batak Toba bible

ROM 1

¹I. [1] Ahu surat tinongos ni si Paulus, naposo ni Jesus Kristus, na tarjou gabe apostel jala pinapulik tu ulaon mamaritahon barita na uli na sian Debata. [1†]

²I ma diparbagabaga hian di angka surat na badia marhitehite angka panurirangna. [2†]

³Taringot tu Anakna Jesus Kristus, Tuhanta i, na tubu sian pomparan ni si Daud, ia dagingna. [3†]

⁴Naung gabe tandap Anak ni Debata na marhagogoon mangkihuthon Tondi na badia, dung hehe Ibana sian hamatean. [4†]

⁵Sian Ibana hujalo hami asi ni roha dohot tohonan apostel mangalopokkon pangoloion di haporseaon tu roha ni saluhut bangso, ala ni Goarna i. [5†]

⁶Sian nasida do nang hamu na jinou ni Jesus Kristus.

⁷Mandapothon angka na hinaholongan ni Debata jala angka na badia, na jinouna i, na di huta Rom: Asi ni roha ma di hamu dohot dame sian Debata Amanta nang sian Tuhan Jesus Kristus! [6†] II.

⁸Mandok mauliate ahu jumolo tu Debatangku marhitehite Jesus Kristus siala sude hamu, ala tu liat portibi on do tarbarita haporseaonmuna. [7†]

⁹Ndang mansadi ahu marningot hamu. Ia sitindangingku Debata do, na huoloi di bagasan tondingku, di na hubaritahon Anakna i. [8†]

¹⁰Tongtong do hupangido di angka tangiangku, anggiat tung manang andigan pe lomo ni roha ni Debata patiurhon dalanku manopot hamu. [9†]

¹¹Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna. [10†]

¹²On do tahe: Naeng dapotan hiras ni roha nang ahu sian hamu hinorhon ni haporseaonta bé. [11†]

¹³Alai naeng ma botoonmuna, angka dongan, naung jotjot ditahi rohangku manopot hamu, asa marparbue ahu nang di hamu songon na di angka bangso na leban i; alai tarsabat do ahu rasirasa nuaeng.

¹⁴Na marutang do ahu di halak Junani nang di bangso na leban, di angka parhapistaran nang di angka na hurang roha.

¹⁵Dibahen i husangkap sian nasa rohangku manjamitahon barita na uli i nang di hamu di huta Rom. III.

¹⁶Ai ndang na huhailahon barita na uli i, ai hagogoon ni Debata do i paluahon nasa na porsea, halak Jahudi jumolo, dung i dohot do halak Junani. [12†]

¹⁷Ai dipapatar do disi hatigoran ni Debata, na sian haporseaon tu haporseaon, hombar tu na tarsurat hian: “Na mangolu do partigor i hinorhon ni haporseaonna!” [13†] IV.

¹⁸Ai dipapatar do sian ginjang rimas ni Debata dompak nasa jolma, na so daulat jala na geduk roha, na mangambat hasintongan i marhitehite hageduhon.

¹⁹Tandap do nian di nasida pamotoan taringot tu Debata dipatandap Debata. [14†]

²⁰Ai dapot tarida do pangalaho ni Debata na buni hian, timbangon ni roha, sian angka pambahenan ni Debata di na tinompana i hasiangan on, i ma hagogoonna dohot hadebataonna na manongtong i, asa unang adong sidaliannasida. [15†]

²¹Ai atik pe diboto nasida Debata, ndang dipasangap Ibana songon na tama di Debata, jala ndang dipuji, gabe dipaotooto angka pingkiranna do nasida, jala mangkolom ma rohanasida na so mangarti i. [16†]

²²Dirimpu, na bisuk nasida, hape na loahon do! [17†]

²³Dipasambar do hasangapon ni Debata na manongtong i tu gombaran na suman tu jolma na mangilas i, songon i tu pidong dohot tu binatang ro di na manjirir i. [18†]

²⁴Dibahen i dipasahat Debata do nasida di bagasan hisaphisap ni rohanasida tu hahodaron i, pola diparonsam nasida dagingna sama nasida. [19†]

²⁵Ai dipasambar do hasintongan ni Debata gabe gabus, jadi disomba jala dioloi na tinompa singkat ni Panompa i, na tarpuji ro di salelenglelengna. Amen.

²⁶Ala ni i dipasahat Debata nasida tu hahisapon hailaon, ai dipaimbar angka boruborunasida do bangko hian tu na so bangko.

²⁷Suang songon i nang angka baoa, ditinggalhon do ruhut hian, siingoton maradophon boruboru, gabe garang ma nasida di bagasan hahisapon, pola baoa sama baoa mangulahon hailaon jadi patut do dijalo di dirina be upa ni haliluonnasida. [20†]

²⁸Ala so diparhamaol nasida na mananda Debata, gabe dipasahat Debata nasida tu parrohaon na so gabeak, asa diulahon na so uhum.

²⁹Tung gok do nasida nasa hageduhon hajahaton, haroaon, pangahution, latelate, bunubunu, badabada, ansiansi dohot angkal bisuk.

³⁰Angka parmihimmihim, parhata tundal, sihosomi Debata, angka na jungkat, siginjang roha, sideak hata, parpingkiran na roa, na manoisi natorasna;

³¹na so marroha, siose padan, na so umboto holong dohot asi ni roha.

³²Diboto nasida do nian uhum na pinatikkon ni Debata, mandok na tama marutang hosa angka na mangulahon sisongon i, hape tong do diula; lumobi tahe, lomo do rohanasida mida angka na mangulahonsa.