Read Batak Toba ROM 13 Bible Online

ROM 13 - Batak Toba bible

ROM 13

¹I. [1] Unduk ma ganup di panggomgomi na marsahala; ai ndang adong sahalana, ia so sian Debata, Debata do mangaturhon nasida. [220†]

²Asa na mangalo aturan ni Debata do na mangalo panggomgomi i. Alai na mangaithon uhum tu dirina do na mangalo i.

³Ai angka siula hajahaton do patut mangkabiari panggomgomi, ndada angka siulahon na denggan. Na denggan ma ulahon, asa unang pola habiaranmu panggomgomi i, asa dapot pujipujian ho tahe sian nasida. [221†]

⁴Suruan ni Debata do nasida, laho manumpak ho. Alai molo diula ho na jat, patut ho tahutan, ai ndada gaitgait podang na niusungna i. Suruan ni Debata do nasida, mangkonahon uhum tu siulahon hajahaton. [222†]

⁵Dibahen i patut marunduk ni roha hita; ndada nionjar ni biar mida rimasna, tung sinuru ni roha i do.

⁶Ala ni i garar hamu ma nang beo i, ai parhobas ni Debata do nasida; tusi do nasida disuru.

⁷Tu ganup ma lehon hamu na tama tungguonna: Beo tu na patut manjalosa, sohe tu na ture hasahatanna, biar tu na tama habiaran, hormat tu na talup hormatan. [223†] II.

⁸Unang marutang hamu manang tu ise, dungkon ni ruhut masihaholongan; ai na mangkaholongi dongan, i do manggohi patik i. [224†]

⁹Ai na nidok ni patik i: “Unang ho mangalangkup! Unang ho mambunu! Unang ho manangko! Unang marpangkaliangi roham!” Ro di nasa patik na asing, on do pamusatanna: “Haholongi donganmi songon dirim!” [225†]

¹⁰Ia parholong ni roha, ndang diulahon na jahat tu angka dongan; asa haholongon ni roha i do tutu hagogok ni patik i. [226†] III.

¹¹I ma ringkoti hamu, ala diboto hamu tingkina: Ai naung dapot do ombasna, laho hehe sian na modom; ai nunga jumonok haluaonta nuaeng, sian uju gabe porsea hita. [227†]

¹²Na salpu ne ma borngin, na jonok nama arian. Antong, tatanggali ma angka ulaon haholomon; tasolukkon ma angka sinjata hatiuron! [228†]

¹³Badia ma hita marpangalaho songon na patut arian, unang masalpuhu parmanganon dohot parminumon, unang marharorangon dohot margadombus, unang marbada dohot mangiburu! [229†]

¹⁴Alai solukkon hamu ma Tuhan Jesus Kristus; jala unang ma sarihon hamu dagingmuna laho manungguli hisaphisapna. [230†]