Read Batak Toba ROM 15 Bible Online

ROM 15 - Batak Toba bible

ROM 15

¹I. [1] Alai patut do hita na margogo i manganju hagaleon ni angka na hurang gogo, jala unang ma tahasiani dirinta. [248†]

²Ganup ma hita mambahen halomoan ni roha ni dongan, laho padengganhon jala pauliulihon. [249†]

³Ai nang Kristus pe, ndang dihasiani dirina; songon na nidok ni Surat i tahe: “Toho do tu ahu reherehe ni angka na mangarehei Ho!” [250†]

⁴Ai nasa na tarsurat hian, bahen poda di hita do, umbahen na tarsurat; asa marpangkirimon hita binahen ni habengeton dohot pangapulon na di bagasan Surat i. [251†]

⁵Alai dilehon Debata, nampuna habengeton dohot pangapulon i, ma tu hamu hasadaon ni roha sama hamu mangihuthon Kristus Jesus, [252†]

⁶asa sahata sasoara hamu mamuji Debata jala Ama ni Tuhanta Jesus Kristus!

⁷Dibahen i masijangkonan ma hamu, songon panjangkon ni Kristus di hita, bahen hasangapon ni Debata.

⁸Ai on do hudok: Naung gabe pangoloi di angka na tarsunat do Kristus ala ni hasintongan ni Debata, laho pahothon bagabaga na tu angka ompu najolo. [253†]

⁹Alai dipasangap angka sipelebegu i do Debata ala ni asi ni rohana, songon naung tarsurat: “Ala ni i do pujionku Ho di tongatonga ni angka sipelebegu jala endehononku ma Goarmu!” [254†]

¹⁰Jala didok di na asing muse: “Marolopolop ma hamu angka sipelebegu rap dohot bangsona!” [255†]

¹¹Jala di na asing muse: “Puji hamu ma Tuhan i, sude hamu angka sipelebegu, jala pujion ni saluhut angka bangso ma Ibana!” [256†]

¹²Jala didok si Jesaya do muse: “Adong ma sogot urat ni si Isai, jala hehe ma na manggomgomi angka parbegu; tu Ibana ma mangkirim angka bangso!” [257†]

¹³Alai gok ma dibasabasahon Debata, nampuna pangkirimon i, tu hamu ragam ni halalas ni roha dohot dame di bagasan haporseaon, asa lam sumurung hamu marpangkirimon, pinargogoan ni Tondi Parbadia! II.

¹⁴Ahu pe tangkas do huboto, naung gok habasaron jala saluhut hapistaran hamu, angka dongan; na tarbahen hamu do masipasingotan.

¹⁵Alai barani do ahu mambahen saotik surat tu hamu, songon na pasingothon hamu ala ni asi ni roha na binasabasahon ni Debata tu ahu. [258†]

¹⁶Ai naung gabe parhalado ni Kristus Jesus do ahu tu halak sipelebegu, asa huulahon barita na uli ni Debata, anggiat angka sipelebegu i gabe pelean na tau jaloon, na pinarbadiaan di bagasan Tondi Parbadia. [259†]

¹⁷Asa na tarpuji ahu do diringku di bagasan Kristus Jesus, marningot ulaon na hujalo sian Debata.

¹⁸Ai ndang hum rohangku mangkatahon na so dihorhon Kristus di bagasan ahu, manogunogu angka sipelebegu tu pangoloion, di hata dohot di ulaon, [260†]

¹⁹mardongan hagogoon ni tanda dohot halongongan, di bagasan hagogoon ni Tondi Parbadia. Songon i do sahat hupatubegehon barita na uli na sian Kristus, mamungka sian Jerusalem dohot luat na humaliang sahat ro di Ilirikum. [261†]

²⁰Alai hasurunganku do huetong: Mamaritahon barita na uli i sandok di na so tarbarita dope Goar ni Kristus, asa unang ahu songon na pauli jabu diatas ojahan ni na leban. [262†]

²¹Alai mangihuthon hata ni Surat i: “Marnida ma angka na so dapotan barita i, jala mangantusi ma angka na so dung umbegesa.” [263†] III.

²²Laos i do mangambat ahu gumodang, umbahen na so ro ahu, manopot hamu. [264†]

²³Alai anggo nuaeng: Ndang adong be siulaonku di angka luat i; jala nunga manang piga taon hian dihasiholi rohangku manopot hamu, laho borhat tu Hispania. [265†]

²⁴Ai hirim do rohangku, idaonku hamu di na mamolus ahu, jala pataruonmuna ahu tusi, dung jolo sombu rohangku otik marnida hamu. [266†]

²⁵Alai tu Jerusalem dope langkangku anggo saonari, sumarihon angka na badia i. [267†]

²⁶Ai dipaputus huria Makedonia dohot Akaya do, mambahen pangurupion tu angka dongan na hurangan di Jerusalem. [268†]

²⁷I ma tahinasida; ai tutu utangnasida do i: Ai molo angka sipelebegu gabe partohap di arta partondion na di nasida, tama do antong ditolongi angka sipelebegu nasida taringot tu angka na ringkot di daging. [269†]

²⁸Ia dung hupaujung i jala tangkas hupatolhas parsaulian on, borhat ma ahu sian hamu tu Hispania.

²⁹Alai huboto do, molo ro ahu tu hamu, mantat hagogok ni pasupasu ni Kristus do ahu ro. [270†]

³⁰Alai huapoi ma hamu ale angka dongan, marhitehite Tuhanta Jesus Kristus dohot marhitehite holong ni roha ni Tondi i: Dongani hamu ma ahu marungkil marhite sian na tumangiangkon ahu tu Debata, [271†]

³¹anggiat dipalua ahu sian angka na tois na di Judea jala anggiat dihalomohon angka na badia i ulaonki na tu Jerusalem,

³²anggiat marlas ni roha ahu sahat tu hamu hombar tu roha ni Debata, gabe rap tarapul rohanta.

³³Didongani Debata Pardame i ma hamu saluhutna! Amen. [272†]