Read Batak Toba ROM 16 Bible Online

ROM 16 - Batak Toba bible

ROM 16

¹I. [1] Hupasahat ma tu hamu ibotonta si Poibe, pangurupi di huria Kenkrea.

²Jangkon hamu ma nasida marhitehite Tuhan i, songon na tama di angka na badia, jala urupi hamu ma nasida di nasa ulaon, jumpa ringkot urupan. Ai naung gabe pangurupi nasida di torop halak, nang di ahu pe.

³Tabingku di si Priska dohot Akuila, angka donganku pangula di bagasan Kristus Jesus. [273†]

⁴Diseahon nasida do hosanasida humongkop ahu; gabe ndada holan ahu mandok mauliate tu nasida, tung saluhut huria na sian sipelebegu do.

⁵Tabingku nang di punguan na di bagasnasida, Tabingku di si Epenetus, haholonganki, patumonaan ni huria ni Kristus di Asia.

⁶Tabingku di si Maria na mangkalojahon hamu.

⁷Tabingku di si Andronikus dohot di si Junias, angka donganku samarga, donganku tarhurung; denggan do baritanasida di angka apostel jala na jumolo nasida di Kristus asa ahu. [274†]

⁸Tabingku di si Ampliatus, na huhaholongi di bagasan Tuhan i.

⁹Tabingku di si Urbanus, donganta di bagasan Kristus, songon i di si Stakis, haholonganki.

¹⁰Tabingku di si Apelles, naung tau nidapot di Kristus. Tabingku ma di angka dongan sabagas ni si Aristobulus.

¹¹Tabingku di si Herodion, donganku samarga, Tabingku di dongan sajabu ni si Narkissus, angka na di bagasan Tuhan i.

¹²Tabingku di si Tripena dohot Triposa, angka na olo loja humongkop Tuhan i. Tabingku di si Persis, haholongan i, naung olo loja situtu humongkop Tuhan i.

¹³Tabingku di si Rupus, na pinillit ni Tuhan i, songon i di inangna, na songon ina di ahu. [275†]

¹⁴Tabingku di si Asinkritus, Plegon, Hermes, Patrobas, Hermes, nang di angka dongan na rap dohot nasida.

¹⁵Tabingku di si Polologus, si Julia, Nerius ro di ibotona i, di si Olimpas dohot di sude dongannasida na badia i.

¹⁶Masitabian ma hamu huhut masiummaan di bagasan habadiaon! Sahat ma tabi ni sude angka huria ni Kristus tu hamuna! [276†] II.

¹⁷Huapoi ma hamu angka dongan: Jagahon hamu ma angka na mambingkasi parsalisian dohot pargasipan mangalo poda naung ginuruhonmuna, jala pasiding hamu ma nasida. [277†]

¹⁸Ai ndada Tuhanta Kristus dioloi nasida, butuhanasida do; jala dipaotooto nasida do angka na so umboto hajahaton, marhitehite hatanasida na uli jala na tabo di pinggol. [278†]

¹⁹Ai nunga tarbarita pangoloionmuna tu saluhutna, i do halalas ni rohangku di hamuna; alai naeng ma di rohangku marbisuk tu na denggan hamu, polin pasidingkon na roa. [279†]

²⁰Alai tibu ma rosahan ni Debata Pardame i sibolis i tutoru ni patmuna. Didongani asi ni roha ni Tuhanta Jesus ma hamuna! [280†]

²¹Manongos tabi tu hamu si Timoteus, donganku pangula, songon i si Lucius, Jason, Sosipater, angka donganku samarga. [281†]

²²Mandok tabi di hamu di bagasan Tuhan i, ahu si Tertius na manurathon surat on.

²³Mandok tabi di hamu si Gayus na manamuei ahu ro di sandok huria i, songon i si Erastus hasahatan ni hepeng ni huta i, dohot si Kuartus dongan i. [282†] (

²⁴Didongani asi ni roha ni Tuhanta Jesus Kristus ma hamu sudena! Amen.)

²⁵Alai hasangapon ma di Debata na tuk margogoihon hamu, hombar tu barita na uli na hubaritahon dohot jamita ni Jesus Kristus. I ma hasimoon naung dipaullop, dung jolo ditabunihon sian na robi. [283†]

²⁶I ma dipapatar nuaeng marhite sian surat ni angka panurirang mangihuthon tona ni Debata na manongtong i, jala dipabotohon tu saluhut bangso, asa dioloi be porsea. [284†]

²⁷Di Ibana, Parbisuk mamunjung i, ma hasangapon marhitehite Kristus ro di salelenglelengna! Amen. [285†]