Read Batak Toba ROM 3 Bible Online

ROM 3 - Batak Toba bible

ROM 3

¹I. [1] Asa dia nama hasurungan ni Jahudi? Tu aha ma hasea parsunaton i?

²Sandok godang do i. Parjolo: Hasahatan ni angka pandok ni Debata do nasida. [37†]

³Ai beha nama, ia so porsea na deba? Tung tarbahen nasida na so porsea i ma manegai haburjuon ni Debata Sihaposan i? [38†]

⁴Dao ma i! On do tahe: Parsintong do ia Debata, alai pargabus do nasa jolma, songon na tarsurat i: “Asa pintor ho di angka pandohanmu jala monang di panguhumonmi!” [39†]

⁵Alai beha ma dohononta? Ia dipajongjong hageduhonta hatigoran ni Debata, nda na geduk ma Debata, molo dipalalu rimasna? Santabi di Debata!

⁶Dao ma i! Ai aut i, songon dia ma taruhum Debata portibi on?

⁷Alai molo lam timbul hasintongan ni Debata binahen ni gabushu paganda hasangaponna boasa uhumon dope ahu songon pardosa?

⁸Nda tagonan ma taula na roa, asa ro na denggan, songon pandok ni na deba magarehei hita; songon i do hatanta, ninna. Patut ma antong hona uhum angka sisongon i! [40†]

⁹Asa boha ma? Marhasurungan do hami? Ndangana, ai nunga hupatorang: Rap ginomgoman ni dosa do saluhutna, halak Jahudi nang halak Junani. [41†]

¹⁰Hombar tu na tarsurat i: “Ndang adong na tigor nanggo sada!” [42†]

¹¹“Ndang adong na marroha, na usouso di Debata.”

¹²“Saluhut nasida nunga manimbil, tung sange do nasida marroha mago; ndang adong sibahen na denggan nanggo sada.”

¹³“Tanoman na ngangang do aruarunasida, na paotootohon do dilanasida; bisa ni ulok dari do ditoru ni bibirnasida.” [43†]

¹⁴“Gok burabura dohot hata podu pamangannasida.” [44†]

¹⁵“Hirtap do patnasida mandurushon mudar.” [45†]

¹⁶“Hamagoan dohot haporsuhon do di dalannasida.”

¹⁷“Ia dalan hadameon i ndang diboto.”

¹⁸“Ndang marhabiaran di Debata rohanasida.” [46†]

¹⁹Alai taboto do: Tu na ginomgoman ni patik i do nasa hata ni patik i, asa mangkohom nasa jolma jala marutang tu Debata sandok manisia. [47†]

²⁰Ai ndang dapotan hatigoran jolma nanggo sada di adopan ni Debata, anggo sian na mangulahon patik i. Ai dihorhon patik i do panandaon di dosa. [48†] II.

²¹Alai nunga gabe patar nuaeng hatigoran ni Debata, so sian patik i, songon naung dihatindangkon patik i nang angka panurirang pe. [49†]

²²I ma hatigoran ni Debata na marhitehite haporseaon di Jesus Kristus sahat tu saluhut angka na porsea.

²³Ai ndang adong imbar ni i: Tung saluhut do nasida mardosa jala ndang dapot pujion ni Debata nasida. [50†]

²⁴Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus. [51†]

²⁵Ibana do dipadiri Debata bahen habangsa parasian marhite sian haporseaon di mudarna i, asa dipapatar Debata disi hatigoranna, ala naung dibolus matana angka dosa najolo marhite lambas ni rohana. [52†]

²⁶Ai naeng papataron ni Debata hatigoranna apala nuaeng, asa pintor Ibana jala dipintori na marhaporseaon di Jesus.

²⁷Asa adong dope sipangasahononhon? Nunga gotap anggo i! Binahen ni patik dia do? Binahen ni angka parulaon i do? Nda tung, binahen ni patik haporseaon i do. [53†]

²⁸Asa on do dijujur rohanta: Haporseaon i do mamintori jolma, ndada na mangulahon patik. [54†]

²⁹Ai holan Jahudi do nampuna Debata? Nda dohot sipelebegu i? I do antong; dohot do sipelebegu i! [55†]

³⁰Ai sada do Debata na mamintori na tarsunat sian haporseaonnasida, songon i nang na so tarsunat i, ala ni haporseaonnasida. [56†]

³¹Asa na mangarumpakkon patik do hita binahen ni haporseaon i? Dao ma i! Na pajongjongkon patik i do hita. [57†]