Read Batak Toba ROM 4 Bible Online

ROM 4 - Batak Toba bible

ROM 4

¹Beha ma di rohanta? Aha ma jumpang si Abraham, amanta i, taringot tu daging.

²Ai ia pintor si Abraham sian na niulana, adong ma sipangasahononna; alai nda tung maradophon Debata.

³Ai nda on do didok Surat i: “Na porsea do si Abraham di Debata, gabe i ma dirajumi bahen hatigoranna!” [58†]

⁴Utang na so tarjua do upa sijaloon ni na mulaulaon, nda tung asi ni roha. [59†]

⁵Alai haporseaon do rajumon gabe hatigoran anggo di jolma na so mangaradoti ulaon, asal porsea ibana di Sipintori na jahat.

⁶Songon pandok ni si Daud, ai diparhatua do halak na gabe pintor dirajumi Debata, so sian parulaonna: [60†]

⁷“Martua ma jolma, naung sinesaan pangalaosionna, naung hinungkupan dosana!

⁸Martua ma halak, anggo so dijujur Tuhan i dosana tu ibana!”

⁹Ise antong diparhatua disi? Angka na marsunat do, manang dohot do angka na so marsunat? Ai nunga tadok: “Dietong do haporseaon ni si Abraham gabe hatigoranna!”

¹⁰Ai beha do antong dirajumi? Dung marsunat ibana, manang andorang so marsunat i? Andorang so marsunat dope!

¹¹Anggo parsunaton i, partinandaan do i, sumahaphon tu ibana hatigoranna ala ni haporseaonna andorang so marsunat dope, asa gabe ama ibana di saluhut angka na porsea na so marsunat i, asa nang tu nasida dirajumi hatigoran. [61†]

¹²Huhut do ibana ama ni angka na marsunat; alai ndada asal tarsunat nasida, naeng ma ditiru haporseaon ni si Abraham, amanta i, andorang so marsunat dope. [62†]

¹³Ai ndada marhite sian patik i ro bagabaga tu si Abraham nang tu pomparanna, na mandok: Ibana tumean portibi on; marhite sian hatigoran na sian haporseaon i do. [63†]

¹⁴Ai aut angka siradoti patik i gabe panean, ndang marguna haporseaon i, jadi pesan ma bagabaga i.

¹⁵Ai dihorhon patik i do rimas; alai anggo soada patik, laos so adong do pangalaosion. [64†]

¹⁶Dibahen i sian haporseaon i do bagabaga i, asa sian asi ni roha do, ai naeng hot bagabaga i di sandok pomparanna i; ndada holan di dongan sapatik ni si Abraham, dohot do di donganna sahaporseaon, ai ama ni hita saluhutna do ibana.

¹⁷Hombar tu na tarsurat i: “Hupabangkit do ho gabe ama ni torop bangso!” Di adopan ni Debata ma i, na hinaporseaanna Sipangolu angka na mate jala Sijou na so adong hian gabe adong. [65†]

¹⁸Maralohon nasa pangkirimon do haporseaonna na mangkirim i, asa gabe ama ni torop bangso ibana, hombar tu hata i: “Songon i ma sogot pomparanmu!” [66†]

¹⁹Ndang na olo gale haporseaonna i paidaida pamatangna na hira so marngolu be, ai nunga saratus taon né umurna, nang paidaida si Sara, naung saep ladang i. [67†]

²⁰Ndang olo ganggu rohana tumadingkon haporseaon di bagabaga ni Debata; na lam tu toguna do tahe haporseaonna jala diparsangapi do Debata. [68†]

²¹Ai pos situtu do rohana: Tuk do gogo ni Debata patupahon na pinarbagabagana i.

²²Ala ni i do umbahen na dirajumi i gabe hatigoranna. [69†]

²³Ndada ala ni ibana sambing, umbahen na tarsurat, naung dirajumi tu ibana. [70†]

²⁴Hita pe, ditatap do disi, ai sirajumon do nang tu hita haporseaon di Ibana, na pahehehon Jesus Tuhanta i sian na mate.

²⁵Ai dipasahat do Ibana ala ni pangalaosionta i, jala dipangolu siala hatigoranta. [71†]