Read Batak Toba ROM 6 Bible Online

ROM 6 - Batak Toba bible

ROM 6

¹Antong, dia ma dohononta? Datdatanta ma mardosa, asa tung timbul asi ni roha? [86†]

²Dao ma i! Hita angka naung mate di dosa i, tung tarbahen hita dope mangolu di bagasan i?

³Na so diboto hamu do on: Sude hita, nasa naung tardidi tubagasan Kristus Jesus, tubagasan hamateanna do hita tardidi? [87†]

⁴Antong, naung tartanom do hita rap dohot Ibana marhitehite pandidion i tubagasan hamatean, asa marparange hita di bagasan ngolu na imbaru, songon Kristus naung hehe sian angka naung mate hinorhon ni hasangapon ni Amana. [88†]

⁵Ai anggo nunga sanghambona hita dohot Ibana, di na rap mate hita dohot Ibana i, suang songon i ma hita nang taringot tu haheheon. [89†]

⁶Ai taboto do: Nunga tarsilang hadirionta na buruk raphon Ibana, asa pinasohot daging pardosaon, asa unang be hita mangadop di dosa. [90†]

⁷Ai dung mate jolma, lias do ibana sian dosa.

⁸Alai molo naung mate hita rap dohot Kristus, dihaporseai rohanta, rap mangolu ma hita dohot Ibana. [91†]

⁹Ai taboto do, na so mate be Kristus, dung mulak mangolu sian na mate; ndang dirajai hamatean i be Ibana.

¹⁰Ai mate pe Ibana, sahali do i, ala ni dosa; ia mangolu nuaeng, di Debata do i. [92†]

¹¹Suman tusi ma rajumi hamu dirimuna songon naung mate di dosa i, alai mangolu di Debata di bagasan Kristus Jesus. [93†]

¹²Antong, unang ma dosa i mangarajai di bagasan dagingmuna na olo mate i, mangoloi hisapna! [94†]

¹³Jala unang ma pasahat hamu angka ruasmuna tu dosa i, bahen sinjata ni hajahaton; tu Debata ma tahe pasahat hamu dirimuna songon angka naung pinangolu sian na mate; songon i nang ruasmuna, tu Debata ma i, bahen sinjata ni hatigoran! [95†]

¹⁴Ai ndang rajaan ni dosa i be hamu, ai ndang digomgomi patik i hamu, tung asi ni roha i do. [96†]

¹⁵Antong, beha nama? Mardosa ma hita, ala ginomgoman ni asi ni roha i, ndada ginomgoman ni patik i hita? Dao ma anggo i! [97†]

¹⁶Ndang diboto hamu on: Ia tusi dipasahat hamu dirimu gabe hatoban pangoloi, hatoban ni i do hamu angka na mangoloi: Manang hatoban ni dosa tu hamatean, manang pangoloi tu hatigoran. [98†]

¹⁷Alai mauliate ma di Debata, ala salpu tingki pangadopanmuna di dosa i; gabe pangoloi hamu nuaeng sian nasa rohamuna di ruhut ni poda, naung sahat tu hamu.

¹⁸Ai dung malua hamu sian dosa i, gabe tunduk do hamu mangoloi hatigoran i. [99†]

¹⁹Ruhut ni jolma ma huumpamahon ala ni hagaleon ni dagingmuna: Ai songon naung pinasahatmuna angka ruasmuna gabe pangoloi di hahodaron dohot di na so uhum, mangulahon na so uhum i; songon i ma pasahat hamu nuaeng angka ruasmuna tu hatigoran, laho pabadiahonsa.

²⁰Tutu nian, uju hatoban ni dosa hamu, malua do hamu sian hatigoran.

²¹Antong, dia do parbuemuna disi? Angka na hinailahonmuna anggo nuaeng, ai hamatean do hapateanna. [100†]

²²Alai nuaeng, dung malua hamu sian dosa i, dung gabe pangoloi di Debata hamu, adong do parbuemuna tu habadiaon; jala hangoluan na salelenglelengna do hapateanna. [101†]

²³Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i. [102†]