Read Batak Toba ROM 8 Bible Online

ROM 8 - Batak Toba bible

ROM 8

¹Onpe, ndang na mangonai be uhum tu angka na di bagasan Kristus Jesus, angka na so marpangalaho marguru tu daging, na marguru tu tondi do. [117†]

²Ai nunga dipalua patik ni tondi hangoluan na di bagasan Kristus Jesus do ahu sian patik ni dosa dohot hamatean. [118†]

³Ai dung so margogo patik i, na pinagale ni daging i, disuru Debata do Anakna sandiri ala dosa i, marrupahon daging pardosaon i; gabe songon i ma dihonahon uhum tu dosa i, di bagasan daging i. [119†]

⁴Asa jumpang ma hatigoran na pinangido ni patik di hita, angka na mangihuthon Tondi i, ndang be anggo daging. [120†]

⁵Ai pardagingon do diparrohahon angka na mangihuthon daging i; alai Tondi do diparrohahon angka na mangihuthon Tondi i.

⁶Ai hamatean do harohaon ni daging, alai hangoluan jala hadameon do anggo harohaon ni Tondi. [121†]

⁷Hamusuon dompak Debata do harohaon ni daging; ndang olo unduk i di patik ni Debata, ai ndang tarbahensa. [122†]

⁸Alai ndang tarhalomohon Debata angka parroha daging.

⁹Alai anggo hamu, ndang be di bagasan daging i, di bagasan Tondi do, molo tung tutu Tondi ni Debata maringanan di bagasan hamu. Alai molo so Tondi ni Kristus di jolma, ndang Kristus nampuna ibana. [123†]

¹⁰Alai molo Kristus di bagasan hamu, mangolu do tondi ala ni hatigoran, nang pe mate pamatang ala ni dosa i.

¹¹Alai molo maringanan di bagasan hamu Tondi ni na manungguli Jesus sian na mate, sandok pangoluon ni Ibana, naung manungguli Kristus Jesus i, ma nang pamatangmuna na mate i, hinorhon ni Tondina na mangingani hamu.

¹²Onpe, ale angka dongan, unang be hita mangadop di daging, marparange marguru tu daging! [124†]

¹³Ai molo marguru tu daging hamu marparange, mate ma hamu; alai molo dipamate hamu parulaon ni pamatang marhitehite Tondi i, mangolu ma hamu. [125†]

¹⁴Ai nasa na tinogihon ni Tondi ni Debata, angka i do anak ni Debata.

¹⁵Ai ndang na dijalo hamu tondi hatoban, asa mangulahi mabiar, Tondi haanakon do dijalo hamu; mangasahon I do panjouonta: Abba, mandok: Ale Amang! [126†]

¹⁶Laos Tondi i do mangkatindangkon di tondinta, paboa na tutu hita anak ni Debata. [127†]

¹⁷Alai molo anak hita, dohot ma panean; panean di Debata, dongan panean ni Kristus; molo tung donganna hita di sitaonon, gabe donganna hita sogot nang di hasangapon. [128†]

¹⁸Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot. [129†]

¹⁹Ai malungun do nasa na tinompa i paimaimahon tingkina, asa dipapatar angka anak ni Debata. [130†]

²⁰Ai tu habusukon do dipatunduk na tinompa i; ndada sian lomona, tung binahen ni na patundukkonsa do. [131†]

²¹Huhut mangkirim: Paluaonna ma nang na tinompa i sian pangadopan hamagoan, sahat tu haluaon hasangapon na di angka anak ni Debata. [132†]

²²Ai taboto do, sai tong dope rap marhoi jala mambebe nasa na tinompa i.

²³Angkup ni i, nang hita angka naung manjalo patumonaan ni Tondi i, marhoihoi di bagasan rohanta, paimaimahon haanakon, asa disi marhaluaon pamatangta. [133†]

²⁴Ai tong dope mangkirim hita, angka naung malua. Alai molo niida na hinirim i, ndang pangkirimon be i dohonon; ai marhua hirimon, anggo dung diida mata! [134†]

²⁵Alai molo mangkirim hita di na so taida dope, marbenget ni roha ma hita paipaimahonsa.

²⁶Alai nang Tondi i, diurupi do hita di hagaleonta i; ai ndang taboto, manang aha na tama sipangidoonta, gabe diondihon Tondi i do hita marhitehite hata na hinoihon na so tangkas hinatahon.

²⁷Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia i.

²⁸Alai taboto do, saluhutna do manumpak tu na denggan di angka na marholong ni roha di Debata, angka na jinouna sian tahina hian. [135†]

²⁹Ai angka na tinandana hian, i do ditodo, asa gabe tudos nasida tu pangalaho ni Anakna i, asa Ibana na parjolo tubu sian torop anggina. [136†]

³⁰Jala angka naung tinodona, i do dijou; jala na jinouna, i do dipintori; jala angka naung pinintoranna, i do dipasangap.

³¹Onpe, aha ma dohononta disi? Molo Debata donganta, ise ma alonta? [137†]

³²Ndang diolani Ibana Anakna sandiri, tung dipasahat do humongkop hita saluhutna tagamon ma so basabasahononna raphon Ibana saluhutna i tu hita? [138†]

³³Ise mangaluhon angka na pinillit ni Debata? Ai Debata do na mamintori.

³⁴Ise do na mandabu uhum hamagoan? Nunga mate Kristus Jesus i, lobi tahe, naung mulak mangolu do; di siamun ni Debata do Ibana mangondihon hita. [139†]

³⁵Dia manirang hita sian holong ni roha ni Kristus i? Haporsuhon do manang hagogotan, manang pangaleleon manang haraparon, manang parsaemaraon, manang mora, manang podang pe?

³⁶Hombar tu na tarsurat i: “Humongkop Ho do dibunui hami manipat ari; songon birubiru sipotongon do hami dirajumi.” [140†]

³⁷Alai andul do hamonanganta di saluhutna i, hinorhon ni na mangkaholongi hita.

³⁸Ai gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe,

³⁹manang bahenon ni na di ginjang nang na di toru, ro di nasa na tinompa pe.