Read Batak Toba 1 KORINT 10 Bible Online

1 KORINT 10 - Batak Toba bible

1 KORINT 10

¹I. [1] Ai naeng ma tangkas botoonmuna di rohangku, ale angka dongan: Ia angka amanta najolo, saluhut do nian nilinggoman ni ombun i, jala saluhut do nasida mamostang laut i. [141†]

²Jadi saluhut do nasida tardidi tubagasan si Musa, di bagasan ombun i dohot di laut i.

³Jala sada do sipanganon partondion dipangan nasida saluhutna. [142†]

⁴Laos sada do siinumon partondion diinum nasida saluhutna, ai diinum nasida do sian dolok batu partondion na mangihut i (Kristus do dolok batu i). [143†]

⁵Alai toropan do nasida ndang dihalomohon Debata: Ai rage do nasida di halongonan i. [144†]

⁶Alai gabe tudosan panjoraan ma i tu hita, asa unang tahahisaphon na roa, songon nasida na marhisap i. [145†]

⁷Jala unang ma sioloi debata na leban hamu, songon na deba sian nasida, suman tu na tarsurat i: “Hundul do bangso i mangan dohot minum, dung i hehe ma nasida manortor.” [146†]

⁸Unang ma hita marmainan, songon na deba sian nasida na marmainan i, gabe mate satongkin duapulutolu ribu di na sadari i. [147†]

⁹Unang taunjuni Tuhan i, songon deba sian nasida na mangunjuni i, gabe angka ulok i mangagohon nasida. [148†]

¹⁰Unang ma hamu marungutungut, songon deba nasida na marungutungut i, gabe diago pangago i nasida. [149†]

¹¹Tudutudu do i na mangonai tu nasida; lumbalumba tu hita do i, umbahen na tarsurat, ai tu hita do jumonok ajal ni angka ari. [150†]

¹²Onpe, ganup na jongjong di rohana, dimatahon ma, unang tinggang!

¹³Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna; Ibana na parohon pangunjunan i, laos Ibana do mambahen hapateanna, asa tartaon hamu. II.

¹⁴Dibahen i, ale angka haholongan, maporus ma hamu pasiding parsombaon tu angka begu! [151†]

¹⁵Tu angka parroha do hatangku. Hamu ma manimbangi na hudok.

¹⁶Siinumon pasupasu i, na tahamauliatehon, nda parsaoran ni mudar ni Kristus do i? Roti na taponggoli i, nda parsaoran ni daging ni Kristus do i? [152†]

¹⁷Ala sada do roti i, gabe sadaging do hita torop, ai saluhut do hita partohap di roti na sasada i. [153†]

¹⁸Bereng hamu ma Israel hian: Nda partohap di langgatan i do angka na manganhon pelean i? [154†]

¹⁹Naung arga do juhut na pinelehon manang margogo do begu; i do na hudok disi?

²⁰Nda on do tahe: Na pinelehonnasida, ndada tu Debata dipelehon, tu begu i do. Alai ndang lomo rohangku, hamu saor tu angka begu! [155†]

²¹Ndang tarinum hamu sian panginuman ni Tuhan i huhut sian panginuman ni angka begu! Ndang tarbahen hamu partohap di langgatan ni Tuhan i huhut di langgatan ni angka begu! [156†]

²²Toisanta ma Tuhan i? Tung gumogo ma hita sian Ibana? III.

²³Saluhutna jadi do, alai ndang saluhut marguna; saluhutna jadi do, alai ndang saluhut patoguhon. [157†]

²⁴Unang ma masiringkoti na di ibana, na di dongan i ma! [158†]

²⁵Pangan hamu ma sian saluhut na ginadis di parjagalan i, unang nirisihan, ala ni panggora ni roha i! [159†]

²⁶Ai: “Gok di Tuhan i do tano on ro di isina!” [160†]

²⁷Anggo dipio na so porsea (na so Kristen) hamu jala dioloi hamu laho, pangan hamu ma sian saluhut na pinatedekna tu jolomuna; unang nirisihan, ala ni panggora ni roha i!

²⁸Alai molo tung adong na mandok tu hamu: Juhut na pinelehon do on; unang pangan hamu sian i, ala ni halak i na paboahonsa dohot ala ni panggora ni roha i! [161†]

²⁹Alai ndada panggora ni roha na di ho na hudok disi, na di dongan i do; ai tung hahuaon ni panggora ni roha ni halak ma ahu, naung marhaluaon i!

³⁰Ai molo mauliate rohangku manjangkonsa, aha ma pola insahan ahu, ala ni naung huhamauliatehon i! [162†]

³¹Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata! [163†]

³²Unang bahen hamu partuktuhan di Jahudi, manang di halak Junani, manang di huria ni Debata pe! [164†]

³³Songon ahu on: Hubuat do roha ni saluhut di na sasude, ai ndang hulului na marguna di ahu, na marguna di na torop i do, anggiat malua nasida. [165†]