Read Batak Toba 1 KORINT 14 Bible Online

1 KORINT 14 - Batak Toba bible

1 KORINT 14

¹I. [1] Eahi hamu ma haholongon i! Ringkoti hamu ma angka partondion; alai na rumingkot, i ma na manurirangi! [203†]

²Ai na marhata na leban ndada dongan jolma dipanghulingi, Debata do; ai ndang dapot antusan i, hahomion do dihatahon di bagasan tondina i.

³Alai na manurirangi i, jolma do dipanghulingi, laho pauliulihon, mangapoi jala mangapuli.

⁴Na pauliulihon dirina do na marhata na leban, alai huria i do dipauliuli na manurirangi.

⁵Las do rohangku nian, anggo saluhut hamu marhata na leban; alai ummarga, do na manurirangi, ai sumurung do na manurirangi asa na marhata na leban, anggo so laos dipajojor, laho pauliulihon huria i. [204†]

⁶Asa, ale angka dongan, molo tung ro ahu manopot hamu jala holan marhata na leban ahu, aha ma guna ni i di hamu, anggo so huhut huhatahon tu hamu pangungkapon manang parbinotoan manang panurirangon dohot poda. [205†]

⁷Umpamana: Uninguningan, angka na marsoara, nang so mangolu, songon tulila manang hasapi; anggo samak soarana, songon dia ma dapot botoon, na tinulilahon manang na hinasapihon?

⁸Songon sarune rupani; anggo so tangkas soarana, tung adong ma na marhobas tu tongtangan?

⁹Songon i ma hamu di parhataan i: Anggo so tangkas parhataanmuna, songon dia ma dapot antusan na hinatahon? Nda songon alogo mamolus nama i!

¹⁰Torop do antong ragam ni parhataan di portibi on, angka na masiboan laguna be.

¹¹Anggo so huboto astuan ni hata i, hira so dongan jolma ma ahu di roha ni na mangkatai i; ibana pe, songon na so dongan jolma ma di rohangku.

¹²Songon i ma di hamu: Sapala diringkoti hamu partondion, lului hamu ma na tau pauliulihon huria i, asa adong hasurunganmuna. [206†]

¹³Dibahen i, martangiang ma parhata na leban i, anggiat tarpajojorsa. [207†]

¹⁴Ai jumpa martangiang ahu di hata na leban, tondingku do tutu martangiang; alai so do anggo rohangku.

¹⁵Beha nama? Martangiang ma ahu di bagasan tondingku; alai naeng martangiang do ahu huhut di bagasan rohangku. Marende ma ahu di bagasan tondingku; alai naeng marende do ahu huhut di bagasan rohangku. [208†]

¹⁶Ai molo dipuji ho Debata di bagasan tondim, tung tarbahen ma dongan, na hundul di inganan ni natorop i, mandok “amen” di hata hamauliateonmi, anggo so diantusi na hinatahonmu!

¹⁷Ture do nian hamauliateonmi; alai ndang na pauliulihon i di angka dongan.

¹⁸Mauliate do rohangku tu Debata, ala na ummalo ahu marhata na leban sian hamu sudena.

¹⁹Alai anggo di huria i ahu, lasan do rohangku mangkatahon lima hata na marastuan, unang saloksa hata na leban, asa hupodai nang angka na asing.

²⁰Unang ma dakdanak hamu, ale angka dongan, anggo di parrohaon; dakdanak ma hamu taringot tu na roa, alai matoras ma hamu marparrohaon! [209†]

²¹Tarsurat do di patik i: “Mangkatai ma ahu tu bangso on marhitehite parhata na leban jala marhite sian parsoara na asing; jala songon i pe i, tong so tangihononnasida Ahu, ninna Tuhan i!” [210†]

²²Asa tanda do angka parhataan na leban: Ndada di angka na porsea, di angka na so porsea i do; alai anggo panurirangon i, ndada di angka na so porsea, di angka naung porsea i do.

²³Asa molo pungu sandok huria i jala sude marhata na leban, gabe bongot ma angka na so mangantusisa manang na so porsea, nda dohononnasida ma: Angka na ngongar hamu?

²⁴Alai tung sura sude manurirangi, gabe ro na so porsea manang na so mangarti, nda dapotan poda ma ibana sian sasude, nda ajaran ni saluhutna i ma ibana?

²⁵Gabe patar ma sihabunian ni rohana, jadi manungkap ma ibana marsomba tu Debata, jala marhatutuhon, naung tutu do Debata di tongatongamuna. [211†] II.

²⁶Asa beha do, ale angka dongan? Jumpa marpungu hamu, adong do di na sada endeende, di na sada poda, di na sada pangungkapon, di na sada parhataan na leban, di na sada hatoranganna; sasudena i, laho pauliulihon huria i ma nian! [212†]

²⁷Laho mangkatahon di hata na leban, sae ma dua manang intap tolu, jala sadasada ma; jadi sahalak ma pajojorhonsa!

²⁸Alai molo so adong na pajojorhon, mangkohom ma ibana anggo di jolo ni huria i; tu dirina dohot tu Debata ma i dihatahon!

²⁹Anggo panurirang, lehet ma dua manang tolu marsoara, angka dongan i ma manimbangi. [213†]

³⁰Alai molo dapotan pangungkapon sahalak na hundul disi, so ma anggo na parjolo i!

³¹Ai na jadi do hamu saluhutna manurirangi sadasada, asa saluhut dapotan poda dohot sipaingot.

³²Ai pangoloi do angka tondi ni panurirang di angka panurirang i.

³³Ai ndang dihalomohon Debata na gaor, dame i do! Songon na di saluhut huria ni angka na badia i,

³⁴hohom ma angka parompuan di parpunguanmuna, ai ndang patut mandok hata nasida; pangoloi ma antong, songon nidok ni patik i! [214†]

³⁵Alai molo adong sitangkasannasida, sinondukna be ma disungkun di jabu; ai subang do di boruboru, anggo tung mandok hata di jolo ni huria i.

³⁶Ai mamungka sian hamu do rarat hata ni Debata, manang holan tu hamu do i sahat?

³⁷Ganup na mandok, panurirang manang partondi ibana, diboto ma antong: Tona ni Tuhan i do naung husurathon on. [215†]

³⁸Alai molo so mananda ibana, rohana ma disi!

³⁹Onpe, ale angka donganku, ringkoti hamu ma na manurirangi, jala unang orai hamu na mangkatahon di hata na leban!

⁴⁰Asal sasudena i marruhut na denggan jala maratur! [216†]