Read Batak Toba 1 KORINT 15 Bible Online

1 KORINT 15 - Batak Toba bible

1 KORINT 15

¹Alai naeng ma pabotohononku tu hamu, angka dongan, barita na uli, na hubaritahon tu hamu, na jinalomuna naung gabe hajongjongan muna.

²Laos i do parhiteanmuna gabe malua, namun ditiop hamu hata na binaritahon tu hamu; ia na so sandok magopo hamu porsea.

³Ai sian mulana hupasahat tu hamu na hujalo; on do: Naung mate do Kristus ala ni dosanta, hombar tu na tarsurat i. [217†]

⁴Naung tartanom do Ibana, gabe dipahehe di ari patoluhon, hombar tu na tarsurat i. [218†]

⁵Jadi dipataridahon do dirina tu si Kepas, dung i tu na sampuludua i. [219†]

⁶Dung i dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding.

⁷Dung i dipataridahon dirina tu si Jakobus, dung i tu angka apostel i sudena. [220†]

⁸Alai dipudi ni saluhutna i, dipataridahon do Ibana nang tu ahu, na tardok tubu di na so tingkina. [221†]

⁹Ai ahu do na ummetmet sian angka apostel; na so tama do ahu nian goaron apostel, ala naung hulele huria ni Debata. [222†]

¹⁰Alai na di ahu nuaeng, sian asi ni roha ni Debata do, umbahen na dapot; jala ndang na magopo asi ni rohana na tu ahu i, ai gumodang do na huulahon sian nasida saluhutna; alai ndada ahu tahe, asi ni roha ni Debata na tu ahu, i do! [223†]

¹¹Antong, manang ahu pe manang nasida, songon i do parjamitaonnami, jala songon i do gabe porsea hamu.

¹²Marhua ma dohonon ni na deba sian tongatongamuna, na so adong haheheon ni angka naung mate, dung sanga binaritahon taringot tu Kristus, paboa naung dipahehe Ibana sian na mate!

¹³Alai anggo so adong haheheon ni angka na mate, ndang na hehe nang Kristus.

¹⁴Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna.

¹⁵Tardapot ma nang hami ala pargapgap di Debata, ala maralohon Debata huhatindangkon hami, naung dipahehe Kristus i, hape ndang dipahehe, anggo sandok so mulak mangolu angka na mate. [224†]

¹⁶Ai anggo so dipahehe angka na mate, ndang tutu hehe nang Kristus i. [225†]

¹⁷Alai anggo so dipahehe Kristus i, magopo ma haporseaonmuna, jala tong dope hamu di bagasan dosamuna, [226†]

¹⁸gabe mago ma nang angka naung monding marhitehite Kristus.

¹⁹Anggo holan di tano on hita mangkirim di Kristus i, jolma na dumangol do hita sian saluhutna.

²⁰Alai nunga hehe Kristus i sian na mate, Ibana do parjolo ni angka na monding i. [227†]

²¹Ai songon marhite sian sada jolma songgop hamatean, songon i do marhite sian sada Jolma haheheon ni angka naung mate. [228†]

²²Ai songon na di bagasan Adam saluhut mate, songon i di bagasan Kristus sude dipangolu.

²³Alai ganup ma mangihuthon parjojorna: Parjolo i Kristus, dung i angka na di Kristus i, di harorona i. [229†]

²⁴Dung i ujungna; disi ma pasahatonna harajaon i tu Debata Ama, dung jolo dipasohot nasa panggomgomion, hahuasoon dohot hagogoon. [230†]

²⁵Ai ingkon mangarajai Ibana, rasirasa dipatunduk saluhut musu i tutoru ni patna. [231†]

²⁶Hamatean i do musu na parpudi sipasohotonna i. [232†]

²⁷Ai saluhutna do dipatunduk tutoru ni patna. Alai molo saluhut dipatunduk didok, tandap ma disi, na so dohot na patundukkon saluhutna tu Ibana. [233†]

²⁸Alai dung tunduk saluhutna i tu Ibana, disi ma dohot Anak i sandiri unduk tu na patundukkon saluhut tu Ibana, asa Debata gabe saluhut di bagasan saluhut.

²⁹Angkup ni i: Aha do na niula ni angka na padidihon dirina humongkop angka na mate? Ai molo sandok so hehe angka na mate, aha padidihononna dirina humongkop angka i!

³⁰Hami pe, aha pola taononnami mora ganup tongkin? [234†]

³¹Songon na mate do ahu ganup ari, songon sintongna hamu, angka dongan, gabe barita sipujion di ahu di bagasan Kristus Jesus, Tuhanta i. [235†]

³²Ai anggo holan ala ni jolma hurangguthon di huta Epesus angka binatang, aha ma guna ni i di ahu? Anggo so hehe angka na mate: Ba mangan minum ma hita, ai mate do hita marsogot. [236†]

³³Unang hamu lilu! Mago do adat na denggan anggo hinombar na roa!

³⁴Patut ma hamu tarjolma unang mardosa; ai adong do deba, na so tumanda Debata. Laho pailahon hamu do hudok i. [237†]

³⁵Alai dohonon ni na deba ma: Songon dia ma hehe angka naung mate i? Dia ma daging ni nasida na ro i?

³⁶E, ho na loahon! Apala na olo mangolu na sinaburhonmi, anggo so na mate! [238†]

³⁷Jala jumpa manabur ho, ndada badan ni na naeng ro i disaburhon ho; batuna sambing do, manang na asing pe.

³⁸Alai Debata do mangalehon badan, guru lomo ni rohana; jala asing be do badan tu ganup boni. [239†]

³⁹Ndada sarupa nasa ragam ni sibuk i; ai asing do na di jolma, asing sibuk ni pinahan, asing sibuk ni pidong, asing na di dengke.

⁴⁰Adong do badan parbanua ginjang, jala adong do badan parbanua tonga on; alai asing do sangap ni na di ginjang, asing do na sian tano on.

⁴¹Asing do sondang ni mata ni ari, jala asing do sondang ni bulan i; asing muse sondang ni angka bintang, ai marsisurungi do angka bintang marsinondang.

⁴²Songon i do nang di haheheon ni angka naung mate: Tarsabur do di habusukon; alai dipahehe do di hatongtongon.

⁴³Tarsabur do di haleaon; alai dipahehe do di hasangapon. Tarsabur do di hagaleon; alai dipahehe do di hagogoon. [240†]

⁴⁴Na tarsabur do badan parhosa; alai dipahehe do badan partondi. Anggo adong do badan parhosa, adong ma nang badan partondi.

⁴⁵Hombar tu na tarsurat i: “Gabe hosa na mangolu do jolma na parjolo, si Adam i”; alai Tondi na pangoluhon do anggo Adam na parpudi i! [241†]

⁴⁶Alai ndada badan partondi i na parjolo, parhosa i do; dung i pe, asa partondi i!

⁴⁷Na sian tano do jolma na parjolo i jala marpangalaho tano on; sian banua ginjang do Jolma na paduahon i.

⁴⁸Mangihuthon pangalaho ni na sian tano on do angka na di tano on; jala mangihuthon pangalaho ni na sian ginjang i do angka na di ginjang i.

⁴⁹Jala songon naung tauloshon rumang ni na sian tano on, songon i do uloshononta sogot rumang ni na sian ginjang i. [242†]

⁵⁰On do na hudok disi, ale angka dongan: Ndang tarbahen sibuk dohot mudar manean harajaon ni Debata, jala ndang tartean na olo busuk i hatongtongon i. [243†]

⁵¹Hahomion do na hudok on tu hamu: Ndang na saluhut hita monding; alai saluhut do hita paubaonna. [244†]

⁵²Tompu, di bagasan sanghidopmata, di pangkuling ni sarune na parpudi i; ai mangkuling ma sarune, gabe hehe ma angka naung mate i tu hatongtongon, laos paubaonna ma anggo hita. [245†]

⁵³Ai ingkon hatongtongon do manoluk na olo busuk on, jala hangongolu na manongtong do manoluk na olo mate on. [246†]

⁵⁴Alai dung disoluk hatongtongon i na olo busuk on, jala disoluk hangongolu na manongtong i na olo mate on, disi ma jumpang hata na tarsurat i: “Nunga tarbondut hamatean; nunga soluk hamonangan!” [247†]

⁵⁵“Jo hamatean, didia hamonanganmi? Jo hamatean, didia soropmi?”

⁵⁶Alai dosa do sorop ni hamatean, jala patik i do gogo ni dosa i.

⁵⁷Alai mauliate ma di Debata, na pamonang hita marhitehite Tuhanta Jesus Kristus! [248†]

⁵⁸Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i. [249†]