Read Batak Toba 1 KORINT 16 Bible Online

1 KORINT 16 - Batak Toba bible

1 KORINT 16

¹I. [1] Alai taringot tu guguan na tu angka na badia i, ulahon hamu ma, songon naung huaturhon tu angka huria na di Galatia. [250†]

²Ganup ari Minggu ma dipapungu ganup, marguru tu na tarbahensa; unang pola pamasaon guguan, di na ro i ahu. [251†]

³Alai disi sahat ahu tu hamu, suruonku ma dongan na leak tau di rohamuna mardongan surat, mamboan asiasimuna i tu Jerusalem.

⁴Alai molo tung umpola, gabe dohot ahu borhat, denggan ma rap hami laho.

⁵Alai ro do ahu manopot hamu, dung huebati luat Makedonia. Ai mamolus do ahu di luat Makedonia. [252†]

⁶Alai ra mian do ahu di hamu, jala pasalpuonku partaonan ngali, asa pataruonmuna ahu, manang tudia pe ahu borhat. [253†]

⁷Ai ndang naeng bolus hamu idaonku sahali on; arop do tahe rohangku mian di hamu lumeleng, molo diloas Tuhan i. [254†]

⁸Alai di Epesus do ahu mian, sahat tu pesta Pentakoste. [255†]

⁹Ai mungkap do di ahu pintu na balga, na marpangkorhon godang; jala torop do na mangalo. [256†] II.

¹⁰Alai molo tung ro si Timoteus, sarihon hamu ma, unang mabiar ibana di tongatongamuna; ai ulaon ni Tuhan i do diula songon ahu on. [257†]

¹¹Unang ma adong na marhu ni roha mida ibana! Alai pataru hamu ma ibana di bagasan dame, asa ro ibana mandapothon ahu, ai hupaimaima do ibana raphon angka dongan i. [258†]

¹²Alai anggo donganta, si Apollos i, nunga gogo nian huapoi, asa ditopot hamu rap dohot angka dongan on; alai sandok na so ra ibana ro anggo nuaeng, alai ro do ibana muse di tangkas ni langkana. [259†]

¹³Dungo ma hamu, marsihohot marhaporseaon, tang ma hamu jala margogo! [260†]

¹⁴Di bagasan haholongon ma tulus sasudena di hamu!

¹⁵Diboto hamu do, angka dongan, pangisi ni bagas ni si Stepanus do patumonaan ni luat Akaya, jala dipasahat nasida do dirina gabe parhobas di angka na badia; dibahen i huapoi ma hamu: [261†]

¹⁶Dohot ma hamu marunduk ni roha maradophon dongan angka sisongon i, nang maradophon ganup donganta pangula na mangkalojahon! [262†]

¹⁷Alai las do rohangku, ala na ro do si Stepanus dohot si Portunatus dohot si Akaikus; ai nasida do manggohi na so tarpatupa hamu.

¹⁸Ai dipahosa nasida do tondingku nang tondimuna. Onpe, parhamaol hamu ma angka dongan sisongon i! [263†]

¹⁹Manongos tabi tu hamu angka huria na di Asia. Manongos tabi godang situtu tu hamu marhitehite Tuhan i: Si Akuila dohot si Priska rap dohot na marpungu di jabunasida. [264†]

²⁰Sahat ma tabi ni saluhut angka dongan i tu hamu. Masitabian ma hamu mardongan pangummaon na badia. [265†]

²¹On ma tabingku sian ahu, Paulus, sinurat ni tanganku. [266†]

²²Hona bura ma na so mangkaholongi Tuhan i! Maranata (Na ro ma Tuhanta)! [267†]

²³Didongani asi ni roha ni Tuhan Jesus i ma hamu!

²⁴Didongani holong ni rohangku ma hamu saluhutna di bagasan Kristus Jesus i!