Read Batak Toba 1 KORINT 2 Bible Online

1 KORINT 2 - Batak Toba bible

1 KORINT 2

¹I. [1] Ahu pe, di na ro i ahu tu hamu angka dongan, ndada marhata hamaloon manang marhabisuhon ahu ro mamaritahon tu hamu panindangion taringot tu Debata. [23†]

²Ai hupasada do rohangku, na so tupa botoonku di tongatongamuna agia aha, dungkon ni Jesus Kristus, mandok: Barita ni silangna. [24†]

³Marhagaleon jala marhatahuton do ahu di tongatongamuna jala bobonosan situtu. [25†]

⁴Hatangku nang parjamitaonku pe, ndada marhata habisuhon na malo mangaithon; tondi dohot hagogoon di dipapatar disi, [26†]

⁵asa marojahan haporseaonmuna di hagogoon ni Debata, unang di habisuhon ni Jolma. [27†] II.

⁶Alai habisuhon do huhatahon hami di angka naung rimpas; alai nda tung habisuhon na di portibi on, manang habisuhon ni partogi ni portibi on, angka na laho salpu.

⁷Habisuhon ni Debata do tahe na simo jala na buni, naung dipaojak Debata hian sian mula ni mulana bahen hasangaponta. [28†]

⁸I ma na so ditanda agia ise sian angka partogi ni portibi on; ai aut ditanda, ndang tagamon parsilangkononna Tuhan na marsangap i. [29†]

⁹Saut do na tarsurat i: “Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana.” [30†]

¹⁰Alai dipapatar Debata do i tu hami marhite sian Tondi i. Ai sude do didodo Tondi i, ro di angka hasimoon ni Debata. [31†]

¹¹Ai ise jolma umboto na di jolma i, ia so tondi ni jolma na di bagasan ibana? Suang songon i: Ndang adong na tumanda na di Debata, ia so Tondi ni Debata.

¹²Alai ndang hujalo hami tondi portibi on; Tondi na sian Debata do, asa dapot botoonnami na binasabasahon ni Debata tu hami.

¹³Jala i do huhatahon hami, ndada di bagasan hata habisuhon ni jolma na targuruhon, tung na pinodahon ni Tondi do, laho manimbangi angka partondion mangihuthon ruhut ni tondi. [32†]

¹⁴Ndang tarjalo jolma hian na sian Tondi ni Debata, ai haotoon do i di rohana; ndang tartandasa i, ai partondion do mandodo i. [33†]

¹⁵Alai saluhutna i didodo partondi; alai ndang tardodo manang ise anggo ibana. [34†]

¹⁶Ai ise ma naung tumanda roha ni Debata, asa ajaranna Ibana? Alai roha ni Kristus i do anggo di hami. [35†]