Read Batak Toba 1 KORINT 3 Bible Online

1 KORINT 3 - Batak Toba bible

1 KORINT 3

¹I. [1] Ahu pe, ale angka dongan, ndang tarbahen ahu mangkatai tu hamu uju i songon na tu angka partondi, sandok songon na tu angka pardaging do jala posoposo di bagasan Kristus. [36†]

²Susu do hupainumhon tu hamu, ndada sipanganon hian, ai ndang tarjalo hamu i uju i; gari nuaeng, gari so tarjalo hamu dope! [37†]

³Ai tong dope hamu pardaging. Ai anggo masa di hamu pangiburuon dohot parsalisian, nda pardaging hamu jala mamarangehon ruhut hajolmaon? [38†]

⁴Ai nda parroha hajolmaon hamu, molo adong na mandok: Sisean ni Paulus do ahu, jala na sada an: Sisean ni Apollos do anggo ahu? [39†]

⁵Ai ise Apollos; ise Paulus? Parhalado do nasida, parhiteanmuna gabe porsea, jala ganup hombar tu pangalehon ni Tuhan i di ibana. [40†]

⁶Ahu do manuan, Apollos do pabornokkon; alai Debata do patubuhon. [41†]

⁷Asa ndada rajuman na manuan manang na pabornokkon; Debata na patubuhon, i do!

⁸Dos do na manuan dohot na pabornokkonsa; alai ganup do manjalo upana, hombar tu pangulaonna be. [42†]

⁹Ai dongan pangula ni Debata do hami; hauma ni Debata, bagas ni Debata do anggo hamu. [43†] II.

¹⁰Hombar tu asi ni roha ni Debata na nilehonna i tu ahu, hupauli ojahan i, songon binahen ni pande bagas na bisuk; na asing do muse pajongjong bagas i. Alai ganup ma mamatahon, manang beha pangulaonna disi. [44†]

¹¹Ai ndang tarpauli ojahan na asing, dungkon ni naung ojak i, i ma Jesus Kristus i. [45†]

¹²Asa molo dipauli diatas ojahan i manang sere, perak, batu na arga, hau, lamlam manang durame:

¹³Gabe patar do na niula ni ganup. Ari sogot i do paullophonsa, ai papataron ni api ma i; asa api i do mangunjuni, manang beha ulaon ni ganup. [46†]

¹⁴Molo hot ulaon na pinaulina i, jaloonna do upa.

¹⁵Molo soksohanna niulana i, luangan ma ibana; malua do nian anggo ibana, alai songon na nienet sian api nama. III.

¹⁶Ndang diboto hamu: Joro ni Debata hamu, jala Tondi ni Debata maringanan di bagasan hamu? [47†]

¹⁷Agohonon ni Debata do na mangagohon joro ni Debata, ai na badia do joro ni Debata; i ma hamu.

¹⁸Unang adong na paotootohon dirina. Molo adong dietong na bisuk di tongatongamuna di portibi on, gabe na oto ma ibana jolo, anggiat gabe na bisuk muse. [48†]

¹⁹Ai anggo di jolo ni Debata haotoon do habisuhon ni portibi on, ai tarsurat do: “Ditangkup do angka na bisuk di bagasan angkalnasida.” [49†]

²⁰Jala muse: “Diboto Tuhan i do, na so marniula pingkiran ni angka na bisuk!” [50†]

²¹Asa unang ma adong na manenganengahon jolma, ai sasudena i di hamu do.

²²Manang Paulus, Apollos, Kepas, hasiangan on, hangoluan, hamatean, na masa nuaeng dohot na songgop sogot pe, saluhutna do di hamu. [51†]

²³Alai di Kristus do hamu, jala di Debata do anggo Kristus. [52†]