Read Batak Toba 1 KORINT 7 Bible Online

1 KORINT 7 - Batak Toba bible

1 KORINT 7

¹Alai taringot tu na sinurathonmuna, on ma alushu: Denggan do di baoa, unang manjama boruboru.

²Alai laho pasidingkon parmainanon i, denggan ma ganup baoa mardongan saripe jala ganup boruboru marhamulian.

³Diulahon baoa i ma na tama tu pardihutana, laos songon i parompuan i tu hamulianna.

⁴Ndang guru di parompuan i pamatangna, guru di baoa i do; suang le: Ndang guru di baoa i dagingna, guru di na niolina do.

⁵Holan sian dos ni rohamuna be jala martingki hamu masipadaoan, asa sadihari hamu martangiang; dung i masitopotan ma muse, asa unang diunjuni sibolis i hamu, binahen ni ramun ni rohamuna.

⁶Alai hudok pe songon i, na mangkaehe do ahu, ndada na mandokkon.

⁷Alai naeng ma nian, anggo di rohangku, saluhut halak songon ahu on; alai tahe, ganup ma hombar tu na niasinirohahon ni Debata tu ibana: On tu na sada, an tu na sada. [92†]

⁸Alai on ma hatangku tu angka na so marnioli dohot tu angka boruboru naung mabalu: Denggan do nasida manongtong songon ahu on.

⁹Alai molo so harajaan nasida dirina, mardongan saripe ma; ai dengganan do mardongan saripe sian na garang. [93†]

¹⁰Alai anggo naung hot ripe, Tuhan i do mamaksa, ndada holan ahu: Na so tupa sirang boruboru i sian hamulianna. [94†]

¹¹Alai molo tung sirang, unang marhamulian be, tagonan ma domu muse dohot hamulianna hian; songon i baoa i, unang ma dipaulak dongan saripena.

¹²Ahu, ndang apala Tuhan i, mandok tu angka na asing i: Molo so porsea (so Kristen) pardihuta ni sada dongan, unang ma dipaulak, anggo na lomo roha ni parompuan manginganhon ibana.

¹³Jala molo so porsea (so Kristen) hamulian ni sada boruboru, unang ma ditadingkon, anggo na lomo roha ni baoa i manginganhon ibana.

¹⁴Ai na gabe badia do baoa na so porsea i marhitehite pardihutana, jala gabe badia do boruboru na so porsea i marhitehite dongan i. Aut unang i, ramun ma anakkonmuna; alai badia do nasida. [95†]

¹⁵Alai molo disirang na so porsea i dirina, sirang ma ibana tusi. Ndang apala marnihot baoa manang boruboru naung Kristen tu sisongon i; alai di bagasan dame dijou Debata hamu. [96†]

¹⁶Ai aha ma diboto ho hian, ale inang, manang na tarpangolu ho baoa i; ho pe, amang aha ma diboto ho, manang na tarpangolu ho boruboru i? [97†]

¹⁷Antong, ganup ma marpangalaho songon na sinagihon ni Tuhan i tu ibana, songon uju na dijou Debata ibana. Laos i do huaturhon di saluhut huria i. [98†]

¹⁸Anggo naung tarsunat, di na tarjou ibana, unang ma dipauba; na so tarsunat di na tarjou i ibana, unang ma dipasunathon.

¹⁹Ndang arga parsunaton, nang bangko hian; na mangaradoti patik ni Debata, i do! [99†]

²⁰Ia songon i ganup, di na tarjou i ibana, laos songon i ma ibana tongtong. [100†]

²¹Anggo hatoban ho, di na tarjou i ho, unang holsohon i; tagonan ho mian disi, nang pe tarbahen ho malua.

²²Ai hatoban na tarjou marhitehite Tuhan i, anakmata di Tuhan i do i; songon i anakmata na tarjou i, hatoban ni Kristus do i. [101†]

²³Arga do hamu ditobus; unang ma olo hamu parhatobanon ni jolma! [102†]

²⁴Ia i ganup, di na tarjou i ibana, ale angka dongan, laos i ma ibana tongtong maradophon Debata. [103†]

²⁵Alai anggo taringot tu angka na marbaju, ndang adong nian hujalo patik ni Tuhan i; alai pingkiranku ma hulehon, songon halak na tau haposan, ala na niasian ni Tuhan i ahu. [104†]

²⁶On do pingkiranku: Ala tingki hasusaan nuaeng, denggan ma songon i halak. [105†]

²⁷Anggo naung tarihot ho tu boruboru, unang lului haluaon; anggo malua ho sian parjolmaon, unang lului boruboru.

²⁸Alai laho mangoli ho, ndang mardosa ho disi; jala molo marhamulian na marbaju i, ndang mardosa ibana disi; alai marniae di daging do nasida. Alai naeng huolani do hamu nian.

²⁹Alai on ma hudok, ale angka dongan: Gogot nama tingkina. Songon on ma tu joloan on: Songon na so marjolma ma angka naung marjolma i. [106†]

³⁰Jala songon na so tangis ma angka na tumatangis i. Jala songon na so marlas ni roha ma angka na marlas ni roha i: Jala angka na manuhor, songon na so umpeopsa.

³¹Jala angka na marhaseangkon portibi on, songon na so marhaseangkonsa situtu, ai na mamolus do rumang ni portibi on. [107†]

³²Alai naeng ma di rohangku, unang marholso ni roha hamu. Disarihon na so marripe i do na ringkot di Tuhan i, asa dihalomohon Tuhan i ibana.

³³Na marripe i sumarihon angka na di tano on, naeng halomoan ni boruboru i, jala mardua roha do ibana. [108†]

³⁴Nang boruboru na so marhamulian, nang na marbaju, na ringkot di Tuhan i do disarihon, asa badia dagingna nang tondina; alai naung marbagas i sumarihon angka na di tano on, naeng halomoan ni hamulianna.

³⁵Alai hudok pe songon i, laho mambahen na hasea di hamu do, ndada manjailhon tali rambang tu hamu; alai asa marruhut na ture hamu jala manongtong di Tuhan i, so hariboriboan.

³⁶Alai molo na hurang tama di rohana, pasombuonna songon i boruna na marbaju, anggo naung tangastangasan, ingkon tulus nama marhamulian, dipasaut ma lomo ni rohana, ndang mardosa ibana disi: Marbagas ma nasida.

³⁷Alai anggo naung gomos rohana jala ndang tarsosak, jadi guru dokna rohana, gabe dipaputus di bagasan rohana, mandok ramotanna nama boruna na marbaju i; denggan do na binahenna i.

³⁸Asa denggan do pambahen ni na pamuli boruna na marbaju; alai dengganan do pambahen ni na so pamulihonsa.

³⁹Na tarihot do boruboru na marripe, saleleng mangolu hamulianna; alai ia dung monding baoa i, marhaluaon ma nasida muli tu halomoan ni rohana; asal ma marhitehite Tuhan i! [109†]

⁴⁰Alai sonangan do nasida, anggo di rohangku, molo songon i nama nasida; jala didok rohangku, adong do nang di ahu Tondi ni Debata. [110†]